.jpg)
លោក Ali Akbar Salehi និងលោក Arias Canete ក្នុងសន្និសីទកាលពីថ្ងៃសៅរ៍។ AFP ហ៊ាន រង្សី
ក្រុងតេអេរ៉ង់ៈ លោក Miguel Arias Canete ស្នងការថាមពលសហភាពអឺរ៉ុប បានធ្វើដំណើរទៅដល់ទីក្រុងតេអេរ៉ង់កាលពីថ្ងៃសៅរ៍ ដើម្បីធ្វើបទបង្ហាញផែនការសម្រាប់ការបន្តទិញប្រេង និងឧស្ម័ន និងការពារក្រុមហ៊ុនរបស់អឺរ៉ុប បើទោះបីជាមានទណ្ឌកម្មរបស់អាមេរិកជាថ្មីលើប្រទេសអ៊ីរ៉ង់ក្តី។
លោក Canete មានប្រសាសន៍ថាការបន្តរក្សាកិច្ចព្រមព្រៀងនុយក្លេអ៊ែរឆ្នាំ ២០១៥ បើទោះជាមានការសម្រេចរបស់សហរដ្ឋអាមេរិកដកខ្លួនចេញពីកិច្ចព្រមព្រៀងនេះក្តីគឺជា «មូលដ្ឋានដើម្បីសន្តិភាពនៅក្នុងតំបន់»។
លោក Canete បានថ្លែងក្នុងសន្និសីទសារព័ត៌មានមួយជាមួយនឹងលោក Ali Akbar Salehi ប្រធានអង្គការថាមពលអាតូមិករបស់ប្រទេសអ៊ីរ៉ង់ថា៖ «ពិតណាស់មានការលំបាកយ៉ាងច្បាស់ជាមួយទណ្ឌកម្មនានា»។
លោកបានបញ្ជាក់ថា៖ «យើងនឹងត្រូវស្នើសុំការលើកលែង ដើម្បីលើកលែងក្រុមហ៊ុនមួយចំនួនដែលធ្វើការវិនិយោគ»។
លោក Canete ដែលជាមន្ត្រីរបស់ប្រទេសលោកខាងលិចដំបូងដែលបានទៅទស្សនកិច្ចប្រទេសអ៊ីរ៉ង់គិតចាប់តាំងពីមានការសម្រេចចិត្តរបស់អាមេរិកមក បានជួបពិភាក្សាជាមួយលោក Isa Kalantari រដ្ឋមន្ត្រីក្រសួងបរិស្ថាន និងលោក Bijan Namdar Zanganeh រដ្ឋមន្ត្រីប្រេងរបស់ប្រទេសអ៊ីរ៉ង់កាលពីល្ងាចថ្ងៃសៅរ៍ ហើយបានជួបពិភាក្សាជាមួយលោក Mohammad Javad Zarif រដ្ឋមន្ត្រីក្រសួងការបរទេសអ៊ីរ៉ង់ផងដែរកាលពីថ្ងៃអាទិត្យ។
លោក Salehi បានទទួលស្គាល់ចំពោះកិច្ចខិតខំប្រឹងប្រែងរបស់អឺរ៉ុប ដើម្បីបន្តកិច្ចព្រមព្រៀងនុយក្លេអ៊ែរនេះ។
លោក Salehi បានប្រាប់ក្រុមអ្នកយកព័ត៌មានថា៖ «យើងមើលឃើញសហភាពអឺរ៉ុប... កំពុងខិតខំប្រឹងប្រែងខ្លាំង។ ពួកគេបានសន្យាធ្វើបែបនេះ និងជាបំណងរបស់ព្រះជាម្ចាស់។ ពួកគេនឹងអនុវត្តតាមការសន្យា»។
មេដឹកនាំអឺរ៉ុបបានសន្យាបន្តកិច្ចព្រមព្រៀងនេះហើយប្រើប្រាស់វិធានការមួយចំនួន ដើម្បីជំរុញពាណិជ្ជកម្ម និងការពារក្រុមហ៊ុនអឺរ៉ុបពីទណ្ឌកម្មរបស់សហរដ្ឋអាមេរិក។
តែក្រុមហ៊ុនមួយចំនួនក្នុងចំណោមក្រុមហ៊ុនរបស់អឺរ៉ុបរួមទាំងក្រុមហ៊ុន Total របស់បារាំង និងក្រុមហ៊ុន Maersk របស់ហូឡង់ផងដែរនោះបានប្រកាសរួចហើយថា ក្រុមហ៊ុនរបស់ខ្លួននឹងមិនអាចបន្តនៅប្រទេសអ៊ីរ៉ង់បានទេ នៅពេលដែលទណ្ឌកម្មរបស់អាមេរិកត្រូវបានអនុវត្តជាថ្មីទាំងស្រុងនៅក្នុងរយៈពេល ៦ ខែខាងមុខនេះដរាបណាក្រុមហ៊ុនទាំងនេះមិនបានទទួលការលើកលែងទណ្ឌកម្មនេះពីសំណាក់រដ្ឋាភិបាលក្រុងវ៉ាស៊ីនតោននោះ។
ពាណិជ្ជកម្មរបស់ប្រទេសអ៊ីរ៉ង់ជាមួយសហភាពអឺរ៉ុបមានទំហំប្រមាណ ២០ ពាន់លានអឺរ៉ូដែលការនាំចូល និងការនាំចេញមានទំហំស្មើគ្នា។
ការទិញភាគច្រើនរបស់អឺរ៉ុបពីប្រទេសអ៊ីរ៉ង់ដែលមាន ៩០ ភាគរយគឺប្រេងដែលភាគច្រើននាំចេញទៅប្រទេសអេស្ប៉ាញ បារាំង អ៊ីតាលី ក្រិក ហូឡង់ និងអាល្លឺម៉ង់។
ប្រទេសអ៊ីរ៉ង់ដែលជាប្រទេសមានកំណប់រ៉ែប្រេងច្រើនជាងគេទី ៤ របស់ពិភពលោក ផលិតប្រេងប្រមាណ ៣,៨ លានបារ៉ែលក្នុងមួយថ្ងៃដែល ៧០ ភាគរយនៃប្រេងទាំងនេះត្រូវបាននាំចេញទៅកាន់ប្រទេសចិន និងប្រទេសក្នុងតំបន់អាស៊ីផ្សេងទៀត និង ២០ ភាគរយទៅកាន់តំបន់អឺរ៉ុប៕ BP
