The Phnom Penh Post Search

Search form




Logo of Phnom Penh Post newspaper Phnom Penh Post - មេធាវី អឹមហ្វូន ស្នើតុ​លាការ​បង្កើន​ល្បឿន

មេធាវី អឹមហ្វូន ស្នើតុ​លាការ​បង្កើន​ល្បឿន

មេធាវី អឹមហ្វូន ស្នើតុ​លាការ​បង្កើន​ល្បឿន

140110_12
អតីតការិយាល័យអឹមហ្វូន នៅតាមផ្លូវមុនីវង្ស ហេង ជីវ័ន

ភ្នំពេញៈ មេធាវី​របស់​ក្រុមហ៊ុន អឹមហ្វូន ដែល​ជា​ក្រុមហ៊ុន​ទូរគមនាគមន៍​ក្ស័យធន​នៅ កម្ពុជា កាល​ពី​ថ្ងៃ ព្រហស្បតិ៍​បាន​ផ្ញើ​លិខិត​មួយ​ទៅ​សាលា​ដំបូង​រាជធានី​ភ្នំពេញ ដើម្បី​ពន្លឿន​ការងារ​លើ​ពាក្យ​បណ្ដឹង​ប្រឆាំង​នឹង​កូន​បំណុល​របស់​ក្រុមហ៊ុន​ចំនួន ៤។

លោក ខាន់ សេរីវុទ្ធី អ្នក​ប្រឹក្សា​យោបល់​ផ្នែក​ច្បាប់​ជាន់​ខ្ពស់​របស់​លោក អ៊ុក រី ជា​អភិបាល​បណ្ដោះ​អាសន្ន​របស់​ក្រុមហ៊ុន អឹមហ្វូន និយាយ​ថា៖ «ខ្ញុំ​ដាក់​លិខិត​នៅ​ថ្ងៃ​នេះ [ថ្ងៃ​ព្រហស្បតិ៍] ប្រឆាំង​នឹង​កូន​បំណុល​ពីរ គឺ​ក្រុមហ៊ុន មិត្តហ្វូន គ្រប់​គ្រង​ដោយ​វិនិយោគិន វៀតណាម និង​ក្រុមហ៊ុន Royal Telecom International ដោយ​សារ​តែ​តុលាការ​មិន​បាន​ពន្លឿន​ដំណើរការ​លើ​បណ្ដឹង​នេះ»។

លោក អ៊ុក រី និយាយ​ថា កូន​បំណុល​ទាំង ៤ បាន​ជំពាក់​ប្រាក់​ក្រុមហ៊ុន អឹមហ្វូន ប្រហែល ៧០ ម៉ឺន ដុល្លារ «ពេល​នេះ​ពួក​គេ​កំពុង​ចរចា​ជាមួយ​យើង។ ពេល​យើង​ទទួល​បាន​ប្រាក់​នេះ​យើង​នឹង​សង​ឲ្យ​កម្មករ​ជា​អាទិភាព​របស់​យើង»។

លោក សេរីវុទ្ធី បាន​និយាយ​ថា ក្រុមហ៊ុន មិត្តហ្វូន បាន​ជំពាក់​ប្រាក់ ៥៥២ ៤៥២,៨២ ដុល្លារ​អាមេរិក ក្រុមហ៊ុន Royal Telecom International ជំពាក់​ចំនួន ៤៦ ៧៥៣,៤៧ ដុល្លារ Wing ផ្ទេរ​ប្រាក់​ជំពាក់ ១៣១ ៨៤៧ ដុល្លារ និង​ក្រុមហ៊ុន Tecoteth ជំពាក់ ៩៧ ៩១០ ដុល្លារ។

លោក​និយាយ​ថា ក្រុមហ៊ុន អឹមហ្វូន បាន​លក់​បណ្ដា​ទ្រព្យ​សកម្ម​សំខាន់ៗ​របស់​ខ្លួន​ឲ្យ​ក្រុមហ៊ុន Khmer Unity Network Communicate Co.Ltd គ្រប់​គ្រង​ដោយ​វិនិយោគិន ចិន មាន​តម្លៃ ៩,៩ លាន​ដុល្លារ។ ប៉ុន្តែ​លោក​អះអាង​ថា រហូត​មក​ដល់​ពេល​នេះ​ក្រុមហ៊ុន​បាន​ទូទាត់​ប្រាក់​បាន​តែ ២,៦ លាន​ដុល្លារ​ប៉ុណ្ណោះ។

លោក​លើក​ឡើង​ថា៖ «បច្ចុប្បន្ន​ក្រុមហ៊ុន ចិន ត្រូវ​បាន​ពន្យារ​ពេល​ការ​ទូទាត់​ប្រាក់​របស់​ខ្លួន​សម្រាប់​យើង ខណៈ​យើង​បាន​ផ្ញើ​វិក្កយបត្រ​ពីរ​សន្លឹក​ដល់​ពួកគេ។ យើង​ចង់​ឲ្យ​ពួកគេ​បង្កើន​ល្បឿន​ក្នុង​ការ​ទូទាត់​ប្រាក់​របស់​ពួកគេ​ផង​ដែរ»។

បច្ចុប្បន្ន ក្រុមហ៊ុន អឹមហ្វូន បាន​ជំពាក់​ប្រាក់​ក្រុមហ៊ុន Huawei ជាង ៦៥ លាន​ដុល្លារ និង​ក្រុមហ៊ុន Altect ប្រហែល ៥ លាន​ដុល្លារ។ ទ្រព្យ​សកម្ម អឹមហ្វូន ត្រូវ​បាន​ប៉ាន់​ប្រមាណ​ថា មាន ១០៥ លាន​ដុល្លារ​ប៉ុន្តែ​វា​គ្រាន់​តែ​ជា​តម្លៃ​ទីផ្សារ​ក្នុង​បញ្ជី​ទ្រព្យ​សកម្ម​ដំបូង​ប៉ុណ្ណោះ ហើយ​តម្លៃ​ទីផ្សារ​ពិត​ប្រាកដ​អាច​មាន​ពី ៣០ ទៅ ៤០ លាន​ដុល្លារ​ប៉ុណ្ណោះ៕ PB

អត្ថបទគួរចាប់អារម្មណ៍