ភ្នំពេញៈ កម្ពុជាកំពុងក្លាយជាទិសដៅសម្រាប់ការវិនិយោគដើម្បីនាំចេញទៅកាន់ទីផ្សារអន្តរជាតិ ខណៈប្រទេសដែលជាសមាជិកអាស៊ានមួយនេះបានចូលរួមនៅក្នុងកិច្ចព្រមព្រៀងពាណិជ្ជកម្មជាច្រើនជាមួយបណ្តាប្រទេសទាំងក្នុងតំបន់ និងពិភពលោក។ នេះបើយោងតាមលោក ឈួន ដារ៉ា រដ្ឋលេខាធិការក្រសួងពាណិជ្ជកម្ម។
ថ្លែងក្នុងជំនួបពាណិជ្ជកម្មរវាងពាណិជ្ជករមកពីខេត្តគួងស៊ី ប្រទេស ចិន ចំនួន ៥៧ ក្រុមហ៊ុន រួមជាមួយពាណិជ្ជករមកពីប្រទេស ថៃ ឥណ្ឌូនេស៊ី និងវិនិយោគិន ក្នុងស្រុកកាលពីថ្ងៃចន្ទនៅទីក្រុងភ្នំពេញលោក ឈួន ដារ៉ា បានឲ្យដឹងថា ជំនួបពាណិជ្ជកម្មធ្វើឡើងក្នុងគោលបំណងដើម្បីធ្វើការផ្សព្វផ្សាយពីឱកាសក្នុងការវិនិយោគនៅកម្ពុជា ការបង្កើតឱកាសនៃការចាប់ដៃគូពាណិជ្ជកម្ម និងការផ្សព្វផ្សាយពីផលិតផលរបស់ប្រទេស កម្ពុជា។
លោកបន្តថា សក្តានុពលនៃទីតាំងភូមិសាស្ត្រ (ចំកណ្តាលតំបន់អាស៊ាន) បានធ្វើឲ្យកម្ពុជាក្លាយជាប្រទេសមានសក្តានុពលខ្ពស់សម្រាប់ការវិនិយោគ។
លោកបន្ថែមថា៖ «កម្ពុជាគឺជាទិសដៅសម្រាប់ពាណិជ្ជករមកវិនិយោគដើម្បីនាំចេញផលិតផលទៅកាន់ទីផ្សារអន្តរជាតិ ខណៈកម្ពុជាមានកិច្ចព្រមព្រៀងពាណិជ្ជកម្មជាមួយប្រទេសជាច្រើន ហើយកម្ពុជាក៏បានចូលរួមចរចាក្នុងភាពជាដៃគូសេដ្ឋកិច្ចទូលំទូលាយក្នុងតំបន់នៅឆ្នាំ ២០១២ ជាមួយនឹងអាស៊ានបូកប្រទេសទាំង ៦ និងមានកិច្ចព្រមព្រៀងពាណិជ្ជកម្មសេរី (FTA) ទៀតផង»។
លោកបានបន្តថា កម្ពុជាក៏ជាប្រទេសដែលមានគោលនយោបាយលើកទឹកចិត្តច្រើនសម្រាប់វិនិយោគិន ព្រមជាមួយនឹងការទទួលបាននូវភាពអនុគ្រោះពន្ធពីទីផ្សារសហភាពអឺរ៉ុប ជប៉ុន កូរ៉េ កាណាដា និងអាមេរិកផងដែរ។
គោលនយោបាយរបស់រដ្ឋាភិបាលកម្ពុជាចំពោះវិនិយោគិនបរទេសមានដូចជា ការបន្ទាបពន្ធលើប្រាក់ចំណេញ ការបង្វិលទុន និងការប្រើប្រាស់ដើមទុនរបស់ខ្លួន ១០០ ភាគរយជាដើម។ នេះបើតាមលោក ឈួន ដារ៉ា។
លោកបន្តថា៖ «ខ្ញុំសង្ឃឹមថា ជំនួបនេះនឹងផ្តល់ឱកាសដល់ពាណិជ្ជករកម្ពុជាបានជួបជាមួយពាណិជ្ជករចិន ថៃ និងឥណ្ឌូនេស៊ី ដើម្បីធ្វើការសិក្សាស្វែងយល់ ព្រមទាំងពង្រឹងនូវខ្សែចង្វាក់ផលិតកម្ម ការចាប់ដៃគូរកស៊ី និងនាំចេញ-នាំចូលរវាងគ្នាឲ្យកាន់តែច្រើន និងមានប្រសិទ្ធភាពខ្លាំងក្លាបន្ថែមទៀត»។
លោក លឹម ហេង អនុប្រធានសភាពាណិជ្ជកម្មកម្ពុជាកាលពីម្សិលមិញបាននិយាយថា ជំនួបពាណិជ្ជកម្មពិតជាចូលរួមចំណែកយ៉ាងសកម្មក្នុងការជំរុញកិច្ចសហប្រតិបត្តិការ និងទាក់ទាញអ្នកវិនិយោគឲ្យចូលមកបណ្តាក់ទុននៅកម្ពុជា។ តាមរយៈជំនួបពាណិជ្ជកម្ម អ្នកវិនិយោគបរទេសមិនត្រឹមតែទទួលបានព័ត៌មានទីផ្សារ និងឱកាសវិនិយោគប៉ុណ្ណោះទេ ពួកគេក៏អាចទទួលបានដៃគូវិនិយោគទៀតផង។
លោកថ្លែងថា៖ «គ្រប់វិនិយោគិនបរទេសដែលចង់ទៅវិនិយោគនៅប្រទេសណាមួយ គេសុទ្ធតែចង់ជួបពាណិជ្ជករក្នុងស្រុកជាមុន ដើម្បីពិភាក្សា និងស្វែងយល់ពីសភាពការណ៍វិនិយោគ»។
លោកបានបន្ថែមថា៖ «សភាពាណិជ្ជកម្មកម្ពុជាក៏ធ្លាប់បានចេញទៅរៀបចំវេទិកាបែបនេះនៅក្រៅប្រទេសផងដែរ ពិសេសនៅពេលថ្នាក់ដឹកនាំកំពូលធ្វើដំណើរទស្សនកិច្ចទៅក្រៅប្រទេសតំណាងសភាពាណិជ្ជកម្មកម្ពុជាតែងទៅចូលរួម ឬរៀបចំជំនួបពាណិជ្ជកម្មនៅទីនោះដែរ»។
របាយការណ៍ប្រចាំឆមាសទី ១ របស់ធនាគារជាតិនៃកម្ពុជាបានឲ្យដឹងថា ការនាំចេញទំនិញកម្ពុជាមានតម្លៃសរុប ៦,៨ ពាន់លានដុល្លារក្នុងនោះទីផ្សារអាមេរិកមានចំនួន ២៨ ភាគរយ តំបន់អឺរ៉ុប ២៦,៦ ភាគរយ ចក្រភពអង់គ្លេស ៦,៦ ភាគរយ និងជប៉ុន ៧,៧ ភាគរយ។
ចំណែកការនាំចូលមានតម្លៃសរុបរហូត ១០,៥ ពាន់លានដុល្លារ នាំមុខដោយប្រទេសចិនដែលមាន ៤៦ ភាគរយ ថៃ ១៥,៦ ភាគរយ វៀតណាម ១៣,២ ភាគរយ និងជប៉ុន ៤,៥ ភាគរយ៕