.jpg)
លោក Carl Wong (ស្តាំ) និងលោក Syaiful Hassan Nodin។ រូបថត សហការី
ភ្នំពេញៈ ក្រុមហ៊ុន Oyika Pte Ltd ដែលគ្រប់គ្រងដោយវិនិយោគិនមកពីប្រទេសសិង្ហបុរី និងក្រុមហ៊ុន Thada គ្រប់គ្រងដោយវិនិយោគិនម៉ាឡេស៊ីបានចុះកិច្ចព្រមព្រៀងភាពជាដៃគូ ដើម្បីចែកចាយម៉ូតូអគ្គិសនី ១ ០០០ គ្រឿង នៅទីក្រុងភ្នំពេញនៅឆ្នាំនេះ ដើម្បីរួមចំណែកគោលនយោបាយបៃតងរបស់រដ្ឋាភិបាល។
កិច្ចព្រមព្រៀងនេះបានចុះហត្ថលេខារវាងលោក Carl Wong ប្រធានក្រុមហ៊ុន Oyika និងលោក Syaiful Hassan Nodin នាយកគ្រប់គ្រងក្រុមហ៊ុន Thada កាលពីថ្ងៃទី ៣១ ខែមីនា សម្រាប់ការពង្រីកអាជីវកម្មរបស់ពួកគេទៅក្នុងបណ្ដាប្រទេសក្នុងតំបន់អាស៊ីអាគ្នេយ៍។
ស្ថិតក្រោមកិច្ចព្រមព្រៀងនេះ ពួកគេនឹងពង្រីកសេវាចែកចាយអាគុយរបស់ពួកគេដល់សហគមន៍ជនបទនៅកម្ពុជាក្នុងគោលបំណងកាត់បន្ថយការចំណាយជាមួយការប្រើម៉ូតូអគ្គិសនី និងទប់ស្កាត់ការប្រើប្រាស់ចំនួនម៉ូតូដែលមានម៉ាស៊ីនចំហេះ (ICE)។
ក្រុមហ៊ុនទាំង ២ កំពុងរៀបចំផែនការពង្រីកក្នុងតំបន់អាស៊ីអាគ្នេយ៍ ដែលជាទីផ្សារមួយមានម៉ូតូប្រមាណ ២៥០ លានគ្រឿង។ ជាមួយគ្នានោះក្រុមហ៊ុន Oyika បានដាក់ឱ្យដំណើរការការិយាល័យនៅក្នុងប្រទេសឥណ្ឌូនេស៊ីកាលពីខែតុលា ឆ្នាំមុន។
ក្រុមហ៊ុន Thada គ្រោងនឹងចែកចាយម៉ូតូអគ្គិសនីរហូតដល់ ១ ០០០ គ្រឿង នៅទីក្រុងភ្នំពេញនៅឆ្នាំនេះ។ ក្រោមកិច្ចព្រមព្រៀងនេះក្រុមហ៊ុន Oyika នឹងផ្តត់ផ្គង់ម៉ូតូដំបូង ១០០ គ្រឿង មកកម្ពុជាជាមួយការប្រើប្រាស់ម៉ូតូរបស់ក្រុមហ៊ុន Oyika ស្ថិតក្រោមយីហោ G02។ ម៉ូតូនេះត្រូវរំពឹងថា នឹងដាក់ឱ្យដំណើរការត្រឹមខែកក្កដា។ នេះបើតាមសេចក្ដីប្រកាសព័ត៌មាន។
លោក Syaiful Hassan Nodin ថ្លែងថា៖ «យើងរីករាយអំពីឱកាសនៃការប្រើប្រាស់ម៉ូតូអគ្គិសនីនៅប្រទេសកម្ពុជា»។ លោកបន្តថា៖ «មានម៉ូតូជិត ៣ លានគ្រឿងនៅកម្ពុជា ហើយក្នុងចំណោមម៉ូតូទាំងនោះមានប្រហែល ២-៣ ពាន់គ្រឿងប៉ុណ្ណោះជាម៉ូតូអគ្គិសនី។ ជាមួយប្រព័ន្ធផ្លាស់ប្តូរអាគុយរបស់ក្រុមហ៊ុន Oyika យើងជឿថា អ្នកជិះម៉ូតូនឹងផ្លាស់ប្តូរទៅប្រើប្រាស់ម៉ូតូអគ្គិសនីវិញជាក់ជាមិនខាន»។
លោក Carl Wong ប្រធានក្រុមហ៊ុន Oyika បានឱ្យដឹងថា នៅតំបន់អាស៊ីអាគ្នេយ៍មានដង់ស៊ីតេម៉ូតូខ្ពស់បំផុតនៅលើពិភពលោក និងតិចជាង ០,១ ភាគរយក្នុងចំណោមម៉ូតូទាំងនោះគឺជាម៉ូតូអគ្គិសនី។ លោកបន្តថា៖ «យើងសម្លឹងឃើញថា មានសក្ដានុពលកើនឡើងយ៉ាងខ្លាំង ហើយក៏ជាតំបន់ដែលយើងអាចមានឥទ្ធិពលលើការកាត់បន្ថយការបំភាយឧស្ម័នកាបូន និងដើរតួនាទីក្នុងការចូលរួមចំណែកនៃការប្រែប្រួលអាកាសធាតុ»។
ក្រុមហ៊ុន Oyika បានដាក់ពង្រាយបណ្ដាញប្រព័ន្ធបញ្ចូលអាគុយចំនួន ១១ ទីតាំងនៅក្នុងរាជធានីភ្នំពេញ។ ដំណោះស្រាយផ្លាស់ប្តូរអាគុយ ២ នៃបញ្ហាដែលម៉ូតូអគ្គិសនីប្រឈមគឺបញ្ហាពេលវេលាបញ្ចូលអាគុយ និងបញ្ហានៃការផ្លាស់ប្តូរ។ ដោយមានប្រព័ន្ធរបស់ក្រុមហ៊ុន Oyika អ្នកជិះអាចបញ្ចូលអាគុយអស់ថាមពល សម្រាប់អាគុយថ្មី ១ ក្នុងរយៈពេល ៦០ វិនាទី។ នេះប្រៀបធៀបនឹងរយៈពេលរហូតដល់ ៨ ម៉ោងនៃពេលវេលាបញ្ចូលថាមពលរបស់អាគុយទឹក។
ម៉ូតូប្រើប្រាស់សាំងនីមួយៗនៅលើផ្លូវថ្នល់ ដែលជំនួសដោយម៉ូតូអគ្គិសនីកាត់បន្ថយការបំភាយឧស្ម័នកាបូនឌីអុកស៊ីតចំនួន ១ តោនក្នុង ១ ឆ្នាំដែលស្មើនឹងការដាំដុះដើមឈើបានចំនួន ១៦,៥ ដើមក្នុងរយៈពេល ១០ ឆ្នាំ។ នេះបើយោងតាមទីភ្នាក់ងារការពារបរិស្ថានអាមេរិក។
យោងតាមរបាយការណ៍ប្រចាំឆ្នាំ ២០១៩ របស់ក្រសួងសាធារណការ និងដឹកជញ្ជូនមានយានយន្តចុះបញ្ជីជាង ៥ លានគ្រឿងនៅកម្ពុជា។
នៅក្នុងចំណោមយានយន្តទាំងនេះ ៨៥ ភាគរយគឺជាម៉ូតូក្នុងចំនួននោះម៉ូតូអគ្គិសនីមានចំនួនតិចជាង ០,១ ភាគរយ។ កាលពីឆ្នាំមុន យានយន្តថ្មីចំនួន ៦៤០ ១៨៣ គ្រឿងបានចុះបញ្ជីក្នុងចំណោមនោះម៉ូតូមានចំនួន ៥៣១ ២៦៩ គ្រឿង៕LA
