The Phnom Penh Post Search

Search form




Logo of Phnom Penh Post newspaper Phnom Penh Post - មាន​ក្រុម​ហ៊ុន​ជាច្រើន​កំពុង​សម្លឹង​រក​ការ​ចុះ​បញ្ជី​ក្នុង​ផ្សារ​ហ៊ុន​កម្ពុជា

មាន​ក្រុម​ហ៊ុន​ជាច្រើន​កំពុង​សម្លឹង​រក​ការ​ចុះ​បញ្ជី​ក្នុង​ផ្សារ​ហ៊ុន​កម្ពុជា

មាន​ក្រុម​ហ៊ុន​ជាច្រើន​កំពុង​សម្លឹង​រក​ការ​ចុះ​បញ្ជី​ក្នុង​ផ្សារ​ហ៊ុន​កម្ពុជា

ភ្នំពេញៈ មន្ដ្រី​ផ្សារ​ហ៊ុន​បាន​ឲ្យ​ដឹង​កាល​ពី​ម្សិល​មិញ​ថា ក្រុម​ហ៊ុន​ជាច្រើន​កំពុង​សម្លឹង​មើល​ការ​ចុះ​បញ្ជី​ក្នុង​ផ្សារ​ហ៊ុន​កម្ពុជា បន្ទាប់​ពី​កិច្ច​ប្រជុំ​មួយ​ជាមួយ​ក្រុម​ហ៊ុន​ធំៗ​មួយ​ចំនួន​របស់ កម្ពុជា។

តាម​ក្រុម​ហ៊ុន​ផ្សារ​មូលបត្រ​កម្ពុជា (CSX) មាន​ក្រុម​ហ៊ុន​ប្រហែល ៣០ កំពុង​សម្លឹង​មើល​ការ​ចុះ​បញ្ជី​ដែល​រាប់​ចាប់​ពី​ធនាគារ​ពាណិជ្ជកម្ម​បរទេស ដល់​ក្រុម​ហ៊ុន ប៊ុណ្ណា រៀលធី​គ្រុប ហើយ​សូម្បី​តែ​សណ្ឋាគារ Frangipani Villa Hotel បាន​ចូល​រួម​ក្នុង​កិច្ច​ប្រជុំ​នេះ​ក៏​មាន​បំណង​ដែរ។

លោក​ស្រី សុខ វ៉ាន់នី ប្រធាន​ស្ដីទី​ការ​ចុះ​បញ្ជី និង​ឯកសារ​ផ្ដល់​ព័ត៌មាន​របស់ CSX បដិសេធ​បញ្ជាក់​ឈ្មោះ​របស់​ក្រុម​ហ៊ុន​ផ្សេង​ទៀត៖ «អ្នក​ខ្លះ​ប្រាប់​ខ្ញុំ​ថា ពួក​គេ​បាន​ជជែក​ពី​រឿង​នេះ​រួច​រាល់​ហើយ ហើយ​កំពុង​តែ​ចរចា​ជាមួយ​ភាគី​ពាក់​ព័ន្ធ»។

ទោះ​បី​លោក​ស្រី វ៉ាន់នី ថា លោក​ស្រី​មិន​ទាន់​បាន​ទទួល​ឯកសារ​ច្បាស់​លាស់​ពី​ការ​អះអាង​ពី​អ្នក​ចូល​រួម​ថា ពួក​គេ​នឹង​ចុះ​បញ្ជី​ក៏​ដោយ ក៏​ប្រធាន​ស្ដីទី​រូប​នេះ​មាន​ទំនុក​ចិត្ត​ថា​កិច្ច​ប្រជុំ​នេះ​ទទួល​បាន​ផ្លែ​ផ្កា ជាមួយ​នឹង​ការ​រំពឹង​ទុក​របស់ CSX ថា យ៉ាង​ហោច​ណាស់​ក៏​មាន IPO ច្រើន​ជាង ១ នៅ​ឆ្នាំ​នេះ​ដែរ។

លោក​ស្រី​បញ្ជាក់​ថា៖ «ពេល​នេះ​យើង​កំពុង​ធ្វើ​ការងារ​ជាមួយ​ក្រុម​ហ៊ុន​មួយ​ក្នុង​ឧស្សាហកម្ម​កាត់​ដេរ [ហើយ​យើង​ត្រូវ​បាន] កំណត់​ពេល​វេលា​ដើម្បី​ទទួល​ការ​ដាក់​ពាក្យ​សុំ​ពីរ​បន្ថែម​ទៀត​នៅ​ឆ្នាំ​នេះ»។

ប៉ុន្តែ​ចំពោះ​អ្នក​ចូល​រួម​ដែល ភ្នំពេញ ប៉ុស្ដិ៍ បាន​សួរ​កាល​ពី​ម្សិល​មិញ គឺ​ថា​ការ​ធ្វើ IPO មួយ​គឺ​នៅ​តែ​ស្ថិត​លើ​ផ្លូវ​មួយ​ដ៏​វែង​ឆ្ងាយ។

លោក គួច ម៉េងលី ជា​ស្ថាបនិក​វិទ្យាស្ថាន​អន្តរ​ទ្វីប​អាមេរិកាំង ជា​ក្រុម​ហ៊ុន​ផ្ដល់​សេវា​អប់រំ​ដែល​បាន​បញ្ជូន​តំណាង​ចូល​រួម​នៅ​ក្នុង​កិច្ច​ប្រជុំ​នេះ​បាន​ថ្លែង​ថា ក្រុម​ហ៊ុន​របស់​លោក​មិន​មាន​ផែនការ​បន្ទាន់​ក្នុង​ការ​ចុះ​បញ្ជី​នោះ​ទេ។ លោក​ថ្លែង​ថា៖ «យើង​នឹង​សម្លឹង​មើល​នៅ​ក្នុង​ពេល​អនាគត ប៉ុន្តែ​ពេល​នេះ​យើង​គ្រាន់​តែ​សាក​សួរ​ប៉ុណ្ណោះ»។

លោក ម៉ុង ឫទ្ធី អគ្គ​នាយក និង​ជា​ប្រធាន​ក្រុម​ហ៊ុន ម៉ុង ឫទ្ធី គ្រុប ជា​ក្រុម​ហ៊ុន​កសិកម្ម​កម្ពុជា​ឈាន​មុខ​គេ បាន​ថ្លែង​ថា បើ​តម្រូវ​ឲ្យ​ចុះ​បញ្ជី ក្រុម​ហ៊ុន​លោក​នឹង​មិន​ចុះ​បញ្ជី​នៅ​លើ​ផ្សារ​ហ៊ុន​នេះ​ក្នុង​ពេល​ឆាប់​ទេ។

លោក​បាន​បញ្ជាក់​ថា៖ «ដូច​ដែល​អ្នក​ដឹង​ហើយ ដើម្បី​ចុះ​បញ្ជី​បាន យើង​ត្រូវ​ការ​ពេល​វេលា ដោយ​សារ​តែ​អ្វីៗ​គ្រប់​យ៉ាង​ត្រូវ​តែ​ស្អាត នៅ​ពេល​នេះ​មិន​មែន​ជា​ពេល​វេលា​ត្រឹម​ត្រូវ​នោះ​ទេ»។

ខណៈ​គ្រឹះស្ថាន​មីក្រូ​ហិរញ្ញវត្ថុ ស្ថាបនា កំពុង​សម្លឹង​មើល IPO ដ៏​មាន​សក្ដានុពល​នៅ​ថ្ងៃ​ណា​មួយ​លោក ប៊ុន មុនី បាន​ថ្លែង​ថា វា​ជា​ការ​ស្នើ​សុំ​ដែល​នៅ​តែ​ចាំ​បាច់​ត្រូវ​អនុម័ត​ដោយ​ភាគទុនិក​របស់​ក្រុម​ហ៊ុន។

លោក​ថ្លែង​ថា៖ «យើង​មិន​បាន​គិត​អំពី​វា​នៅ​ឡើយ​ទេ ដោយ​សារ​តែ​វា​ពឹង​ផ្អែក​ទាំង​ស្រុង​លើ​ភាគទុនិក​របស់​យើង»។

ចាប់​តាំង​ពី​ការ​ចាប់​ផ្ដើម​ដំណើរ​ការ​កាល​ពី ឆ្នាំ​២០១១ CSX មាន​ដំណើរការ​យឺត​ក្នុង​ការ​ទាក់​ទាញ​ក្រុម​ហ៊ុន​ឲ្យ​ចុះ​បញ្ជី។

កាល​ពី​ខែ​មុន​រោង​ចក្រ​កាត់​ដេរ Grand Twins International (GTI) បាន​ក្លាយ​ជា​ក្រុម​ហ៊ុន​ទី​ពីរ​ដែល​បាន​ចុះ​បញ្ជី​នៅ CSX បន្ទាប់​ពី​រដ្ឋាករ​ទឹក​ស្វយ័ត ក្រុង​ភ្នំពេញ៕

អត្ថបទគួរចាប់អារម្មណ៍