.jpg)
អ្នកចូលរួមក្នុងសិក្ខាសាលាច្បាប់ឧបាស្រ័យពាណិជ្ជកម្ម នៅទីក្រុងភ្នំពេញ កាលពីថ្ងៃអង្គារ។ ហេង ជីវ័ន
ភ្នំពេញៈ មន្រ្តីក្រសួងពាណិជ្ជកម្មដែលជាសមាជិកតាក់តែងច្បាប់ស្តីពីឧបាស្រ័យពាណិជ្ជកម្ម (ឬច្បាប់ប្រឆាំងការលក់បង្ខូចថ្លៃ) បានលើកឡើងកាលពីថ្ងៃអង្គារថា ក្រសួងមិនទាន់បានទទួលពាក្យបណ្តឹងណាមួយទាក់ទងនឹងបណ្តឹងការប៉ះពាល់ផលិតកម្មក្នុងស្រុកដោយសារការលក់បង្ខូចថ្លៃនៅឡើយ បន្ទាប់ពីច្បាប់នេះបានចូលជាធរមានរយៈពេល ១ ឆ្នាំមក។
ច្បាប់ស្ដីពីឧបាស្រ័យពាណិជ្ជកម្ម ត្រូវបានអនុម័តដោយសភា កាលពីខែតុលាមុន ដោយមានបំណងការពារ និង ជួយក្រុមហ៊ុនក្នុងស្រុក និងអន្តរជាតិដោយការប្រើប្រាស់វិធានការប្រឆាំងការលក់បង្ខូចតម្លៃ ទប់ស្កាត់ការនាំចូលទំនិញដោយ «ភាពមិនស្មោះត្រង់» និងការលក់ក្នុងតម្លៃទាបជាងតម្លៃធម្មតានៃប្រទេសផលិត។
ថ្លែងទៅកាន់ក្រុមអ្នកយកព័ត៌មាន នៅក្នុងសិក្ខាសាលាច្បាប់ឧបាស្រ័យពាណិជ្ជកម្ម នៅទីក្រុងភ្នំពេញ កាលពីថ្ងៃអង្គារ លោក តាន់ យុវរដ្ឋ អគ្គនាយករង នៃអគ្គនាយកដ្ឋាន ជំរុញពាណិជ្ជកម្មនៃក្រសួងពាណិជ្ជកម្ម និងក្រុមការងារបច្ចេកទេសតាក់តែងច្បាប់ឲ្យដឹងថា មកដល់ពេលនេះមិនមានករណីបណ្ដឹង ទាក់ទងនឹងបញ្ហានេះនៅឡើយទេ។
លោកបន្តថា អាចមានមូលហេតុសំខាន់ៗមួយចំនួន រួមមានការមិនយល់ដឹង ក្នុងចំណោមក្រុមហ៊ុន ដែលជាប់ទាក់ទងនឹងច្បាប់ដែលមានស្រាប់ និងការពិបាកក្នុងការចំណាយលើថ្លៃច្បាប់ ក៏ដូចជាការប្រឈមនៃការប្រមូលទិន្នន័យ និងភ័ស្ដុតាង នៅពេលក្រុមហ៊ុនចង់ប្ដឹង។
លោក យុវរដ្ឋ ថ្លែងថា៖ «បើយើងរកឃើញបណ្ដឹងត្រឹមត្រូវ និងមានការបង្ខូចតម្លៃដែលអាចធ្វើឲ្យប៉ះពាល់អវិជ្ជមានដល់ការផលិតក្នុងស្រុក យើងអាចបង្កើនពន្ធគយលើទំនិញ ដែលបង្ខូចតម្លៃនោះទៅក្នុងទីផ្សាររហូតដល់កម្រិតដែលបានកំណត់ដោយអង្គការពាណិជ្ជកម្មពិភពលោក»។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានឲ្យដឹងកាលពីម្សិលមិញថា ផលិតកម្មជ្រូកកម្ពុជាបានរងផលប៉ះពាល់ពីការបង្ខូចថ្លៃពីប្រទេសជិតខាង។
លោកថ្លែងថា៖ «បើច្បាប់នេះ ត្រូវបានអនុវត្តត្រឹមត្រូវ យើងមិនខ្លាចចំណាយលើថ្លៃច្បាប់ទេ ទោះបីជាវាមានតម្លៃខ្ពស់ក៏ដោយ ព្រោះពេលយើងទទួលរងផលប៉ះពាល់ធ្ងន់ធ្ងរ យើងខាតបង់ប្រាក់ច្រើន»។
លោកបានបញ្ជាក់ថា៖ «នៅពេលនេះ យើងមានច្បាប់ ប៉ុន្តែថា តើច្បាប់នេះមានប្រសិទ្ធភាពដូចម្ដេចនោះ? វានៅតែជាបញ្ហាមួយ»៕LA
