តម្លៃមាសបានកើនឡើងរហូតដល់ ២ ០៧៤ ដុល្លារក្នុង ១ អោនស៍នៅត្រីមាសទី ៣ នៃឆ្នាំ ២០២០ នេះដែលជាតម្លៃខ្ពស់បំផុតក្នុងកំណត់ត្រាប្រវត្តិសាស្ត្រ ដោយបានបំបែកកំណត់ត្រាចាស់ក្នុងខែកញ្ញា ឆ្នាំ ២០១១ ជាមួយនឹងតម្លៃ ១ ៩២១ ដុល្លារក្នុង ១ អោនស៍ ឬស្មើនឹង ២ ៣១៤ ដុល្លារ ក្នុង ១ តម្លឹងនៅក្នុងទីផ្សារមាសកម្ពុជា។
ទោះបីជាតម្រូវការមាសនៅលើពិភពលោកបានធ្លាក់ចុះរហូតដល់ ១១% ក្នុងត្រីមាសទី ២ ក៏ដោយ ក៏តម្លៃមាសនៅតែបន្តហក់ឡើង ដោយសារសហរដ្ឋអាមេរិកកំពុងរងនូវវិបត្តិសេដ្ឋកិច្ច ដែលបណ្ដាលមកពីការរីករាលដាលខ្លាំងនៃជំងឺកូវីដ ១៩។
ស្របពេលជាមួយគ្នានេះមហាសន្និបាត Jackson Hole ប្រចាំឆ្នាំរបស់ធនាគារកណ្តាលអាមេរិកដែលមានការចូលរួមពីប្រទេសមហាអំណាចដែរនោះ បានបញ្ចប់កាលពីចុងសប្តាហ៍មុន ដោយគ្មានដំណោះស្រាយប្រកបដោយប្រសិទ្ធភាពពីអាជ្ញាធររូបិយវត្ថុទូទាំងពិភពលោកនៅឡើយទេ លើការរៀបចំផែនការគោលនយោបាយធានានូវស្ថិរភាពហិរញ្ញវត្ថុ និងកាត់បន្ថយការធ្លាក់ចុះជាអតិបរមានៅក្នុងប្រព័ន្ធហិរញ្ញវត្ថុ។
ក្នុងនោះដែរ ធនាគារកណ្តាលសហគមន៍អឺរ៉ុបបានបង្ហាញនូវរបាយការណ៍របស់ខ្លួនស្តីអំពីស្ថានភាពបច្ចុប្បន្នដែលងាយនឹងធ្លាក់ចូលក្នុងវិបត្តិសេដ្ឋកិច្ចដ៏ធ្ងន់ធ្ងរមួយ។ ដូចគ្នាដែរ សហរដ្ឋអាមេរិកបានបង្ហាញថា ទីផ្សារហិរញ្ញវត្ថុរបស់ខ្លួននៅតែបន្ដស្ថិតក្នុងស្ថានភាពយ៉ាប់យ៉ឺនដដែល ប៉ុន្តែប្រទេសមហាអំណាចមួយនេះ រំពឹងថាការអនុវត្តនូវគោលនយោបាយផ្តល់នូវអត្រាការប្រាក់កម្រិតទាបក្នុងរយៈពេលយូរអាចនឹងប៉ះប៉ូវនូវផលអវិជ្ជមាននេះបាន ខណៈដែលផែនការនៃការកំណត់នូវអតិផរណា ២% ដើម្បីរក្សានូវស្ថិរភាពសេដ្ឋកិច្ចនឹងត្រូវបានទុកមួយឡែកសិន។
តម្លៃនៃប្រាក់ដុល្លារអាមេរិកនឹងមានការប្រែប្រួលបន្តទៀត ស្របតាមការចេញផ្សាយនៅថ្ងៃសុក្រសប្ដាហ៍នេះនៃព័ត៌មានអាមេរិកសំខាន់ៗដូចជា៖ ប្រាក់ចំណូលជាមធ្យមក្នុង ១ ម៉ោងការផ្លាស់ប្តូរការងារមិនមែនកសិកម្ម និងអត្រាគ្មានការងារធ្វើជាដើម។
ដូច្នេះជាការវិភាគតម្លៃមាសអាចនឹងមានការកើនឡើងពីតម្លៃបច្ចុប្បន្នក្នុង ១ ៩៧២ ដុល្លារ ដល់ ២ ០៣០ ដុល្លារ ក្នុង ១ អោនស៍នៅដើមខែកញ្ញានេះ៕