ភ្នំពេញៈ មន្ដ្រីមកពីក្រសួងកសិកម្ម បង្ហាញការបារម្ភជាថ្មីម្តងទៀតចំពោះការធ្លាក់ចុះការនាំចេញអង្កររបស់កម្ពុជា ដោយថ្លែងថា ទោះបីជាកិច្ចព្រមព្រៀងអង្ករជាច្រើនត្រូវបានធ្វើឡើងក៏ដោយ។
របាយការណ៍ពីអគ្គនាយកដ្ឋានកសិកម្ម បង្ហាញកាលពីម្សិលមិញថា ការនាំចេញអង្ករកម្ពុជាក្នុងរយៈពេល ៤ ខែដំបូងធ្លាក់ចុះ ៧ ភាគរយ ធៀបនឹងរយៈពេលដូចគ្នាកាលពីឆ្នាំមុន។
ការធ្លាក់ចុះនេះ ធ្វើឲ្យមានការបារម្ភយ៉ាងខ្លាំងសម្រាប់ឧស្សាហកម្មស្រូវអង្ករកម្ពុជា ទោះបីជាកិច្ចព្រមព្រៀងនាំចេញអង្កររាប់ពាន់តោនត្រូវបានចុះហត្ថលេខា សម្រាប់ការនាំចេញក៏ដោយ។ នេះបើយោងតាមលោក ហ៊ាន វណ្ណហន អគ្គនាយកនៃអគ្គនាយកដ្ឋានកសិកម្មរបស់ក្រសួងកសិកម្មបានថ្លែង កាលពីម្សិលមិញ។
ទិន្នន័យដែលបានចេញផ្សាយដោយអគ្គនាយកដ្ឋានកសិកម្មកាលពីម្សិលមិញ បានផ្ដល់ព័ត៌មានលម្អិតលើការនាំចេញអង្ករសរុបនៅរយៈពេល ៤ ខែដំបូងនៅឆ្នាំនេះ មានចំនួនសរុប ១៩៧ ៣៥៤ តោន ធៀបនឹងចំនួន ២១២ ៣៩៤ តោនដែលបាននាំចេញក្នុងរយៈពេលដូចគ្នាកាលពីឆ្នាំមុន គឺធ្លាក់ចុះ ៧ ភាគរយ។
លោក ហ៊ាន វណ្ណហន ថ្លែងថា៖ «វាជាការបារម្ភពិតប្រាកដសម្រាប់ឧស្សាហកម្មស្រូវអង្ករ»។ លោកថ្លែងថា ឧស្សាហកម្មស្រូវអង្ករកម្ពុជាអាចផលិតស្រូវបាន ១០ លានតោន ខណៈកិច្ចព្រមព្រៀងនាំចេញអង្ករត្រូវបានចុះហត្ថលេខាសម្រាប់ការបង្កើនការនាំចេញ ប៉ុន្តែ ភាពពិតនៃការនាំចេញនៅធ្លាក់ចុះ។
លោកថ្លែងថា៖ «ទោះបីជារដ្ឋាភិបាលបានចុះហត្ថលេខាសម្រាប់ការនាំចេញអង្ករក៏ដោយ ប៉ុន្តែ វានៅតែពឹងផ្អែកលើការចរចាលក្ខខណ្ឌ និង តម្លៃ រវាងអ្នកទិញ និងក្រុមហ៊ុននាំចេញអង្កររបស់យើង»។ លោកបន្តថា៖ «យើងនឹងរៀបចំកិច្ចប្រជុំជាមួយវិស័យឯកជន និងក្រសួងពាក់ព័ន្ធ ដើម្បីពិនិត្យមើលបញ្ហាប្រឈមនៅពីក្រោយ»។
ប្រទេសចិន ដែលយល់ព្រមទទួលទិញអង្ករ ២០០ ០០០ តោន ពីប្រទេសកម្ពុជាកាលពីឆ្នាំ ២០១៧ ហើយនឹងបង្កើនកូតាដល់ ៣០០ ០០០ តោននៅឆ្នាំនេះ គឺជាទិសដៅដ៏សំខាន់សម្រាប់ការនាំចេញអង្ករនៅក្នុងប្រទេស កម្ពុជា។
កាលពីឆ្នាំមុនប្រទេស កម្ពុជា បានចុះហត្ថលេខាលើកិច្ចព្រមព្រៀង នាំចេញអង្ករ ១ លានតោនទៅប្រទេសបង់ក្លាដែស ក្នុងរយៈពេល ៥ ឆ្នាំ ដោយយល់ព្រមនាំចេញ ២៥០ ០០០ តោនក្នុង ១ ឆ្នាំ។
ប៉ុន្តែ កិច្ចព្រមព្រៀងនេះ ត្រូវបានលុបចោល ដោយប្រទេសបង់ក្លាដែស ខណៈការចរចា និងលក្ខខណ្ឌ មិនត្រូវបានធ្វើរួមគ្នានោះទេ។
ទោះបីយ៉ាងនេះក្តី លោក ឡុង កែមវិចិត្រ អ្នកនាំពាក្យក្រសួងពាណិជ្ជកម្ម នៅតែបញ្ជាក់ថា អនុស្សរណៈនៃការយោគយល់គ្នាជាមួយ ប្រទេសបង់ក្លាដែស នៅតែដំណើរការនៅឡើយ។ លោកថ្លែងថា៖ «MoU នេះកំពុងអនុវត្តនៅឡើយ ហើយទាំងកម្ពុជា និងបង់ក្លាដែស កំពុងធ្វើការងារឆ្ពោះទៅការអនុវត្ត MoU នេះ»៕ LA