ភ្នំពេញៈ មូលនិធិនវានុវត្តន៍ឌីជីថលរបស់ក្រុមហ៊ុនស្មាត (SADIF) បានប្រកាសពីការវិនិយោគនៅក្នុងក្រុមហ៊ុន Okra Solar ជាក្រុមហ៊ុនក្នុងស្រុកផ្នែកសូហ្វវែរ ថាមពលសូឡា និងក្រុមហ៊ុន Sousdey Cambodia ដែលជាក្រុមហ៊ុនទីផ្សារឌីជីថល។
Okra គឺជាក្រុមហ៊ុនសេវាផ្អែកលើអ៊ីនធឺណិត (IoT) ដែលជួយដល់សហគមន៍នៅជនបទក្នុងការទទួលបានបច្ចេកវិទ្យាសូឡាក្នុងតម្លៃសមរម្យដោយប្រើបច្ចេកវិទ្យាថាមពលដែលបានចែកចាយជាទូទៅ។
លោក Afnan Hannan សហស្ថាបនិកក្រុមហ៊ុន Okra និយាយថា ការតភ្ជាប់គឺមានសារៈសំខាន់នៅក្នុងការប្រមូលទិន្នន័យ និងផ្ញើការគ្រប់គ្រងដើម្បីធានាថា សហគមន៍មានលទ្ធភាពប្រើប្រាស់ថាមពល។
លោកថ្លែងថា៖ «យើងមានក្តីរំភើបយ៉ាងខ្លាំងក្នុងការទទួលបានការគាំទ្រពី SADIF។ វាជាជម្រើសបែបធម្មជាតិក្នុងការសហការជាមួយ Smart ដូចដែលយើងបានប្រើប្រាស់ការតភ្ជាប់បណ្តាញរួចហើយដើម្បីគ្រប់គ្រង និងត្រួតពិនិត្យ IoT របស់យើង»។
កម្មវិធីនេះ អាចធ្វើឲ្យបន្ទះស្រូបពន្លឺព្រះអាទិត្យ និងអាគុយ តភ្ជាប់ទៅនឹង smart microgrids សម្រាប់ផ្តល់ឲ្យគ្រួសារនៅតំបន់ដាច់ស្រយាលបាននូវអគ្គិសនីប្រើប្រាស់។
បច្ចុប្បន្ន Okra បានផ្តល់អគ្គិសនីទៅដល់ប្រជាជនជាង ៥០០ នាក់ និងផ្ទះជាង ៥០០ ខ្នងនៅកម្ពុជា។ នេះបើតាមសេចក្តីប្រកាសព័ត៌មាន។
លោក Thomas Hundt នាយកប្រតិបត្តិក្រុមហ៊ុន Smart Axiata និយាយថា លោកថ្លែងថា៖ «ភាពខុសប្លែកនៃបច្ចេកវិទ្យា និងគំរូអាជីវកម្មរបស់ Okra មានសមត្ថភាពក្នុងការផ្តល់ និងឆ្លើយតបជាវិជ្ជមានដល់អ្នករស់នៅតាមតំបន់ដែលមិនមានខ្សែបណ្តាញអគ្គិសនីទៅដល់»។
ក្នុងដំណាក់កាលនៃការបណ្តាក់ទុននេះ SADIF ក៏បានសហការវិនិយោគជាមួយមូលនិធិ Schneider Energy Accessផងដែរ។មុនពេលមានការផ្តល់មូលនិធិរបស់ SADIF ក្រុមហ៊ុន Okra ទទួលបានការគាំទ្រពីអង្គការសំខាន់ៗដូចជា UKAid និង SNV Netherlands Development Organization។
លោក Djibril Cisse ស្ថាបនិក និងជានាយកប្រតិបត្តិក្រុមហ៊ុន Sousdey Cambodia បាននិយាយថាមូលនិធិពី SADIF នឹងគាំទ្រច្រើនទៅដល់កម្មវិធីការអភិវឌ្ឍ ខណៈក្រុមហ៊ុនកំពុងខិតខំផ្នែកលក់ និងទីផ្សារដើម្បីពង្រីកការផលិត។ លោកបន្តថា៖ «Sousdey ទន្ទឹងរង់ចាំសហការជាមួយ Smart, Forte និងMSP ដើម្បីជួយដល់សហគ្រាស និងបង្កើតផលិតផលសហគ្រាសលំដាប់ថ្នាក់ពិភពលោក»។
SADIF ជាមូលនិធិទុនវិនិយោគឌីជីថលដំបូងគេនៅកម្ពុជាគ្រប់គ្រងដោយ Mekong Strategic Partners ដោយមានការវិនិយោគពី Smart និង ក្រុមហ៊ុនធានារ៉ាប់រង Forte៕