ក្រុងម៉ិកស៊ិកៈ ប្រទេស ម៉ិកស៊ិក កាលពីថ្ងៃពុធបានផ្ដល់សច្ចាប័នដល់កិច្ចព្រមព្រៀងពាណិជ្ជកម្មអាមេរិកខាងជើង ដែលធ្វើឲ្យប្រទេសនេះក្លាយជាប្រទេសទី១ ក្នុងការផ្ដល់ការអនុម័តចុងក្រោយដល់កិច្ចព្រមព្រៀងនេះ ទោះបីជាមានភាពតានតឹងនៅពេលថ្មីៗជាមួយអាមេរិកក៏ដោយ។
កិច្ចព្រមព្រៀងរវាងអាមេរិក ម៉ិកស៊ិក និងកាណាដា (USMCA) ត្រូវបានអនុម័តនៅក្នុងព្រឹទ្ធសភាម៉ិកស៊ិកជាមួយនឹងសំឡេងគាំទ្រ ១១៤ សំឡេង និងប្រឆាំង ៤ សំឡេង ដែលបញ្ជូនអ្វីដែលរដ្ឋាភិបាលហៅថា «ជាសារដ៏ច្បាស់លាស់មួយគាំទ្រសេដ្ឋកិច្ចបើកចំហ និងការធ្វើសមាហរណកម្មសេដ្ឋកិច្ចស៊ីជម្រៅនៅក្នុងតំបន់នេះ»។
លោក Andres Manuel Lopez Obrador ប្រធានាធិបតីម៉ិកស៊ិកបានថ្លែងថា៖ «នេះមានន័យថា ការវិនិយោគបរទេសនៅប្រទេស ម៉ិកស៊ិក ការងារនៅក្នុងប្រទេស ម៉ិកស៊ិក មានលទ្ធភាពចូលទៅទីផ្សារអាមេរិកសម្រាប់ផលិតផលរបស់យើង»។
កិច្ចព្រមព្រៀងពាណិជ្ជកម្មសេរីអាមេរិកខាងជើង (NAFTA) ដែលកិច្ចព្រមព្រៀងជំនាន់មុនរបស់កិច្ចព្រមព្រៀង USMCA បានជួយប្រែក្លាយប្រទេសនេះទៅជាប្រទេសមហាអំណាចនាំចេញក្នុងរយៈពេល ២៥ ឆ្នាំ។
ប្រទេសទាំង ៣ បានចុះហត្ថលេខាលើកិច្ចព្រមព្រៀងថ្មីនេះកាលពីថ្ងៃទី ៣០ ខែ វិច្ឆិកា ឆ្នាំមុន បន្ទាប់មានការចរចាដ៏តឹងតែងអស់រយៈពេល ១ ឆ្នាំ៕ AFP/LA