The Phnom Penh Post Search

Search form




Logo of Phnom Penh Post newspaper Phnom Penh Post - ម៉ុង ឫទ្ធី​កំពុង​រៀបចំ​កសិដ្ឋាន​ចិញ្ចឹម​គោ​ទឹកដោះ

ម៉ុង ឫទ្ធី​កំពុង​រៀបចំ​កសិដ្ឋាន​ចិញ្ចឹម​គោ​ទឹកដោះ

ម៉ុង ឫទ្ធី​កំពុង​រៀបចំ​កសិដ្ឋាន​ចិញ្ចឹម​គោ​ទឹកដោះ

ភ្នំពេញៈ ក្រុមហ៊ុន ម៉ុង ឫទ្ធី គ្រុប ដែល​បាន​សហការ​ជាមួយ​ក្រុមហ៊ុន New Zealand Milk កំពុង​រៀបចំ​ដំណើរការ​កសិដ្ឋាន​ចិញ្ចឹម​គោ​យក​ទឹកដោះ ដែល​រំពឹង​ថា​នឹង​ក្លាយ​ជា​កសិដ្ឋាន​ដំបូង និង​ធំ​ជាង​គេ​នៅ​កម្ពុជា​។ នេះ​បើ​តាម​ការ​ឲ្យ​ដឹង​ពី​លោក ឧកញ៉ា ម៉ុង ឫទ្ធី អគ្គនាយក​ក្រុមហ៊ុន ម៉ុង ឫទ្ធី គ្រុប។

គម្រោង​ចិញ្ចឹម​គោ​យក​ទឹកដោះ​នេះ​នឹង​ត្រូវ​រៀបចំ​នៅលើ​ទំហំ​ផ្ទៃដី​៥០​ហិកតា នៅ​តំបន់​សេដ្ឋកិច្ច​ពិសេស​ម៉ុងឫទ្ធី​។

លោក ម៉ុង ឫទ្ធី បាន​ឲ្យ​ដឹង​ថា គោ​ពូជ​ពី​ប្រទេស​នូវែលសេឡង់​ចំនួន ៣០០​ក្បាល​ត្រូវ​ដឹក​ចូល​មក​កម្ពុជា​នៅ​ខែ​មេសា​ឆ្នាំ​ក្រោយ​នេះ​។ លោក​មាន​ប្រសាសន៍​ថា​៖ «​គោ​ដែល​ដឹក​មក​ជា​គោ​ផើម​។ យើង​ឲ្យ​វា​មក​កើត​កូន​នៅ​ស្រុក​ខ្មែរ ដើម្បី​កូន​វា​បន្សាំ​នឹង​អាកាសធាតុ​នៅ​ទី​នេះ​។ យើង​ត្រូវ​ចាំ​៥​ទៅ​៧​ឆ្នាំ​ដល់​វា​ពេញវ័យ ទើប​អាច​យក​ទឹកដោះ​បាន»។

ជំហាន​ដំបូង គោ​ពេញវ័យ​មួយ​ក្បាល​ត្រូវ​គេ​រំពឹង​ថា​នឹង​អាច​ផ្តល់​ទឹកដោះ ពី ១០ ទៅ​១៥​លីត្រ​ក្នុង​មួយ​ថ្ងៃ​។

នេះ មិនមែន​ជា​លើក​ទី​មួយ​ទេ​ដែល​អ្នក​វិនិយោគ​ប្រកាស​ការ​បណ្តាក់ទុន ក្នុង​ការ​ចិញ្ចឹម​គោ​យក​ទឹកដោះ​ដើម្បី​ផ្គត់ផ្គង់​តម្រូវការ​ក្នុង ស្រុក​។ កាលពី​ឆ្នាំ​២០១១ ក្រុមហ៊ុន 7NG គ្រុប បាន​ប្រកាស​សហការ​ជាមួយ​ក្រុមហ៊ុន​ស៊ុយអែត HPT Dairy Company ដំណើរការ​កសិដ្ឋាន​ចិញ្ចឹម​គោ​យក​ទឹកដោះ ២០០​ក្បាល នៅលើ​ផ្ទៃដី​ទំហំ​១០០ ហិកតា​នៅក្នុង​ខេត្ត​កំពង់ស្ពឺ ដោយ​ព្យាករ​ថា​នឹង​ផ្គត់ផ្គង់​ទឹកដោះគោ​ស្រស់​ដល់​ទីផ្សារ​១,២ លាន​លីត្រ នៅ​ឆ្នាំ​២០១២ និង ៣​លាន​លីត្រ​នៅ​ឆ្នាំ​២០១៣​។ ប៉ុន្តែ មក​ដល់​ពេល​នេះ គម្រោង​នេះ​មិន​ទាន់​ដំណើរការ​នៅ​ឡើយ​នោះ​ទេ​។

លោកស្រី ចន្ធី អគ្គនាយក 7NG ឲ្យ​ដឹង​ថា គម្រោង​នេះ​មិន​ទាន់​មាន​សកម្មភាព​ទេ ដោយសារ​ក្រុមហ៊ុន​ជា​ដៃគូ​សុំ​ពន្យារពេល​ដោយ​មិន​បាន​បញ្ជាក់​ហេតុផល ពី​ការ​សម្រេច​ពន្យារពេល​នោះ​ទេ។

លោក​បន្ត​ថា គម្រោង​នេះ​នឹង​ចាប់​ដំណើរការ​ឡើង​វិញ នៅ​ពេល​ឆាប់ៗ​ខាង​មុខ​នេះ ប៉ុន្តែ​មិន​បាន​បញ្ជាក់​ពេលវេលា​ពិតប្រាកដ​នោះ​ទេ​៕

អត្ថបទគួរចាប់អារម្មណ៍