ក្រុងគូឡាឡាំពួៈ អង្គភាពឃ្លាំមើលការប្រកួតប្រជែងរបស់ប្រទេសហ្វីលីពីន បានឲ្យដឹងកាលពីថ្ងៃចន្ទថា ខ្លួនកំពុងពិនិត្យមើលថា តើកិច្ចព្រមព្រៀងរបស់ក្រុមហ៊ុន Uber Technologies លក់អាជីវកម្មនៅតំបន់អាស៊ីអាគ្នេយ៍ទៅឲ្យក្រុមហ៊ុន Grab ដែលជាគូប្រកួតប្រជែងរបស់ខ្លួននឹងកាត់បន្ថយការប្រកួតប្រជែងខ្លាំងឬយ៉ាងណា។
គណៈកម្មាធិការប្រកួតប្រជែងហ្វីលីពីន (PCC) បានឲ្យដឹងក្នុងសេចក្តីប្រកាសមួយថា៖ «កិច្ចព្រមព្រៀងរវាងក្រុមហ៊ុន Grab និងក្រុមហ៊ុន Uber ទំនងជាមានផលប៉ះពាល់ខ្លាំងលើសេវាហៅរថយន្តតាក់ស៊ីជិះ និងសេវាដឹកជញ្ជូន។ ដូច្នេះហើយគណៈកម្មាធិការ PCC កំពុងពិនិត្យមើលកិច្ចព្រមព្រៀងនេះយ៉ាងហ្មត់ចត់»។
ប្រទេសម៉ាឡេស៊ីក៏បានឲ្យដឹងកាលពីថ្ងៃចន្ទផងដែរថា ខ្លួននឹងពិនិត្យតាមដានក្រុមហ៊ុនផ្តល់សេវាហៅរថយន្តតាក់ស៊ីជិះ Grab ចំពោះឥរិយាបថប្រឆាំងនឹងការប្រកួតប្រជែងពោលគឺថាកិច្ចព្រមព្រៀងរបស់ក្រុមហ៊ុន Uber ដែលទទួលយកភាគហ៊ុនចំនួន ២៧,៥ ភាគរយក្នុងក្រុមហ៊ុន Grab ជាថ្នូរនឹងការលក់ប្រតិបត្តិការក្នុងតំបន់អាស៊ីអាគ្នេយ៍នេះបានជំរុញឲ្យមានការចាប់អារម្មណ៍ខ្លាំងពីសំណាក់អង្គភាពឃ្លាំមើលការប្រកួតប្រជែងរបស់ប្រទេសសិង្ហបុរីដែលបានឲ្យដឹងកាលពីថ្ងៃសុក្រថាខ្លួនកំពុងស៊ើបអង្កេតពីការរំលោភច្បាប់ប្រកួតប្រជែងដែលត្រូវបានសង្ស័យ។
មន្ត្រីជាន់ខ្ពស់រដ្ឋាភិបាលម៉ាឡេស៊ីមួយរូបបានឲ្យដឹងថា គណៈកម្មាធិការប្រកួតប្រជែងរបស់ប្រទេសម៉ាឡេស៊ីនឹងអង្កេតមើលក្រុមហ៊ុន Grab ជាពិសេស បើក្រុមហ៊ុននេះអនុវត្តការធ្វើអាជីវកម្មដោយមិនស្មើភាព ឬដំឡើងតម្លៃសេវាដឹកជញ្ជូនភ្លាមៗ។
លោកស្រី Nancy Shukri ដែលគ្រប់គ្រងអាជ្ញាធរផ្តល់អាជ្ញាប័ណ្ណដឹកជញ្ជូនសាធារណៈម៉ាឡេស៊ីបានឲ្យដឹងថា៖ «យើងនឹងមិនព្រងើយចំពោះបញ្ហានេះនោះទេ។ យើងនឹងពិនិត្យតាមដានបញ្ហានេះពីព្រោះវានៅថ្មីៗនៅឡើយ ហើយយើងពុំទាន់ដឹងថានឹងមានអ្វីកើតឡើងនៅពេលបន្ទាប់»។
ដោយសំដៅលើកិច្ចប្រជុំមួយជាមួយនឹងតំណាងក្រុមហ៊ុន Grab កាលពីថ្ងៃចន្ទសប្តាហ៍មុនលោកស្រី Nancy បានបញ្ជាក់ថា៖ «យើងបានបញ្ជាក់ថា បើមានឥរិយាបថប្រឆាំងនឹងការប្រកួតប្រជែងនោះច្បាប់ប្រកួតប្រជែងនឹងចូលជាធរមាន។ យើងបានពន្យល់ច្បាស់លាស់ពីបញ្ហានេះដល់ពួកគេហើយ»។
ក្រុមហ៊ុន Uber និងក្រុមហ៊ុន Grab បានប្រកាសពីកិច្ចព្រមព្រៀងនេះកាលពីថ្ងៃចន្ទសប្តាហ៍មុនដោយបានលើកឡើងពីការដកខ្លួនជាលើកទី ២ របស់ក្រុមហ៊ុនអាមេរិកមួយនេះពីទីផ្សារអាស៊ី។ កន្លងមកក្រុមហ៊ុន Uber បានលក់ចោលប្រតិបត្តិការរបស់ខ្លួននៅប្រទេសចិន។
លោកស្រី Nancy បានឲ្យដឹងថាក្រុមហ៊ុន Grab ដែលមានតម្លៃប្រមាណ ៦ ពាន់លានដុល្លារបានផ្តល់ការធានាក្នុងអំឡុងកិច្ចប្រជុំរបស់ខ្លួនកាលពីថ្ងៃចន្ទសប្តាហ៍មុនថានឹងមិនមានការកំណត់តម្លៃដោយមិនស្មើភាពនោះទេ ហើយក្រុមហ៊ុនរបស់ខ្លួនក៏នឹងមិនដំឡើងថ្លៃនៅពេលនេះដែរ។
ទោះជាយ៉ាងនេះក្តី រដ្ឋមន្ត្រីរូបនេះបានបន្តឲ្យដឹងថា ការច្របាច់បញ្ចូលគ្នានូវក្រុមហ៊ុនទាំង ២ នេះមិនបានផ្លាស់ប្តូរទំនាក់ទំនងរបស់រដ្ឋាភិបាលជាមួយនឹងក្រុមហ៊ុន Grab ក្នុងការប្រែក្លាយអ្នកបើកបររថយន្តតាក់ស៊ីជាង ៦៧ ០០០ នាក់នៅទូទាំងប្រទេសឲ្យទៅប្រើប្រាស់កម្មវិធីហៅរថយន្តតាក់ស៊ីជិះនោះទេ។
អ្នកបើកបររថយន្តតាក់ស៊ីជិត ១៤ ០០០ នាក់បច្ចុប្បន្នបានប្រើប្រាស់មួយផ្នែក ឬទាំងស្រុងនូវកម្មវិធីហៅរថយន្តតាក់ស៊ីជិះនេះ ហើយរដ្ឋាភិបាលនឹងបន្តសហការជាមួយនឹងក្រុមហ៊ុន Grab ដើម្បីជំរុញឲ្យអ្នកបើកបរកាន់តែច្រើនប្រើប្រាស់កម្មវិធីនេះ។
លោកស្រីបានបន្ថែមទៀតថា៖ «នេះគឺជាផលប្រយោជន៍របស់ឧស្សាហកម្មរថយន្តឈ្នួលដែលមានជាយូរមកហើយ។ ទន្ទឹមនឹងនោះដែរក្រុមហ៊ុន Grab ត្រូវការជំនួយរបស់យើង ហើយយើងនៅទីនោះដើម្បីជួយពួកគេផងដែរ»៕ BP