The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​បាន​លើក​ឡើង​ជា​ថ្មី​ថា​កម្ពុជា​ទទួល​កំណើន​៧%

មន្ត្រី​បាន​លើក​ឡើង​ជា​ថ្មី​ថា​កម្ពុជា​ទទួល​កំណើន​៧%

មន្ត្រី​បាន​លើក​ឡើង​ជា​ថ្មី​ថា​កម្ពុជា​ទទួល​កំណើន​៧%

ភ្នំពេញៈ មន្ត្រី​កម្ពុជា​អះ​អាង​ជា​ថ្មី​ម្តង​ទៀត​ថា កំណើន​សេដ្ឋកិច្ច​កម្ពុជា​ឆ្នាំ​២០១៣ មាន​៧​ភាគ​រយ ទោះ​បី​មាន​ភាព​មិន​ប្រាកដ​ប្រជា​នៃ​សេដ្ឋកិច្ច​សកល ពិសេស​អាមេរិក និង​វិបត្តិ​បំណុល​នៅ​អឺរ៉ុប​ក៏​ដោយ។

អ៊ូ ព្រំវីរៈ អនុ​ប្រធាន​នាយក​ដ្ឋាន​លើក​កម្ពស់​ពាណិជ្ជកម្ម​នៃ​ក្រសួង​ពាណិជ្ជកម្ម​បាន​ឲ្យ​ដឹង​ថា សេដ្ឋកិច្ច​សកល​កំពុង​តែ​ងើប​ឡើង​វិញ ហើយ​សេដ្ឋកិច្ច​កម្ពុជា​បាន​ដំណើរ​ការ​យ៉ាង​ល្អ​កាល​ពី​ឆ្នាំ​មុន ហើយ​នឹង​នៅ​តែ​បន្ត​កំណើន​ដដែល​នៅ​ឆ្នាំ​នេះ។ លោក​ថ្លែង​នៅ​ឯ​សិក្ខាសាលា​ស្តីពី​ពាណិជ្ជកម្ម​កាល​ពី​ព្រឹកម្សិល​មិញ​ថា៖​«​ដោយ​មាន​កំណែ​ទម្រង់​ដ៏​រឹង​មាំ​របស់​រដ្ឋាភិបាល កំណើន​សេដ្ឋកិច្ច​របស់​កម្ពុជា​បាន​ងើប​ឡើង​វិញ​យ៉ាង​ឆាប់​រហ័ស​ពី​វិបត្តិ​សេដ្ឋកិច្ច​សកល​និង​រក្សា​កំណើន​៧​ភាគ​រយ​កាល​ពី​ឆ្នាំ​មុន ហើយ​នឹង​នៅ​តែ​រក្សា​នៅ​កម្រិត​ដដែល​ក្នុង​ឆ្នាំ​នេះ​»​។

ការ​នាំ​ចេញ​សម្លៀក​បំពាក់​វិស័យ​ទេសចរណ៍ កសិកម្ម និង​សំណង់​នៅ​តែ​បន្ត​កើន​ឡើង។ ស្ថានភាព​សេដ្ឋកិច្ច​សកល​នៅ​ចុង​២០១២​និង​២០១៣​នៅ​តែ​មាន​ហានិភ័យ​ខ្ពស់​ដែល​បណ្តាល​មក​ពី​វិបត្តិ​បំណុល​នៅ​អឺរ៉ុប និង​ការ​ងើប​ឡើង​វិញ​យឺតៗ​នៃ​សេដ្ឋកិច្ច​សហរដ្ឋ​អាមេរិក​។

លោក អ៊ូ ព្រំវីរៈ លើក​ឡើង​ថា ៖«​កត្តា​ទាំង​នេះ​នៅ​តែ​ប្រឈម​ចំពោះ​កម្ពុជា​ក្នុង​ការ​បង្កើន​ការ​នំា​ចេញ​និង​ទាក់​ទាញ​វិនិយោគ​ផ្ទាល់​ពី​បរទេស»។

ក្រសួង​សេដ្ឋកិច្ច និង​ហិរញ្ញវត្ថុ​កាល​ពី​ថ្ងៃ​ទី​១៨​ធ្នូ​បាន​បង្ហាញ​ពីការ​ព្យាករ​របស់​ខ្លួន​ថា កំណើន GDP របស់​កម្ពុជា​នឹង​ឈាន​ដល់​៧​ភាគ​រយ​នៅ​ឆ្នាំ​នេះ​។

កាល​ពី​សប្តាហ៍​មុន​មូលនិធិ​រូបិយវត្ថុ​អន្តរជាតិ​បាន​ព្យាករ​ថា ប្រទេស​កម្ពុជា​ត្រូវ​បាន​រំពឹង​ថា​នឹង​ទទួល​បាន​កំណើន​សេដ្ឋកិច្ច​៦,៧​ភាគ​រយ​នៅ​ឆ្នាំ​នេះ​៕CC

អត្ថបទគួរចាប់អារម្មណ៍