នេះគឺជាបរិយាកាសដ៏អស្ចារ្យមួយនៅពេលដែលបុគ្គលម្នាក់បានជួបសំណេះសំណាលជាមួយលោក Robert J Elliott ជាអគ្គនាយកប្រតិបត្តិ និងជានាយកចាត់ការទូទៅរបស់ក្រុមហ៊ុន មេនូឡាយហ្វ៍ ខេមបូឌា។
បុគ្គលឆ្នើមពោរពេញទៅដោយវិជ្ជាជីវៈ ផ្នែកធានារ៉ាប់រងរូបនេះកំពុងបំពេញបេសកកម្មរបស់គាត់ក្នុងការជួយកសាងអនាគតហិរញ្ញវត្ថុដ៏ល្អប្រសើរមួយសម្រាប់គ្រួសារកម្ពុជា។
លោកបានមកដល់ប្រទេសកម្ពុជាក្នុងឆ្នាំ ២០១២ នៅពេលដែលក្រុមហ៊ុន មេនូឡាយហ្វ៍ បើកការិយាល័យដំបូងរបស់ខ្លួននៅភ្នំពេញហើយលោកមានឆន្ទៈក្នុងការចូលរួមលើកស្ទួយវិស័យធានារ៉ាប់រង និងជីវភាពរស់នៅរបស់ប្រជាជនកម្ពុជាឲ្យកាន់តែប្រសើរឡើង។ គាត់ជឿជាក់យ៉ាងច្បាស់ថា នេះជារឿងត្រឹមត្រូវបំផុតមួយដែលគាត់កំពុងធ្វើ។
លោកមានប្រសាសន៍ថា៖ «នេះគឺជាប្រទេសដ៏ល្អមួយដែលពោរពេញទៅដោយប្រជាជនដែលមានចំណេះខ្ពស់។ ប្រជាជនកម្ពុជាមានការយល់ដឹងខ្លាំងផ្នែកបច្ចេកវិទ្យាឌីជីថល និងមានចំណាប់អារម្មណ៍ខ្លាំងក្នុងការប្រើបច្ចេកវិទ្យាសម្រាប់ ប្រតិបត្តិការធនាគារ និងប្រតិបត្តិការដទៃទៀត»។
នៅពេលដែលអនាគតរបស់ប្រជាជនកាន់តែប្រសើរឡើងនៅពេលណាមួយពួកគាត់នឹងអាចជាវសេវាកម្មធានារ៉ាប់រងតាមរយៈប្រព័ន្ធឌីជីថលនេះ។
លោកមានប្រសាសន៍ថាក្រុមហ៊ុន មេនូឡាយហ្វ៍កំពុងយកចិត្តទុកដាក់លើផ្នែកនេះយ៉ាងខ្លាំងខណៈដែលក្រុមហ៊ុនមានអត្រាការយល់ដឹងជាសាធារណៈជាង ៩០ ភាគរយលើកេរ្តិ៍ឈ្មោះរបស់ខ្លួន ដូច្នេះនៅពេលប្រជាជនគិតពីការធានារ៉ាប់រងអាយុជីវិត ពួកគាត់នឹងគិតដល់ក្រុមហ៊ុនមេនូឡាយហ្វ៍។
លោក Elliott បានឲ្យដឹងថាកម្ពុជាផ្តល់ឱកាសពិសេសមួយសម្រាប់ក្រុមហ៊ុនខណៈដែលវិស័យធានារ៉ាប់រងអាយុជីវិតនេះនៅមានភាពក្មេងខ្ចីនៅឡើយ ហើយថែមទាំងមានសក្តានុពលខ្លាំងសម្រាប់ការរីកចម្រើនបន្តទៀតផងដែរ។ ក្រុមហ៊ុនមេនូឡាយហ្វ៍ គឺជាក្រុមហ៊ុនធានារ៉ាប់រងអាយុជីវិតអន្តរជាតិដំបូងគេនៅកម្ពុជា។
លោកប្រាប់ថា វិស័យធានារ៉ាប់រងអាយុជីវិតនៅកម្ពុជាមានសក្តានុពលខ្លាំងក្នុងការជួយលើកស្ទួយ សុខុមាលភាពសង្គមរបស់ប្រជាពលរដ្ឋ និងការពារសន្តិសុខផ្នែកហិរញ្ញវត្ថុរយៈពេលវែងរបស់ប្រជាជនផងដែរ។
«ប្រជាជនកម្ពុជាជាច្រើននឹងរស់នៅបានកាន់តែយូរជាមួយនឹងសុខភាពកាន់តែល្អប្រសើរជាងមុន ហើយពួកគាត់នឹងប្រើថវិការបស់ខ្លួនដើម្បីថែទាំក្រុមគ្រួសារ ទិញរថយន្ត ផ្ទះ និងបំពេញតម្រូវការផ្សេងទៀត។ ប៉ុន្តែដើម្បីសម្រេចបានក្តីសុបិនរបស់ពួកគាត់ និងបំណងប្រាថ្នារបស់ក្រុមគ្រួសារ ពួកគាត់ត្រូវធានាថា ហិរញ្ញវត្ថុរបស់ខ្លួនទទួលបានការការពារ។»
«ក្រុមហ៊ុនមេនូឡាយហ្វ៍មានសេវាកម្មដ៏សម្បូរបែបដែលអាចជួយសម្រេចបាននូវក្ដីបំណងទាំងនេះ។ ជាឧទាហរណ៍ យើងមានគម្រោងសន្សំ និងគម្រោងសម្រាប់ការសិក្សារបស់បុត្រធីតា ហើយថែមទាំងអត្ថប្រយោជន៍ដើម្បីព្យាបាលជំងឺធ្ងន់ធ្ងរផងដែរ»។
«នៅពេលដែលវ័យរបស់ប្រជាជនផ្លាស់ប្តូរពីយុវជន យុវតី ទៅជាប្ដី ប្រពន្ធ និងក្លាយជាឪពុក និងម្តាយនោះតម្រូវការហិរញ្ញវត្ថុរបស់ពួកគាត់នឹងមានការផ្លាស់ប្តូរដែរ។ ហេតុនេះហើយយើងផ្តល់ជូននូវសេវាកម្មជាច្រើនដើម្បីជួយរៀបចំផែនការហិរញ្ញវត្ថុសម្រាប់គ្រប់ជំហាននៃជីវិត ដូចជាគម្រោងសន្សំ សម្រាប់ការអប់រំរបស់បុត្រធីតាជាដើម»។
លោក Elliott បន្តថា៖ «រឿងនេះពិតជាសំខាន់ណាស់ព្រោះឪពុកម្តាយទាំងអស់មិនចង់ប្រាប់កូនៗរបស់ពួកគាត់ថាគ្មានលទ្ធភាពឲ្យកូនៗបន្តការសិក្សាបន្ថែមទៀតដោយសារតែខ្វះថវិកានោះទេ»។
ដោយបានប្រកបការងារក្នុងវិស័យធានារ៉ាប់រងនេះ អស់រយៈពេល ៣៦ ឆ្នាំដោយ ២៦ ឆ្នាំជាមួយក្រុមហ៊ុន មេនូឡាយហ្វ៍លោក Elliott បានជួយសម្រេចក្ដីប្រាថ្នារបស់ប្រជាជនរាប់ពាន់នាក់នៅប្រទេសផ្សេងៗជាច្រើនតាមរយៈសេវាកម្មធានារ៉ាប់រងនេះ។
ដោយធំដឹងក្តីឡើងនៅក្នុងប្រទេសម៉ាឡេស៊ីជាកន្លែងដែលឪពុកម្តាយរបស់លោករស់នៅបុរសជនជាតិអៀរឡង់រូបនេះបានប្រឡូកក្នុងវិស័យការងារធានារ៉ាប់រងនៅក្នុងចក្រភពអង់គ្លេសអស់រយៈពេល ១៣ ឆ្នាំចាប់តាំងពីទសវត្សរ៍ឆ្នាំ ១៩៨០ និងបានក្លាយទៅជាសមាជិកនៃគណៈគ្រប់គ្រងរបស់ក្រុមហ៊ុននៅឯចក្រភពអង់គ្លេសផងដែរ (UK Executive Management)។
លោកបានចូលរួមជាមួយក្រុមហ៊ុន មេនូឡាយហ្វ៍ នៅហុងកុងក្នុងឆ្នាំ ២០០៥ ក្នុងនាមជាអនុប្រធានប្រតិបត្តិការផ្នែកលក់។ ក្នុងអំឡុងពេល ៥ ឆ្នាំរបស់លោកនៅទីនោះ លោកបានជួយលក់សេវាកម្មដោយទទួលបានជោគជ័យយ៉ាងខ្លាំង និងការជ្រើសរើសបុគ្គលិកឆ្នើមក្នុងក្រុមហ៊ុនផងដែរ។
នៅឆ្នាំ ២០១០ លោក Elliott ត្រូវបានតែងតាំងជាអនុប្រធានជាន់ខ្ពស់ និងជាប្រធានផ្នែកចែកចាយប្រចាំប្រទេសរបស់ប្រទេសសិង្ហបុរីដែលជាទីតាំងដែលលោកទទួលខុសត្រូវលើកិច្ចការជាច្រើនរាប់បញ្ចូលទាំងការត្រួតពិនិត្យផ្នែកលក់ និងភាពជាដៃគូក្នុងការចែកចាយសេវាកម្មធានារ៉ាប់រងផងដែរ។
ការធ្វើដំណើរមកប្រទេសកម្ពុជា ២ ឆ្នាំក្រោយមកលោកមិនស្ទាក់ស្ទើរក្នុងការទទួលយកភាពខុសគ្នារវាងប្រទេសកម្ពុជា និងប្រទេសដែលលោកធ្លាប់បម្រើការងារពីមុនទេ។ គាត់បន្តទៀតថានេះគឺដោយសារតែឱកាសពិសេសរបស់ប្រទេសកម្ពុជាដែលផ្ដល់ឱ្យក្រុមហ៊ុន មេនូឡាយហ្វ៍ ចូលរួមក្នុងការជួយលើកកម្ពស់ជីវភាពរស់នៅរបស់ប្រជាជន។
ជាមួយនឹងបុគ្គលិកលក្ខណៈរបស់ក្រុមហ៊ុនដែលមានភាពរឹងមាំដែលគួរទុកចិត្តបាននិងការគិតឆ្ពោះទៅមុខលោក Elliott បានប្រាប់បន្ថែមថា៖ «យើងតែងតែស្តាប់ប្រជាជន និងបង្កើតសេវាកម្មដែលពាក់ព័ន្ធនឹងពួកគេ។ ប្រជាជនកម្ពុជាចង់ចាប់ផ្ដើមគ្រួសារ បង្កើតអាជីវកម្មនានា និងធ្វើអ្វីៗច្រើនជាងនេះទៀត»។
លោក Elliott មានប្រសាសន៍ថា៖ «សេវាកម្មធានារ៉ាប់រងអាយុជីវិតតែមួយមិនអាចបំពេញនូវរាល់តម្រូវការរបស់ពួកគាត់បានទេ ដូច្នេះយើងជានិច្ចកាលតែងបង្កើនផលិតផលរបស់យើងឱ្យសមស្របនឹងតម្រូវការដែលកំពុងកើនឡើងរបស់ពួកគេ»។
ឧទាហរណ៍ ៖ លោកបង្ហើបថាប្រសិនបើប្រជាជនគណនាពីប្រាក់ចំណូលរបស់ពួកគាត់ក្នុងរយៈពេល ៤០ ឆ្នាំទៀតពួកគាត់នឹងដឹងថាពួកគាត់ត្រូវការការពារ គោលដៅហិរញ្ញវត្ថុរយៈពេលវែង និងអត្ថប្រយោជន៍ផ្សេងទៀតដែលពួកគាត់ចង់បាន។
បច្ចុប្បន្ននេះក្រុមហ៊ុន មេនូឡាយហ្វ៍ កំពុងការពារប្រជាជនកម្ពុជាចំនួន ៦ ម៉ឺននាក់ជាមួយទឹកប្រាក់ធានាសរុបចំនួនជាង ១,៤ ពាន់លានដុល្លារអាមេរិក។ ចំនួននៃអ្នកត្រូវបានធានាទាំងអស់រួមមានបុគ្គលិករបស់ក្រុមហ៊ុននានា ក៏ដូចជាអតិថិជនជាបុគ្គលជាច្រើនផងដែរ។
ទីប្រឹក្សាធានារ៉ាប់រងរបស់ក្រុមហ៊ុនមួយចំនួនធំកំពុងដើរតួនាទីយ៉ាងសំខាន់ក្នុងការផ្ដល់សេវាកម្មធានារ៉ាប់រងអាយុជីវិតជូនដល់ប្រជាជនកម្ពុជា។
«យើងក៏មានទីប្រឹក្សាធានារ៉ាប់រងប្រមាណ ៣០០០ នាក់នៅខេត្តកំពង់ចាម ខេត្តបាត់ដំបង ខេត្តសៀមរាប ខេត្តបន្ទាយមានជ័យ និងរាជធានីភ្នំពេញដែលបម្រើអតិថិជនជារៀងរាល់ថ្ងៃ។ ការរួមចំណែករបស់ពួកគាត់ដើរតួនាទីយ៉ាងសំខាន់មួយក្នុងការជួយឱ្យអាជីវកម្មរបស់យើងរីកចម្រើនទៅមុខជារៀងរាល់ឆ្នាំ»។
លោកថ្លែងថា៖ «កម្ពុជាមានប្រជាជនប្រមាណ ១៦ លាននាក់ដែលមានអាយុជាមធ្យម ២៤ ឆ្នាំហើយប្រជាជនដែលមានជីវភាពធូរធារនឹងចាប់ផ្ដើមយកចិត្តទុកដាក់លើបញ្ហាសុខភាពរបស់ខ្លួន»។
លោក Elliott បន្ថែមថាសូម្បីតែបុគ្គលិកកម្ពុជារបស់លោកក៏បានរកឃើញនូវសារៈសំខាន់នៃការធានារ៉ាប់រងអាយុជីវិត និងការការពារការសន្សំប្រាក់រយៈពេលវែង និងហិរញ្ញវត្ថុរបស់ខ្លួនផងដែរ ហើយពួកគាត់បានក្លាយទៅជាអ្នកផ្សព្វផ្សាយដ៏ល្អបំផុតរបស់ក្រុមហ៊ុនតាមរយៈការចែករំលែកបទពិសោធជាមួយប្រជាជនកម្ពុជាផ្សេងទៀតអំពីសារៈសំខាន់នៃការធានារ៉ាប់រងអាយុជីវិត។
ប៉ុន្តែមិនមែនត្រឹមតែប៉ុណ្ណឹងទេ។ ក្រុមហ៊ុនដែលត្រូវបានបង្កើតឡើងនៅឆ្នាំ ១៨៨៧ នៅក្នុងប្រទេសកាណាដាមួយនេះតែងតែចូលរួមចំណែកក្នុងសកម្មភាពសង្គមនានាជាច្រើន។
ចាប់តាំងពីបានចូលមកទីផ្សារកម្ពុជាក្រុមហ៊ុននេះបានគាំទ្រសហគមន៍កម្ពុជាតាមរយៈសកម្មភាពទំនួលខុសត្រូវសង្គម និងការឧបត្ថម្ភរបស់ខ្លួនដោយចំណាយថវិកាជាង ៦០០ ០០០ ដុល្លារអាមេរិករួចមកហើយ។
នេះរួមបញ្ចូលទាំងការបរិច្ចាគដល់មន្ទីរពេទ្យកុមារអង្គរ មន្ទីរពេទ្យគន្ធបុប្ផា ការចែកកង់ និងមួកសុវត្ថិភាពដល់កុមារ ឪពុកម្តាយ និងគ្រូបង្រៀន ការឧបត្ថម្ភ កម្មវិធីរត់ប្រណាំងអន្តរជាតិពាក់កណ្តាលម៉ារ៉ាតុងនៅអង្គរវត្ត និងកម្មវិធីជាច្រើនទៀត។
សុវត្ថិភាពចរាចរណ៍ផ្លូវគោកគឺជាផ្នែកមួយផ្សេងទៀតដែលក្រុមហ៊ុន មេនូឡាយហ្វ៍ប្តេជ្ញាគាំទ្រចាប់តាំងពីចូលមកព្រះរាជាណាចក្រកម្ពុជា។ ក្រុមហ៊ុននេះបានធ្វើការជាមួយអង្គការមូលនិធិបង្ការរបួសអាស៊ី (AIP) ដើម្បីលើកកម្ពស់ និងរួមចំណែកដល់ការកាត់បន្ថយអត្រាមរណភាព ការរងរបួស ពិការភាព និងការខូចខាតដែលបណ្តាលមកពីគ្រោះថ្នាក់ចរាចរណ៍។
ក្រុមហ៊ុនក៏ផ្តល់ការអប់រំលើសារៈសំខាន់នៃការប្រើប្រាស់មួកសុវត្ថិភាព និងចំណេះដឹងអំពីសុវត្ថិភាពចរាចរណ៍សម្រាប់ប្រជាជនកម្ពុជាផងដែរ។ ក្នុងរយៈពេល ៥ ឆ្នាំនៃកិច្ចសហប្រតិបត្តិការរបស់ក្រុមហ៊ុនជាមួយ AIP ការអប់រំនិងជំនាញសុវត្ថិភាពចរាចរណ៍ត្រូវបានផ្តល់ជូនដល់សាលាចំនួន ៦ កន្លែងមានចំនួនសិស្ស ៤០៥៧ នាក់ គ្រូចំនួន ២១៩ នាក់ និងឪពុកម្តាយចំនួន ៦៩១១ នាក់ចូលរួម។ ក្រុមហ៊ុនក៏បានបរិច្ចាគមួកសុវត្ថិភាពជាង ៥០០០ មួកផងដែរ។
នៅក្នុងការបង្ហាញនូវសមិទ្ធផលរបស់លោក Elliott និងក្រុមហ៊ុនមេនូឡាយហ្វ៍ លោក និងក្រុមហ៊ុនបានទទួលពានរង្វាន់ជាច្រើនក្នុងឆ្នាំនេះរួមមាន ៖
• ពានរង្វាន់កិត្តិនាមក្រុមហ៊ុនឆ្នើមប្រចាំឆ្នាំ «Best Corporate Brand of the Year»៖
ឆ្លុះបញ្ចាំងពីការខិតខំប្រឹងប្រែងរបស់ក្រុមហ៊ុនមេនូឡាយហ្វ៍ អស់រយៈពេល ៦ ឆ្នាំកន្លងមកនេះក្នុងការគាំទ្រ និងលើកកម្ពស់ការយល់ដឹងជាសាធារណៈអំពីសារៈសំខាន់នៃការធានារ៉ាប់រងអាយុជីវិត។
• ពានរង្វាន់ទំនាក់ទំនងល្អជាមួយអតិថិជនប្រចាំឆ្នាំ ៖
ពានរង្វាន់នេះតំណាងឱ្យកិច្ចខិតខំប្រឹងប្រែងរបស់បុគ្គលិក និងទីប្រឹក្សាធានារ៉ាប់រងរបស់ក្រុមហ៊ុនក្នុងការផ្តល់ជូននូវផលិតផល និងសេវាកម្មការពារហិរញ្ញវត្ថុដែលមានភាពចាំបាច់បំផុតដល់អតិថិជន។ ក្រុមហ៊ុន មេនូឡាយហ្វ៍ ខេមបូឌា ក៏ទទួលបានពានរង្វាន់នេះកាលពីឆ្នាំមុនផងដែរ។
• ពានរង្វាន់ភាពជាអ្នកដឹកនាំទំនួលខុសត្រូវសង្គមប្រចាំឆ្នាំ ៖
ពានរង្វាន់នេះបង្ហាញពីការប្តេជ្ញាចិត្តរបស់ក្រុមហ៊ុនក្នុងការគាំទ្រដល់សហគមន៍ក្នុងស្រុកតាមរយៈការឧបត្ថម្ភ និងសកម្មភាពសង្គមនានារបស់ក្រុមហ៊ុន។ ក្រុមហ៊ុន មេនូឡាយហ្វ៍ ខេមបូឌា ក៏បានទទួលពានរង្វាន់នេះផងដែរកាលពីឆ្នាំមុន។
• ពានរង្វាន់អគ្គនាយកប្រតិបត្តិឆ្នើមផ្នែកធានារ៉ាប់រងប្រចាំឆ្នាំ ៖
ពានរង្វាន់ពិសេសមួយនេះត្រូវបានប្រគល់ដោយស្ថាប័ន APCSC ជូនដល់លោក Robert Elliott អគ្គនាយកប្រតិបត្តិ និងនាយកចាត់ការទូទៅរបស់ក្រុមហ៊ុនមេនូឡាយហ្វ៍ ខេមបូឌា។
ទាំងនេះគ្មានអ្វីចម្លែកទេដែលលោក Elliott និងក្រុមហ៊ុនទទួលបាននូវពានរង្វាន់ និងមានសុទិដ្ឋិនិយមចំពោះទស្សនវិស័យរបស់ក្រុមហ៊ុនមេនូឡាយហ្វ៍សម្រាប់អនាគតដ៏យូរអង្វែង និងភ្លឺស្វាងនៅក្នុងព្រះរាជាណាចក្រកម្ពុជា។ ជាមួយនឹងកញ្ចប់សេវាកម្មដ៏សម្បូរបែបរបស់ក្រុមហ៊ុនទាំងអស់នេះគឺជាការពិតដែលគួរជាទីមោទនភាព៕