.jpg)
សកម្មភាពអាជីវករលក់ដូរនៅក្នុងផ្សារ កីឡដ្ឋាន ខេត្តកណ្ដាល នៅថ្ងៃទី20 ខែមេសា ឆ្នាំ2021 ។ រូបថត យូសុះ អាប់ឌុលរ៉ាស់ហ៊ីម
ភ្នំពេញៈ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ និងមន្ត្រីជាន់ខ្ពស់គណបក្សប្រជាធិបតេយ្យមូលដ្ឋាន (GDP) លោក យ៉ង សាំងកុមារ បានអំពាវនាវឲ្យក្រសួងពាណិជ្ជកម្មរៀបចំស្តង់សម្រាប់អាជីវករលក់ដូរនៅតំបន់បិទខ្ទប់។
ការអំពាវនាវនេះស្របពេល សាលារាជធានីភ្នំពេញបានសម្រេចបិទផ្សាររដ្ឋ និងផ្សារមិនរៀបរយទាំងអស់នៅទីក្រុងភ្នំពេញរយៈពេល ១៤ ថ្ងៃ គិតចាប់ពីថ្លៃទី ២៤ មេសា ដល់ ថ្ងៃទី ៧ ខែឧសភា ឆ្នាំ ២០២១ ដើម្បីបង្ការ និងទប់ស្កាត់ការឆ្លងរាលដាលជំងឺកូវីដ១៩។
លោក ខៀវ កាញារីទ្ធ បានសរសេរនៅលើទំព័រហ្វេសប៊ុកផ្លូវការរបស់លោកកាលពីថ្ងៃអាទិត្យថា ក្រសួងពាណិជ្ជកម្មបានចាត់ចែងបើកស្តង់លក់ទំនិញក្នុងអំឡុងពេលបិទខ្ទប់ នេះជាគំនិតផ្តួចផ្តើមមួយល្អ ប៉ុន្តែថា ក្រសួងពាណិជ្ជកម្មអាចលក់បង់រំលស់ជូនអ្នកដែលមិនមានលុយគ្រប់គ្រាន់ ហើយអនុញ្ញាតឲ្យអ្នកលក់ដូរធម្មតាលក់នៅជិតនោះសម្រាប់អ្នកមានលុយគ្រប់គ្រាន់។
លោកសរសេរថា៖ «ធ្វើយ៉ាងនេះ យើងជួយអ្នកមានជីវភាពខ្វះខាតផង អនុញ្ញាតឲ្យប្រជាពលរដ្ឋ (អ្នកចាក់វ៉ាក់សាំងបាន ២ លើកហើយ ) មានប្រភពចំណូលវិញផង ឬបើមិនចង់ស្មុគស្មាញលក់រំលស់ទេ ក្រសួងមិនបាច់លក់ ទុកឲ្យឯកជនទាំងអស់ក៏បាន ( ក្រសួងត្រួតពិនិត្យតម្លៃ ) ធ្វើបែបនេះ គឺមន្ត្រីរាជការមិនលំបាកនឹងមកលក់ដូរផងដែរ»។
ជាមួយគ្នានេះលោក យ៉ង សាំងកុមារ ក៏បានអំពាវនាវឲ្យក្រសួងពាណិជ្ជកម្មគួរបង្កើតទីតាំងសម្រាប់បោះដុំកសិផលមកពីតាមបណ្តាខេត្តនានា ដើម្បីឲ្យអាជីវករអាចរកប្រាក់ចំណូលក្នុងអំឡុងពេលបិទខ្ទប់នេះ។
លោក សាំងកុមារ ឲ្យដឹងថា ការលក់ដូរគឺជាមុខរបរ ឬជាឆ្នាំងបាយរបស់អាជីវករតូចតាចដែលភាគច្រើន រកមួយថ្ងៃរស់មួយថ្ងៃ។
លោកបន្ថែមទៀតថា៖ «តាមយោបល់ខ្ញុំក្រសួងគួរផ្តោតលើការជួយគាំទ្រដល់អាជីវករដើម្បីដំណើរការអាជីវកម្មពួកគាត់បានល្អដោយមានទីតាំងសមស្របទទួលបានការផ្គត់ផ្គង់កសិផលពីប្រភពផ្សេងៗបានដោយរលូន និងដំណើរការលក់ដូរដោយគោរពតាមគោលការណ៍សុខាភិបាលបានល្អ។ ការចែកគ្នាទទួលខុសត្រូវ និងការជួយគ្នាទៅវិញទៅមករវាងរដ្ឋ និងពលរដ្ឋនាំឲ្យយើងទប់ទល់ជាមួយកូវីដ១៩បានជោគជ័យ»។
បច្ចុប្បន្នក្រសួងពាណិជ្ជកម្មតាមរយៈក្រុមហ៊ុន ហ្គ្រីន ត្រេដ បានបញ្ចេញរថយន្តចល័ត និងបង្កើតស្តង់យ៉ាងហោចណាស់ចំនួន ២២ ដើម្បីលក់ទំនិញចាំបាច់ក្នុងតម្លៃក្រោមទីផ្សារនៅតំបន់ក្រហម។
ជាមួយគ្នា ក្រុមហ៊ុន វីរៈ ប៊ុនថាំ អេចប្រេស ដែលបានសហការជាមួយសាលារាជធានីភ្នំពេញក៏បានបញ្ចេញរថយន្តចល័តចំនួន ៦៤ គ្រឿង លក់គ្រឿងឧបភោគបរិភោគ ដែលមានបន្លែ ត្រី សាច់ ដែលមានតម្លៃសមរម្យលក់ជូនប្រជាពលរដ្ឋនៅតំបន់ក្រហមផងដែរ។
ចាប់ពីថ្ងៃទី ១៥ ដល់ ១៩ ខែមេសា ក្រសួងពាណិជ្ជកម្មតាមក្រុមហ៊ុន ហ្គ្រីន ត្រេដ បានបញ្ចេញលក់អង្ករបានចំនួន ១ ២៤១ បេ និងមីជាតិចំនួន ៤ ៦២០ កេស ដល់ប្រជាជនក្នុងតំបន់បិទខ្ទប់ (តំបន់ក្រហម)។
ក្រសួងពាណិជ្ជកម្មឲ្យដឹងទៀតថា ក្រៅពីនេះក្រសួងក៏បានលក់ទឹកត្រីចំនួន ១ ១៥៣ យួរ ទឹកស៊ីអ៊ីវ ៧៨៥ យួរ ត្រីខ ១ ៦២៧ យួរ ទឹកសុទ្ធ ១៤០ យួរ ព្រមទាំងបន្លែ ១១៥ គីឡូក្រាម សាច់ក្រក ១៣ គីឡូក្រាម និងឆាយប៉ូវ ៣៥៦ ថង់។
ការបញ្ចេញរថយន្តចល័តលក់គ្រឿងឧបភោគបរិភោគ ដើម្បីរក្សាលំនឹងតម្លៃទំនិញនៅលើទីផ្សារ និងសម្រួលដល់ប្រជាពលរដ្ឋទទួលបានម្ហូបអាហារក្នុងអំឡុងពេលបិទខ្ទប់។ រាល់ទំនិញទាំងអស់របស់ក្រសួងពាណិជ្ជកម្មលក់ក្រោមតម្លៃទីផ្សារ។
ក្រៅពីរថយន្តចល័ត ក្រសួងក៏បានដំឡើងស្តង់ទំនិញចំនួន ១១ ស្តង់បន្ថែមទៀតសម្រាប់លក់គ្រឿងឧបភោគបរិភោគចាំបាច់ដល់ប្រជាពលរដ្ឋ៕
