The Phnom Penh Post Search

Search form

Logo of Phnom Penh Post newspaper Phnom Penh Post - មន្ត្រី​បង្ហាញ​ពី​សុទិដ្ឋិ​និយម​ទោះ​បី​ការ​ចាប់​ផ្តើម​យឺត




មន្ត្រី​បង្ហាញ​ពី​សុទិដ្ឋិ​និយម​ទោះ​បី​ការ​ចាប់​ផ្តើម​យឺត

ដី​ស្រែ​កសិករ​នៅ ខេត្ត​តាកែវ ដែល​រង​ភាព​រាំង​ស្ងួត។
ដី​ស្រែ​កសិករ​នៅ ខេត្ត​តាកែវ ដែល​រង​ភាព​រាំង​ស្ងួត។ រូបថត Daniel Quinland

មន្ត្រី​បង្ហាញ​ពី​សុទិដ្ឋិ​និយម​ទោះ​បី​ការ​ចាប់​ផ្តើម​យឺត

ភ្នំពេញៈ ទោះ​បី​ជា​មាន​ការ​ពន្យារ​ពេល​ក្នុង​ការ​បង្ក​បង្កើន​ផល​សម្រាប់​រដូវ​វស្សា​ឆ្នាំ​នេះ​ក៏​ដោយ ក៏​មន្ដ្រី​កសិកម្ម​ថ្លែង​ថា ពួក​គេ​សង្ឃឹម​ថា នឹង​មាន​ទិន្នផល​កាន់​តែ​ខ្ពស់​នៅ​ឆ្នាំ​នេះ ដោយ​សារ​កម្រិត​ទឹក​បាន​ផ្ដល់​ភាព​អនុគ្រោះ​ជាង​ឆ្នាំ​មុន។

របាយ​ការណ៍​ចេញ​ផ្សាយ​ដោយ​ក្រសួង​កសិកម្ម រុក្ខា​ប្រមាញ់ និង​នេសាទ កាល​ពី​សប្ដាហ៍​មុន​បង្ហាញ​ថា ការ​បង្ក​បង្កើន​ផល​ស្រូវ​សម្រាប់​រដូវ​វស្សា​នេះ​កំពុង​មាន​ដំណើរការ​យឺត​ជាង​រដូវ​វស្សា​ឆ្នាំ​មុន​ដោយ​សារ​តែ​ទឹក​ជំនន់ និង​ភាព​រាំង​ស្ងួត​ដែល​បាន​កើត​ឡើង​ចាប់​ពី ខែ​មិថុនា ដល់ ខែ​សីហា។

របាយ​ការណ៍​សរសេរ​ថា មក​ដល់​ពេល​នេះ​មាន ៩២ ភាគ​រយ​នៃ​ផ្ទៃ​ដី​ធ្វើ​កសិកម្ម ៣ លាន​ហិកតា​ប៉ុណ្ណោះ​ត្រូវ​បាន​ដាំដុះ​សម្រាប់​ការ​បង្ក​បង្កើន​ផល​ស្រូវ​នៅ​រដូវ​វស្សា​នេះ ដែល​មាន​ការ​យឺត​យ៉ាវ​ជាង​កាល​ពី​រដូវ​វស្សា​ឆ្នាំ​មុន ដែល​មាន​ជាង ៩៨ ភាគ​រយ​នៃ​ផ្ទៃ​ដី​កសិកម្ម​សរុប​ត្រូវ​បាន​ដាំ​ដុះ​រួច​រាល់​ហើយ​នៅ​ពេល​ដូច​គ្នា​នេះ។

ក្រៅ​ពី​ការ​ពន្យារ​ពេល​នេះ មាន​ផ្ទៃ​ដី​ដាំ​ដុះ​ប្រហែល ១,៦ ភាគរយ​ត្រូវ​រង​ការ​ខូច​ខាត​បន្ទាប់​ពី​ទឹក​ជំនន់​រយៈ​ពេល​ខ្លី និង​ភាព​រាំង​ស្ងួត​កាល​ពី ខែ​មិថុនា ដល់ ខែ​សីហា ដែល​ធ្វើ​ឲ្យ​ប៉ះពាល់​ដំណាំ​ស្រូវ​នៅ​ខេត្ត​ជាច្រើន។

តាម​របាយ​ការណ៍​ភាព​រាំង​ស្ងួត​បាន​ធ្វើ​ឲ្យ​ប៉ះ​ពាល់​ដល់​ផ្ទៃ​ដី​ស្រែ ៩៦ ៥៣០ ហិកតា​នៅ​ក្នុង​ខេត្ត​ចំនួន ៨ ដែល​បណ្ដាល​ឲ្យ​មាន​ការ​ខូច​ខាត​ដល់​សន្ទូង ១៧ ៧៣៥ ហិកតា​ខណៈ​ទឹក​ជំនន់​បាន​ធ្វើ​ឲ្យ​ប៉ះ​ពាល់​ដល់​ដី​ស្រែ ៧៧ ១៤៧ ហិកតា ធ្វើ​ឲ្យ​សន្ទូង​ខូច​ខាត ២០ ៣១៦ ហិកតា​នៅ​ក្នុង​ខេត្ត​ចំនួន ១៤។

លោក ពេជ្រ រមនា អនុ​ប្រធាន​នាយកដ្ឋាន​ដំណាំ​ស្រូវ​របស់​ក្រសួង​កសិកម្ម បាន​ពន្យល់​ថា ការ​ដាំ​ដុះ​ស្រូវ​នៅ​រដូវ​វស្សា​នៅ​កម្ពុជា ជា​រៀងរាល់​ឆ្នាំ​ចាប់​ផ្ដើម​ពី ខែ​ឧសភា ដល់ ខែ​តុលា ហើយ​ក៏​ជា​ពេល​នៃ​ការ​ចាប់​ផ្តើម​ប្រមូល​ផល​ខ្លះៗ​ដែរ។ ប៉ុន្តែ​លោក​រំពឹង​ថា ការ​បង្ក​បង្កើន​ផល​ស្រូវ​នៅ​រដូវ​វស្សា​ឆ្នាំ​នេះ​នឹង​មាន​ភាព​ល្អ​ប្រសើរ​ជាង​រដូវ​មុនៗ​ដោយ​សារ​តែ​ទឹក​ជំនន់​រយៈ​ពេល​ខ្លី​បាន​នាំ​ដី​ដែល​មាន​ជីជាតិ​កាន់​តែ​ច្រើន​ទៅ​តំបន់​ដែល​បាន​រង​ផល​ប៉ះ​ពាល់។

លោក​បន្ត​ថា៖ «ទិន្នផល​បាន​ពី​ការ​បង្ក​បង្កើន​ផល​ស្រូវ​អាច​មាន​កាន់​តែ​ខ្ពស់​នៅ​ឆ្នាំ​នេះ​ដោយ​សារ​តែ​មាន​ទឹក​ភ្លៀង​គ្រប់​គ្រាន់​ចាប់​ពី ខែ​កញ្ញា ហើយ​ទឹក​ជំនន់​បាន​ស្រក​ចុះ​យ៉ាង​រហ័ស​បង្កើត​បាន​ជា​ផ្លូវ​ទឹក​គ្រប់​គ្រាន់​ទៅ​កាន់​ដី​ស្រែ​ដែល​ល្អ​សម្រាប់​សន្ទូង​រីក​លូត​លាស់​បាន»។

លោក ញ៉េប ស្រ៊ុន ប្រធាន​មន្ទីរ​កសិកម្ម ខេត្ត​តាកែវ ដែល​មាន​ផ្ទៃ​ដី​ស្រែ​ជាង ២៨០០០ ហិកតា​ត្រូវ​បាន​រង​ផល​ប៉ះ​ពាល់​ដោយ​ទឹក​ជំនន់ និង​ភាព​រាំង​ស្ងួត​ក្នុង​រយៈ​កាល​ពី​ពីរ​ខែ​មុន​ថ្លែង​ថា ការ​បង្ក​បង្កើន​ផល​ស្រូវ​នៅ​ក្នុង​ខេត្ត​របស់​លោក​ត្រូវ​បាន​រំពឹង​ថា នឹង​សម្រេច​បាន​តាម​ទិស​ដៅ​កំណត់។

លោក​បន្ត​ថា៖ «ក្នុង​ចំណោម​ផ្ទៃ​ដី ២៨ ០០០ ហិកតា​ដែល​បាន​រង​ផល​ប៉ះពាល់ មាន​ស្រូវ​ដែល​ខូច​ខាត​ទាំង​ស្រុង​ជិត ៩៦០ ហិកតា ហើយ​មាន​ទឹក​ភ្លៀង​គ្រប់​គ្រាន់​ចាប់​ពី ខែ​កញ្ញា បាន​អនុញ្ញាត​ឲ្យ​កសិករ​ស្ទូង​ស្រូវ​ឡើង​វិញ»។ លោក​ទទួល​ស្គាល់​ថា កង្វះ​ប្រព័ន្ធ​ធារាសាស្ដ្រ​ល្អ​នៅ​ក្នុង​ខេត្ត​នេះ​បាន​បង្ខំ​ឲ្យ​កសិករ​ត្រូវ​ពឹង​ផ្អែក​យ៉ាង​ខ្លាំង​លើ​ទឹក​ភ្លៀង។

លោក កេត លី កសិករ​នៅ ខេត្ត​តាកែវ ដែល​សន្ទូង​របស់​គាត់​រង​ការ​ខូច​ខាត​ដោយ​សារ​ភាព​រាំង​ស្ងួត​ថ្លែង​ថា លោក​កំពុង​ស្ទូង​ស្រូវ​ឡើង​វិញ​បន្ទាប់​ពី​ទឹក​ភ្លៀង​ធ្លាក់​ច្រើន​ពី​ដើម​ខែ​នេះ។

លោក​រំពឹង​ថា នឹង​អាច​ផលិត​ស្រូវ​ក្រអូប​បាន ១០ តោន​នៅ​លើ​ដី​ស្រែ​ចំនួន ៣ ហិកតា​នៅ​រដូវ​នេះ៕

អត្ថបទគួរចាប់អារម្មណ៍