ក្រុងតេអេរ៉ង់ៈ លោក Ali Khamenei ដែលជាមេដឹកនាំសាសនា និងនយោបាយកំពូលរបស់ប្រទេស អ៊ីរ៉ង់ បានហៅផលលំបាកផ្នែកសេដ្ឋកិច្ចរបស់អ៊ីរ៉ង់ថាជាបញ្ហាសំខាន់ និងបន្ទាន់បំផុតរបស់ប្រទេសនៅក្នុងសារមួយដែលត្រូវបានចាក់ផ្សាយនៅលើទូរទស្សន៍រដ្ឋកាលពីថ្ងៃព្រហស្បតិ៍ម្សិលមិញ។
ប្រទេស អ៊ីរ៉ង់ បានប្រឈមនឹងផលលំបាកផ្នែកសេដ្ឋកិច្ចកាន់តែខ្លាំងឡើងក្នុងរយៈពេល ១២ ខែចុងក្រោយនេះ ដែលបានកើតមានកាន់តែអាក្រក់ឡើងបន្ទាប់ពីលោកប្រធានាធិបតីអាមេរិក ដូណាល់ ត្រាំ បានដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ ២០១៥ រវាងប្រទេស អ៊ីរ៉ង់ និងប្រទេសមហាអំណាចពិភពលោកកាលពីខែ ឧសភា ឆ្នាំមុន។
ការដាក់ទណ្ឌកម្មឡើងវិញពីសំណាក់សហរដ្ឋអាមេរិក ដែលកន្លងមកត្រូវបានបន្ធូរបន្ថយជាថ្នូរនឹងការទប់ស្កាត់កម្មវិធីនុយក្លេអ៊ែររបស់ទីក្រុងតេអេរ៉ង់នោះ បានបង្កើតឲ្យមានរលកដ៏អាក្រក់បោកបក់មកលើសេដ្ឋកិច្ចរបស់ប្រទេសអ៊ិស្លាមមួយនេះ។
លោក Khamenei បានឲ្យដឹងនៅក្នុងសារមួយដែលត្រូវបានថតទុកដើម្បីចាក់បញ្ចាំងតាមទូរទស្សន៍សម្រាប់ការប្រារព្ធពិធីនៃការចាប់ផ្តើមឆ្នាំថ្មីរបស់អ៊ីរ៉ង់ (២១ មីនា ឆ្នាំ ២០១៩ ដល់ ២០ មីនា ឆ្នាំ ២០២០) ថា៖ «ជាពិសេសក្នុងពេលប៉ុន្មានខែថ្មីៗនេះ ផលលំបាកសម្រាប់ជីវភាពរស់នៅរបស់ប្រជាជនបានកើនឡើង»។
លោកថ្លែងថា៖ «សេដ្ឋកិច្ចជាបញ្ហាបន្ទាន់របស់ប្រទេស។ វាជាបញ្ហាធ្ងន់ធ្ងរ (បំផុត) និងចម្បងរបស់ប្រទេស»។ លោកបានបន្ថែមថា ការទម្លាក់ថ្លៃរូបិយប័ណ្ណជាតិ ដែលជាការធ្លាក់ចុះអំណាចទិញ និងការធ្លាក់ចុះផលិតកម្មគឺជាសញ្ញានៃការកើតមានបញ្ហា។
លោក Khamenei ថ្លែងថា ការកើនឡើងផលិតកម្មជាគន្លឹះចំពោះការសង្គ្រោះសេដ្ឋកិច្ច ហើយលោកបានប្រកាសឃ្លា «ផលិតកម្មជាតិ» ថាជាបាវចនាសម្រាប់ឆ្នាំថ្មីនេះ។
មូលនិធិរូបិយវត្ថុអន្តរជាតិ (IMF) បានរាយការណ៍ថា សេដ្ឋកិច្ចអ៊ីរ៉ង់បានធ្លាក់ចូលក្នុងការដើរថយក្រោយនៃសេដ្ឋកិច្ចនៅឆ្នាំ ២០១៨ និងបានព្យាករថានឹងធ្លាក់ចុះ ៣,៦ ភាគរយសម្រាប់ឆ្នាំ ២០១៩ នេះ។
លោក Hassan Rouhani ប្រធានាធិបតីអ៊ីរ៉ង់ ក៏បានផ្តោតការយកចិត្តទុកដាក់ផងដែរលើការដាក់ទណ្ឌកម្មរបស់អាមេរិកនៅក្នុងសារឆ្នាំថ្មីរបស់លោកដែលបានផ្សព្វផ្សាយនៅលើទូរទស្សន៍រដ្ឋភ្លាមៗបន្ទាប់ពីសាររបស់លោក Khamenei៕ AFP/KC