ក្រុងវ៉ាស៊ីនតោនៈ លោក Steven Mnuchin រដ្ឋមន្ដ្រីក្រសួងហិរញ្ញវត្ថុរបស់សហរដ្ឋអាមេរិកកាលពីថ្ងៃពុធ បានទទួលស្គាល់ថា អតិថិជនអាចចំណាយលើតម្លៃទំនិញកាន់តែខ្ពស់ ដោយសារតែការហូតពន្ធនាំចូលក្នុងអត្រាខ្ពស់លើទំនិញរបស់ប្រទេស ចិន។
ការលើកឡើងរបស់លោក Mnuchin មិនត្រូវគ្នានឹងសារដែលបានលើកឡើងដោយលោកប្រធានាធិបតី ដូណាល់ ត្រាំ ដែលថា ប្រទេស ចិន នឹងជាអ្នកចំណាយលើពន្ធនាំចូល ដែលបង្កើតអត្ថប្រយោជន៍សម្រាប់រដ្ឋាភិបាលអាមេរិក។
ក្នុងការផ្តល់សក្ខីកម្មនៅចំពោះមុខគណៈកម្មាធិការសេវាហិរញ្ញវត្ថុសភា លោក Mnuchin បានថ្លែងថា៖ «ក្នុងករណីខ្លះអាចមានផលប៉ះពាល់ដែលហុចបន្តទៅដល់អតិថិជនរបស់យើង»។
លោកក៏បានថ្លែងដែរថា លោកបាននិយាយទៅកាន់ក្រុមមន្រ្ដីប្រតិបត្តិជាន់ខ្ពស់នៅក្រុមហ៊ុន Walmart និងក្រុមហ៊ុនលក់រាយធំៗផ្សេងទៀតផងដែរ អំពីផលិតផលប្រើប្រាស់ដែលភាគច្រើនទំនងជាមើលឃើញតម្លៃកើនឡើង ដោយសារសង្គ្រាមពាណិជ្ជកម្មជាមួយទីក្រុងប៉េកាំង។
លោកថា៖ «ខ្ញុំបាននិយាយទៅកាន់អគ្គនាយកទាំងនេះ។ អាចមានទំនិញចំនួនតូចដែលពន្ធនាំចូលនេះអាចហុចបន្តទៅដល់អតិថិជន»។
ប៉ុន្តែលោក Mnuchin បានបញ្ជាក់ថា រដ្ឋាភិបាលមិនទាន់សម្រេចចិត្តនៅឡើយនោះទេ ថា តើនឹងដំឡើងពន្ធនាំចូលលើទំនិញតម្លៃ ៣០០ ពាន់លានដុល្លារ បន្ថែមទៀត ឬយ៉ាងណា ដែលនឹងនាំឲ្យស្ទើរគ្រប់អ្វីៗទាំងអស់ដែលអាមេរិកទិញពីប្រទេស ចិន នឹងជាប់ពន្ធក្នុងអត្រាខ្ពស់នេះ។
លោក Mnuchin បន្តថា ការបង្កើនតម្លៃអាចថយចុះមកវិញតាមរយៈការលើកលែងប្រភេទទំនិញមួយចំនួន។
លោកក៏បានទទួលស្គាល់ផងដែរថា ការធ្លាក់ចុះតម្លៃរូបិយប័ណ្ណរបស់ប្រទេស ចិន អាចរារាំងដល់ការកើនឡើងតម្លៃនេះ៕ AFP/LA