ភ្នំពេញ: អគ្គនាយកដ្ឋានប្រេងកាតនៃក្រសួងរ៉ែ និងថាមពលបានឲ្យដឹងថា ក្រុមហ៊ុន KrisEnergy របស់សិង្ហបុរីនៅតែបន្ត អភិវឌ្ឍនៅតំបន់ប្រេងអប្សរាក្នុងប្លុក A បើទោះបីជាតម្លៃប្រេងឆៅពិភពលោកបានធ្លាក់ចុះយ៉ាងគំហុកដោយសារជំងឺកូវីដ ១៩។
ថ្លែងក្នុងសន្និសីទសារព័ត៌មានស្តីពីវឌ្ឍនភាព និងទិសដៅការងារបន្តរបស់ក្រសួងរ៉ែ និងថាមពលកាលពីថ្ងៃអង្គារលោក ជៀប សួរ អគ្គនាយកនៃអគ្គនាយកដ្ឋានប្រេងកាតបានថ្លែងឲ្យដឹងថា រហូតមកដល់ពេលនេះក្រុមហ៊ុន KrisEnergy មិនទាន់មានការជូនដំណឹងមកក្រសួងពីផលប៉ះពាល់ដល់ប្រតិបត្តិការរបស់ខ្លួនដោយសារជំងឺកូវីដ១៩នោះទេ។
លោកថ្លែងថា៖ «យើងនឹងធ្វើការពិភាក្សាលម្អិតជាមួយក្រុមហ៊ុន ដើម្បីសិក្សាអំពីផលប៉ះពាល់នៃគម្រោងអភិវឌ្ឍន៍ប្រេងកាតក្នុងប្លុក A នេះ»។
លោកបានបន្ថែមថា៖ «ការធ្លាក់ចុះថ្លៃប្រេងនេះនៅពេលនេះនឹងអាចធ្វើឲ្យមានការបាត់ទំនុកចិត្តដល់អ្នកផ្តល់ហិរញ្ញប្បទានក្នុងការដាក់ទុនវិនិយោគក្នុងវិស័យនេះ»។
លោកបានបន្តថា ទន្ទឹមនឹងនេះដែរក្រសួងរ៉ែ និងថាមពលបាននិងកំពុងខិតខំប្រឹងប្រែងយ៉ាងខ្លាំង ដើម្បីធ្វើការទាក់ទាញវិនិយោគិនមកវិនិយោគលើវិស័យប្រេងកាតនៅកម្ពុជា។
លោកបញ្ជាក់ថា៖ «យើងនឹងខិតខំទាក់ទាញវិនិយោគិនមកសិក្សាស្វែងរកប្រេងកាត និងបន្តជំរុញការសាងបន្ទប់ទិន្នន័យប្រេងកាត ហើយក្រសួងកំពុងជំរុញឲ្យមានការផលិតប្រេងកាតចាប់ពីឆ្នាំ ២០២០ នេះទៅ»។
លោកស្រី Tanya Pang ប្រធានទំនាក់ទំនងសាធារណៈរបស់ក្រុមហ៊ុន KrisEnergy មិនបានឆ្លើយអ៊ីមែលមកកាន់កាសែតភ្នំពេញប៉ុស្តិ៍ទេកាលពីថ្ងៃម្សិលមិញ។
តម្លៃប្រេងឆៅពិភពលោកបានធ្លាក់ក្រោម ១៥ ដុល្លារក្នុង ១ ប៉ារ៉ែលកាលពីថ្ងៃចន្ទ ដែលជាការធ្លាក់ចុះទាបបំផុតអស់រយៈពេលជាង ២ ទសវត្សរ៍ មកហើយដោយមានក្តីបារម្ភអំពីភាពភ័យខ្លាចចំពោះតម្រូវការទីផ្សារបណ្តាលមកពីវីរុសកូរ៉ូណា និងការកង្វះឃ្លាំងស្តុកប្រេង។ នេះបើតាម AFP។
ក្រុមហ៊ុន KrisEnergy បានឲ្យដឹងថា ប្រេងតំបន់អប្សរាគ្រោងនឹងផលិតនៅឆមាសទី ១ ឆ្នាំ ២០២០ ហើយតំបន់នេះត្រូវរំពឹងថានឹងឈានដល់អត្រាផលិតកម្មខ្ពស់បំផុត ៧ ៥០០ បារ៉ែល ក្នុង ១ ថ្ងៃ។
បើតាមលោក ជៀប សួរ ប្រទេសកម្ពុជាបានបែងចែកតំបន់សម្រាប់ការរុករកប្រេងកាតចំនួន ៦ ប្លុកនៅក្នុងសមុទ្រ និង ១៩ ប្លុកនៅដែនគោក។
បច្ចុប្បន្ន Cambodia Resources Energy Development Co Ltd ជាក្រុមហ៊ុនគ្រប់គ្រងដោយវិនិយោគិនជនជាតិចិនត្រូវបានផ្តល់អាជ្ញាប័ណ្ណឲ្យរុករកប្រេងរយៈពេល ៣ ឆ្នាំនៅប្លុក D ដែលមានទំហំ ៥ ៥០០ គីឡូម៉ែត្រការ៉េក្នុងឈូងសមុទ្រថៃ ហើយក្រុមហ៊ុនគ្រោងចាប់ផ្តើមការរុករកប្លុក D នៅឆ្នាំនេះ៕