The Phnom Penh Post Search

Search form




Logo of Phnom Penh Post newspaper Phnom Penh Post - មាន​ការ​លើក​ឡើង​ថា ការ​ប្រើ​ដុល្លារ​ក្នុង​ការ​ជួញ​ដូរ​មូល​បត្រ​ អាច​ជួយ​ជំ​រុញ​ទី​ផ្សារ

មាន​ការ​លើក​ឡើង​ថា ការ​ប្រើ​ដុល្លារ​ក្នុង​ការ​ជួញ​ដូរ​មូល​បត្រ​ អាច​ជួយ​ជំ​រុញ​ទី​ផ្សារ

Content image - Phnom Penh Post
អេក្រង់​បង្ហាញ​ថ្លៃ​ភាគហ៊ុនជា​ប្រាក់​រៀល​​របស់​កំពង់ផែស្វយ័ត​ក្រុង​ព្រះសីហនុ ក្នុងពេល​បើក​ជួញដូរ​ដំបូង​​។ រូបថត ហេង ជីវ័ន

មាន​ការ​លើក​ឡើង​ថា ការ​ប្រើ​ដុល្លារ​ក្នុង​ការ​ជួញ​ដូរ​មូល​បត្រ​ អាច​ជួយ​ជំ​រុញ​ទី​ផ្សារ

ភ្នំពេញៈ ខណៈ​​ពេល​ដែល​ការ​បោះ​ផ្សាយ​សញ្ញា​ប័ណ្ណ​សា​ជីវ​កម្ម​គ្រោង​នឹង​ធ្វើ​ឡើង​ជា​លើក​ដំ​បូង​ក្នុង​ទី​ផ្សារ​មូល​បត្រ​របស់​កម្ពុជា​ក្នុង​​ឆ្នាំ​នេះ អ្នក​នៅ​ក្នុង​ឧស្សា​ហ​កម្ម​នេះ​បាន​ឲ្យ​ដឹង​ថា ការ​ប្រើ​ប្រាស់​ប្រាក់​ដុល្លារ​ក្នុង​ប្រតិ​បត្តិ​ការ​ជួញ​ដូរ​​នឹង​ជួយ​ជំ​រុញ​ឲ្យ​វិ​ស័យ​នេះ​កាន់​តែ​មាន​ភាព​រីក​ចម្រើន​លឿន​ជាង​នេះ។

ក្នុង​កិច្ច​ពិ​ភា​ក្សា​មួយ​ក្នុង​សិ​ក្ខា​សា​លា​ស្តី​ពី «ការ​យល់​ដឹ​ង​ពី​ទី​ផ្សារ​មូល​បត្រ​នៅ​កម្ពុជា» ដែល​រៀប​ចំ​ធ្វើ​ឡើង​កាល​ពី​ចុង​សប្តាហ៍​​មុន​នៅ​អគារ​​របស់​ក្រុម​ហ៊ុន​ផ្សារ​មូល​បត្រ​កម្ពុជា (CSX) លោក អុីវ រ៉ាណ្ណា​រិទ្ធ នា​យក​ប្រ​តិ​បត្តិ​ក្រុម​ហ៊ុន​មូល​បត្រ​​ RHB Indochina Securities Plc បាន​ថ្លែង​​​​ថា ការ​កំ​ណត់​យក​ប្រាក់​រៀល​​ក្នុង​ទី​ផ្សារ​មូល​បត្រ​កម្ពុជា​​ អាច​​​ជា​​បញ្ហា​ប្រ​ឈម​ដ៏​ធំ​មួយ​​​នា​ពេល​បច្ចុប្បន្ន​​​ដែល​​ធ្វើ​ឲ្យ​រាំង​ស្ទះ​ដល់​ការ​អភិវឌ្ឍ​វិ​ស័យ​មូល​បត្រ​នៅ​កម្ពុជា​។

លោក​បន្ថែម​ថា ​លោក​ធ្លាប់​បាន​ជ​ជែក​​ជា​មួយ​អ្នក​ជំ​នាញ​មូល​បត្រ​​នៅ​​ក្រៅ​បរ​ទេស​ ​​ហើយ​មាន​ការ​លើក​​ឡើង​​ថា ដោយ​សារ​​​កម្ពុជា​​ជា​ទី​ផ្សារ​​ប្រើ​ប្រាក់​ដុល្លារ​ច្រើន​ ដូច្នេះ​​​បើ​ទី​ផ្សារ​មូល​បត្រ​​កម្ពុជា​ប្រើ​ប្រាស់​ប្រាក់​ដុល្លារ​ កម្ពុជា​​នឹង​មាន​ឱ​កាស​រីក​ចម្រើន​លឿន ​ហើយ​អាច​ក្លាយ​ជា​ផ្សារ​មូល​ធន​​ប្រ​ចាំ​តំ​បន់​មួយ​ផង​ដែរ។

លោក​មាន​ប្រ​សាសន៍​​​ថា៖​ «កម្ពុជា​មាន​ភាព​ងាយ​ស្រួល​ក្នុង​ការ​អភិ​វឌ្ឍ​ទី​​ផ្សារ​មូល​បត្រ​របស់​ខ្លួន​ជា​ប្រាក់​ដុល្លារ​ជាង​គេ [ជាង​ទី​ផ្សារ​មូល​បត្រ​ផ្សេង​ទៀត] ព្រោះ​បច្ចុ​ប្បន្ន​​​ក្នុង​សេដ្ឋ​កិច្ច​កម្ពុជា​មាន​ប្រាក់​ដុល្លារ​​ច្រើន​ ខណៈ​ប្រ​ទេស​ផ្សេង​ៗ​ទៀត​មិន​មាន​ដូច​កម្ពុជា​ឡើយ​»។

លោក​បាន​បន្ថែម​ថា ខណៈ​​​ប្រាក់​បៀ​វត្សរ៍​​របស់​ប្រ​ជា​ជន​ខ្មែរ​ភាគ​ច្រើន​ជា​ដុល្លារ​ ដូច្នេះ​នៅ​ពេល​ដែល​ពួក​គាត់​​ចង់​វិ​និ​យោគ​គឺ​គាត់​តែង​តែ​ត្រូវ​ទៅ​ប្តូរ​យក​ជា​ប្រាក់​​រៀល​ជា​មុន​សិន​ ដែល​នេះ​ជា​ឧប​សគ្គ​មួយ​សម្រាប់​​វិ​និ​យោគ​ក្នុង​វិ​ស័យ​នេះ។

ស្រប​គ្នា​ទៅ​នឹង​ការ​លើក​ឡើង​នេះ​ដែរ​ លោក​ស្រី ហ៊ លី​គា ប្រ​ធាន​​នា​យក​ដ្ឋាន​ស្រាវ​ជ្រាវ​បណ្ដុះ​បណ្ដាល​អភិ​វឌ្ឍន៍​ទី​ផ្សារ​មូល​បត្រ និង​ទំ​នាក់​ទំ​នង​អន្ដរ​ជាតិ​នៃ​គណៈ​កម្ម​ការ​មូល​បត្រ​កម្ពុជា (SECC) បាន​ថ្លែង​ក្នុង​កិច្ច​ពិ​ភាក្សា​របស់​សិ​ក្ខា​សា​លា​នេះ​ថា កន្លង​​មក​​ស្ថា​ប័ន​ និង​ក្រុម​ហ៊ុន​មួយ​ចំ​នួន​​​ដែល​ចង់​ធ្វើ​ការ​​វិ​និ​យោគ​ក្នុង​ផ្សារ​មូល​បត្រ​កម្ពុជា ធ្លាប់​​បាន​លើ​ក​​​ឡើង​ពី​កង្វល់​របស់​ខ្លួន​ទាក់​ទង​​​នឹង​ការ​ប្រើ​​​ប្រាក់​រៀល​សម្រាប់​ការ​ទូ​ទាត់​​​ក្នុង​​​ប្រ​តិ​បត្តិ​ការ​​របស់​ខ្លួន​ផង​ដែរ ដោយ​​​​សារ​ប្រាក់​ចំ​ណូល​របស់​ពួក​គេ​​​ជា​​​ប្រាក់​ដុល្លារ។

លោក​ស្រី ហ៊ លីគា បាន​​បន្ថែម​ថា ​បច្ចុ​ប្បន្ន​ថ្នាក់​ដឹក​នាំ​​​ SECC​​​​ កំពុង​​លើក​បញ្ហា​នេះ​​ទៅ​ពិ​ភា​ក្សា​ជា​មួយ​ថ្នាក់​​ដឹក​នាំ​​ក្រ​សួង​សេដ្ឋ​កិច្ច និង​ហិ​រញ្ញ​វត្ថុ ​​​ដើ​ម្បី​សិ​ក្សា​ពី​លទ្ធ​ភាព​ក្នុង​ការ​ដាក់​​​ចេញ​នូវ​គោល​នយោបាយ​​​ជំ​រុញ​ឲ្យ​ក្រុម​ហ៊ុន​ដែល​ទទួល​​បាន​ចំ​ណូល​​ជា​ប្រាក់​ដុល្លារ​ ​អាច​ចូល​មក​វិ​និ​យោគ​ក្នុង​ផ្សារ​ហ៊ុន​កម្ពុជា​។

លោក​ស្រី​មាន​ប្រសាសន៍​ថា៖ «​បើ​យើង​​អាច​ដោះ​ស្រាយ​បញ្ហា​នេះ​បាន យើង​គិត​ថា​ ពួក​គាត់​នឹង​ចូល​រួម​ជា​មួយ​ទី​ផ្សារ​មូល​បត្រ​កម្ពុជា»។​​

ទោះ​ជា​យ៉ាង​ណា ការណ៍​ដែល​ចង់​ឲ្យ​មាន​ការ​ប្រើ​ប្រាក់​ដុល្លារ​ក្នុង​ប្រតិ​បត្តិ​ការ​ក្នុង​ផ្សារ​ហ៊ុន​នេះ​មាន​ភាព​ផ្ទុ​យ​​គ្នា​​ទៅ​នឹង​គោល​បំ​ណង​របស់​ធនា​គារ​ជាតិ​នៃ​កម្ពុជា (NBC) ដែល​ចង់​ឲ្យ​មាន​ការ​ប្រើ​ប្រាស់​ប្រាក់​រៀល​កាន់​តែ​ច្រើន​​ក្នុង​សេដ្ឋ​កិច្ច​ប្រ​ចាំ​ថ្ងៃ ហើយ​ការ​ប្រើ​ប្រាក់​រៀល​ក្នុង​ទី​ផ្សារ​មូល​បត្រ​ក៏​​ធ្វើ​ឡើង​ក្នុង​គោល​បំ​ណង​នេះ​​​ដែរ។

កាល​ពី​ចុង​ឆ្នាំ ២០១៦ ធនា​គារ​ជាតិ​បាន​ចេញ​ប្រ​កាស​មួយ ដោយ​ណែ​នាំ​ឲ្យ​ធនា​គារ​ពា​ណិជ្ជ និង​គ្រឹះ​ស្ថាន​មី​ក្រូ​ហិ​រញ្ញ​វត្ថុ​ទាំង​អស់​ យ៉ាង​​ហោច​ណាស់​​ត្រូវ​បញ្ចេញ​កម្ចី​ជា​ប្រាក់​រៀល​​​ឲ្យ​បាន ១០ ភាគ​រយ​នៃ​កម្ចី​សរុប​របស់​ខ្លួន ហើយ​ប្រ​កាស​នេះ​នឹង​ចូល​ជា​ធរ​មាន​នៅ​ចុង​ឆ្នាំ ២០​១៩។

តែ​លោក រ៉ាណ្ណា​រិទ្ធ បាន​កត់​សម្គាល់​ឃើញ​ថា ការ​ប្រើ​ប្រាក់​រៀល​ក្នុង​ប្រតិ​បត្តិ​ការ​ជួញ​ដូរ​មូល​បត្រ​​ហាក់​ដូច​ជា ​ពុំ​សូវ​ជួយ​​បាន​ច្រើន​ទេ​​ក្នុង​ការ​​ជំរុញ​ការ​ប្រើ​ប្រាស់​ប្រាក់​រៀល។

លោក​​​បន្ថែម​ថា​ ​បើ​រដ្ឋា​ភិ​បាល​ពិត​ជា​ចង់​លើក​​កម្ពស់​ការ​ប្រើ​​ប្រាក់​រៀល​មែន​ ហើយ​​ស្រប​ពេល​ជា​មួយ​គ្នា​នេះ​ដែរ​​ជួយ​​ជំ​រុញ​វិ​ស័យ​មូល​បត្រ​ផង​ដែរ​នោះ គួរ​តែ​មាន​ការ​​អនុ​វត្ត​តាម​វិ​ស័យ​ធនា​គារ ដោយ​ចាប់​ផ្តើម​ពី​ការ​​​ប្រើ​ប្រាក់​ដុល្លារ ហើយ​​ក្រោយ​មក​ប្តូរ​ទៅ​ប្រើ​​ប្រាក់រៀល​ជា​សន្សឹម​វិញ។

ទំ​នុក​ចិត្ត​លើ​ស្ថិរ​ភាព​ថ្លៃ​របស់​ប្រាក់​រៀល ក៏​អាច​ជា​កត្តា​មួយ​ដែល​រា​រាំង​បំ​ណង​វិ​និ​យោគ​របស់​វិ​និ​យោ​គិន​ធំ​ៗ​ផង​ដែរ។

លោក ល្មុន សូ​ឡី ប្រ​ធាន​នា​យក​ដ្ឋាន​ចុះ​បញ្ជី និង​ផ្តល់​ព័ត៌​មាន​នៃ​ផ្សារ​​មូល​បត្រ​កម្ពុជា (CSX) ​បាន​ថ្លែង​​​​កាល​ពី​ថ្ងៃ​ម្សិល​មិ​ល​​ថា ​បើ​អាជ្ញា​ធរ​អនុ​ញ្ញាត​ឲ្យ​មាន​ការ​ប្រើ​​ប្រាក់​ដុល្លារ​​​នោះ​​ ទី​ផ្សារ​មូល​បត្រ​កម្ពុជា​នឹង​អាច​​​​រីក​ចម្រើន​លឿន​ជាង​ពេល​នេះ​ ព្រោះ​បច្ចុ​ប្បន្ន​សា​ធារ​ណ​ជ​ន​ និង​ពិ​សេស​​​​អ្នក​វិ​និ​យោគ​ធំ​ៗ​​​នៅ​​​មិន​ទាន់​មាន​ទំនុក​​ចិត្ត​លើ​ស្ថិរ​ភាព​របស់​ប្រាក់​រៀល​ទាំង​ស្រុង​នោះ​ទេ​។

សំ​ដៅ​ដល់​ការ​បោះ​ផ្សាយ​សញ្ញា​បណ្ណ​សា​ជីវ​កម្ម​របស់​គ្រឹះ​ស្ថាន​មី​ក្រូ​ហិរ​ញ្ញវ​ត្ថុ​ហត្ថា​កសិ​ករ ដែល​គ្រោង​​ធ្វើ​ឡើង​​ក្នុង​ឆ្នាំ​នេះ លោក​​ថ្លែង​ថា៖ «​បើ​សញ្ញា​ប័ណ្ណ​មិន​អាច​បោះ​ផ្សាយ​ជា​​​ប្រាក់​​ដុល្លារ​បាន​ទេ ​ផ្សារ​ហ៊ុន​កម្ពុជា​​នឹង​ពិ​បាក​រីក​ចម្រើន​ណាស់»។

បើ​យោង​តាម​លោក សូឡី ស្ថាប័ន​ហិ​រញ្ញ​វត្ថុ​​ទាំង​អស់​សុទ្ធ​តែ​​​ចង់​ឲ្យ​មាន​ការ​​បោះ​ផ្សាយ​សញ្ញា​ប័ណ្ណ​​សា​ជីវ​កម្ម​ជា​ប្រាក់​ដុល្លារ ព្រោះ​ការ​បោះ​ផ្សាយ​សញ្ញា​ប័ណ្ណ​​តែង​តែ​មាន​ទំ​ហំ​ទឹក​ប្រាក់​ច្រើន ហើយ​ជា​ទូ​ទៅ​អ្នក​ទិញ​សញ្ញា​​ប័ណ្ណ​​​សុទ្ធ​តែ​ជា​អ្នក​មាន​ប្រាក់​ច្រើន​ឬ​ក្រុម​ហ៊ុន​ធំ​ៗ ជា​ពិ​សេស​ក្រុម​ហ៊ុន​ប​រ​​ទេស​​មិន​ចង់​ទិញ​ជា​ប្រាក់​រៀល​នោះ​ទេ។

លោក​បាន​បន្ថែម​ថា ការ​​បោះ​ផ្សាយ​ជា​ប្រាក់​ដុល្លារ​នឹង​ងាយ​ស្រួល​លក់ ហើយ​អត្រា​ការ​ប្រាក់​ដែល​ត្រូវ​បង់​ទៅ​ឲ្យ​អ្នក​ទិញ​ក៏​ទាប​ជាង​ការ​ទិញ​ជា​ប្រាក់​រៀល​ផង​ដែរ។

នា​ពេល​បច្ចុ​ប្បន្ន មាន​ក្រុម​ហ៊ុន​ចំ​នួន ៥ ដែល​បាន​ចុះ​បញ្ជី​ក្នុង​ក្រុមហ៊ុន​ផ្សារ​មូល​បត្រ​កម្ពុជា៕ LA

អត្ថបទគួរចាប់អារម្មណ៍