.jpg)
ប្រអប់ខ្មៅដែលរក្សាទិន្នន័យហោះហើររបស់ជើងហោះហើរក្រុមហ៊ុន Ethiopian Airlines។ រូបថត AFP
ក្រុងអាឌីសអាបេបាៈ រដ្ឋមន្ដ្រីក្រសួងដឹកជញ្ជូនរបស់ប្រទេស អេត្យូពី បានឲ្យដឹងកាលពីថ្ងៃអាទិត្យថា ទិន្នន័យប្រអប់ខ្មៅបានបង្ហាញពី «ភាពស្រដៀងគ្នាយ៉ាងច្បាស់» រវាងការធ្លាក់យន្តហោះរបស់ក្រុមហ៊ុន Ethiopian Airlines កាលពីថ្ងៃទី ១០ ខែនេះ និងការធ្លាក់យន្តហោះក្រុមហ៊ុន Lion Air របស់ឥណ្ឌូនេស៊ីកាលពីខែតុលា ឆ្នាំមុន។
លោកស្រី Dagmawit Moges បានប្រាប់ក្រុមអ្នកយកព័ត៌មាន ដោយមិនបានពន្យល់លម្អិតថា ភាពស្របគ្នានេះនឹង «ជាកម្មវត្ថុនៃការសិក្សាបន្ថែមទៀតក្នុងអំឡុងការស៊ើបអង្កេតនេះ»។
លោកស្រីឲ្យដឹងថា របាយការណ៍បឋមអំពីការធ្លាក់យន្តហោះរបស់ក្រុមហ៊ុន Ethiopian Airlines នៅថ្ងៃអាទិត្យ ដែលបានសម្លាប់មនុស្ស ១៥៧ នាក់ នឹងត្រូវចេញផ្សាយក្នុង «រយៈពេល ៣០ ថ្ងៃ»។
ជើងហោះហើរលេខ 302 របស់ក្រុមហ៊ុននេះបានធ្លាក់លើវាលស្រែស្ថិតនៅភាគអាគ្នេយ៍នៃទីក្រុងអាឌីសអាបេបា ប្រទេស អេត្យូពី រយៈពេលប៉ុន្មាននាទីបន្ទាប់ពីហោះឡើងឆ្ពោះទៅកាន់ទីក្រុងណៃរ៉ូប៊ី ប្រទេស កេនយ៉ា ដែលសម្លាប់មនុស្សទាំងអស់នៅលើយន្តហោះ និងឈានទៅដល់ការហាមឃាត់យន្តហោះ 737 MAX 8 របស់ក្រុមហ៊ុន Boeing ទូទាំងពិភពលោកមិនឲ្យហោះឡើង។
សូម្បីតែមុនពេលទិន្នន័យប្រអប់ខ្មៅត្រូវបានរកឃើញ ប្រទេស និងក្រុមហ៊ុនអាកាសចរណ៍ជាច្រើនបានសន្និដ្ឋានលើភាពស្រដៀងគ្នារវាងការធ្លាក់យន្តហោះនៅប្រទេស អេត្យូពី និងធ្លាក់យន្តហោះនៅប្រទេស ឥណ្ឌូនេស៊ី ដើម្បីបញ្ជាឲ្យយន្តហោះម៉ូដែលនេះរបស់ក្រុមហ៊ុន Boeing បញ្ឈប់សេវាទូទាំងពិភពលោក។
យន្តហោះទាំង ២ តាមការរាយការណ៍បានធ្វើការហោះឡើងហើយធ្លាក់ចុះវិញក្នុងល្បឿនលឿនមិនប្រក្រតី ព្រមទាំងល្បឿនហោះហើរប្រែប្រួល មុនពេលធ្លាក់ភ្លាមៗបន្ទាប់ពីការហោះឡើង។
សំណួរជាច្រើនបានសំដៅដល់ប្រព័ន្ធប្រឆាំងការរលត់ម៉ាស៊ីនដោយស្វ័យប្រវត្តិ ដែលប្រើនៅលើយន្តហោះ 737 MAX 8 ដែលបង្កើតឡើងដើម្បីឲ្យប្រព័ន្ធនេះចង្អុលបង្ហាញដោយស្វ័យប្រវត្តិថាយន្តហោះកំពុងដាំក្បាលចុះក្រោម បើយន្តហោះនេះស្ថិតក្នុងគ្រោះថ្នាក់ ឬរលត់ម៉ាស៊ីន។
ក្នុងករណីជើងហោះហើររបស់ក្រុមហ៊ុន Ethiopian ប្រអប់ខ្មៅនេះត្រូវបានប្រគល់ឲ្យទីភ្នាក់ងារសុវត្ថិភាពផ្លូវអាកាស BEA របស់ប្រទេស បារាំង ដែលកំពុងធ្វើការងារជាមួយនឹងក្រុមអ្នកស៊ើបអង្កេតអាមេរិក និងអេត្យូពី ដើម្បីកំណត់អ្វីដែលបានបណ្ដាលឲ្យយន្តហោះធ្លាក់៕ AFP/LA
