.jpg)
ក្រុងគូឡាឡាំពួៈ ប្រទេសម៉ាឡេស៊ីកំពុងព្យាយាមបង្កើនការនាំចេញផលិតផលហាឡាល់ទៅកាន់ប្រទេសជប៉ុន មុនពិធីប្រកួតកីឡាអូឡាំពិកក្រុងតូក្យូឆ្នាំ ២០២០ ខាងមុខដោយជំរុញឲ្យក្រុមហ៊ុនក្នុងស្រុកឆ្លើយតបនឹងកំណើនតម្រូវការអាហារហាឡាល់ និងសម្ភារប្រើប្រាស់ប្រចាំថ្ងៃចាំបាច់ដែលអនុញ្ញាតឲ្យប្រើស្ថិតក្រោមច្បាប់មូស្លីមស្របទៅតាមកំណើនចំនួនភ្ញៀវទេសចរមូស្លីមដែលទៅទស្សនាប្រទេសជប៉ុន។
លោក Mohd Shahreen Zainooreen Madros នាយកប្រតិបត្តិក្រុមហ៊ុន Malaysia External Trade Development Corp បានឲ្យដឹងក្នុងវេទិកាឧស្សាហកម្មមួយនាពេលថ្មីៗនេះនៅទីក្រុងគូឡាឡាំពួថា ការនាំចេញផលិតផលហាឡាល់របស់ម៉ាឡេស៊ីទៅកាន់ប្រទេសជប៉ុនមានតម្លៃ ២,៦៧ ពាន់លានរីងហ្គីដ (៦៩០ លានដុល្លារ) នៅឆ្នាំ ២០១៦ កើនឡើង ២០,៨ ភាគរយធៀបនឹងឆ្នាំ ២០១៥ ហើយការនាំចេញផលិតផលទាំងនោះនឹងបន្តកើនឡើងក្នុងសម្ទុះប្រហាក់ប្រហែលគ្នានោះដែររហូតដល់ឆ្នាំ ២០២០។
អង្គភាពជំរុញពាណិជ្ជកម្មរបស់រដ្ឋាភិបាលម៉ាឡេស៊ីនេះបានបន្តឲ្យដឹងថា ប្រទេសស្ថិតនៅក្នុងតំបន់អាស៊ីអាគ្នេយ៍មួយនេះបាននាំចេញផលិតផលហាឡាល់តម្លៃ ៤២,២ ពាន់លានរីងហ្គីដទៅបរទេសក្នុងឆ្នាំ ២០១៦ កើនឡើង ៧,១ ភាគរយដោយប្រទេសជប៉ុនជាទិសដៅនាំចេញធំជាងគេទី ៤ បន្ទាប់ពីប្រទេសចិន សិង្ហបុរី និងសហរដ្ឋអាមេរិក។
ក្រុមហ៊ុននានារបស់ម៉ាឡេស៊ីបាននិងកំពុងបង្កើតក្រុមហ៊ុនបណ្តាក់ទុនរួមគ្នានៅប្រទេសជប៉ុនរួមមានក្រុមហ៊ុនផលិតអាហារ Food Japan Co របស់ក្រុមហ៊ុន Brahim ក្រុមហ៊ុន Bunga Raya ដែលជាភោជនីយដ្ឋានមួយមានបម្រើម្ហូបអាហារម៉ាឡេស៊ី និងក្រុមហ៊ុន Manhattan Fish Market ដែលជាភោជនីយដ្ឋានបម្រើម្ហូបហាឡាល់ដែលកំពុងប្រតិបត្តិការទូទាំងពិភពលោក។
ក្នុងកិច្ចពិភាក្សាមួយក្នុងអំឡុងវេទិកានេះលោក Shinya Yokoyama ស្ថាបនិកក្រុមហ៊ុន Halal Media Japan ដែលជាបណ្តាញផ្តល់ព័ត៌មានស្តីពីម្ហូបហាឡាល់បានលើកឡើងថា ម្ហូបហាឡាល់កំពុងត្រូវបានមើលឃើញកាន់តែខ្លាំងថាមានទាក់ទងនឹងអាហារសុខភាពល្អនៅជប៉ុន និងបានព្យាករថាអ្នកដំណើរមូស្លីម នឹងព្យាយាមដាក់បញ្ចូលភោជនីយដ្ឋានហាឡាល់ក្នុងកម្មវិធីធ្វើដំណើររបស់ខ្លួន៕ BP
