The Phnom Penh Post Search

Search form




Logo of Phnom Penh Post newspaper Phnom Penh Post - ម៉ែន សារុន បង្កើន​​​វិនិយោគ​លើ​អង្ករ

ម៉ែន សារុន បង្កើន​​​វិនិយោគ​លើ​អង្ករ

ម៉ែន សារុន បង្កើន​​​វិនិយោគ​លើ​អង្ករ

20140214_11
អង្ករ​ក្រអូប​ដែល​កែច្នៃ​រួច​សម្រាប់​នាំ​ចេញ​របស់​ក្រុមហ៊ុន​នាំ​ចេញ​អង្ក​រ​មួយ​នៅ​ភ្នំពេញ ផា លីណា

ភ្នំពេញៈ ក្រុមហ៊ុន ម៉ែន សារុន បាន​វិនិយោគ​ទឹកប្រាក់​១០​លាន​ដុល្លារ​បន្ថែម​ទៀត ដើម្បី​ពង្រីក​ផលិត​ភាព​រោងម៉ាស៊ីន​កិនស្រូវ​របស់​ខ្លួន​ដើម្បី​ឆ្លើយតប​តាម​តម្រូវការ​កើនឡើង​នៃ​អង្ករ​ក្រអូប​កម្ពុជា​ក្នុង​ទីផ្សារ អន្តរជាតិ​។

លោក ជួន កុល អគ្គនាយករង​ក្រុមហ៊ុន ម៉ែន សារុន បាន​ប្រាប់​ភ្នំពេញ ប៉ុស្តិ៍​កាលពី​ថ្ងៃ​ម្សិលមិញ​ថា ទឹកប្រាក់​៣,៥ លាន​ដុល្លារ​នឹង​ត្រូវ​ចំណាយ ក្នុង​ការ​បង្កើន​ខ្សែចង្វាក់​ផលិតកម្ម មាន​ដូចជា ការ​ដំឡើង​ម៉ាស៊ីន​កិន​ស្រូវ​ថ្មី​មួយ​បន្ថែម​ទៀត​ដែល​មាន​សមត្ថភាព កិនស្រូវ ២៥​តោន​ក្នុង​មួយ​ម៉ោង​ឡ​សម្ងួត​ស្រូវ​ដែល​អាច​សម្ងួត​បាន​៤០០​តោន ក្នុង​មួយ​ថ្ងៃ និង​ម៉ាស៊ីន​ប៉ូលា​អង្ករ​បាន​២៥​តោន​ក្នុង​មួយ​ម៉ោង​។

បន្ថែម ពី​នេះ ឃ្លាំង​ស្កុក​ស្រូវ​ទំហំ​១​ម៉ឺន​ការ៉េ​នឹង​ត្រូវ​សង់​ឡើង​លើ​ផ្ទៃដី​២​ហិកតា​ជា​ផ្ទៃ​ដី​ពង្រីក​បន្ថែម​ពី​លើ​រោងម៉ាស៊ីន​ក្រុមហ៊ុន ម៉ែន សារុន​ដែល​មាន​ស្រាប់​នៅ​តាម​បណ្តាយ​ផ្លូវជាតិ​លេខ​៥ [ព្រែកព្នៅ​]។

ចំណែកឯ​ទឹកប្រាក់​ជាង​៦​លាន​ដុល្លារ​ទៀត ត្រូវ​បាន លោក ជួន កុល ឲ្យ​ដឹង​ថា​នឹង​ត្រូវ​ប្រើ​ជា​ទុន​សម្រាប់​បង្វិល​ទិញ​ស្រូវ​ពី​កសិករ ពី​ខេត្ត​ពោធិ៍សាត់ បាត់ដំបង សៀមរាប កំពង់ធំ និង​កំពង់ឆ្នាំង​។

លោក​មាន​ប្រសាសន៍​ថា​៖ «​ស្រូវ​អង្ករ​យើង​ត្រូវ​បរទេស​ចាប់​អារម្មណ៍​ច្រើន តម្រូវការ គេ​កាន់តែ​កើន ដូច្នេះ​យើង​ត្រូវ​បង្កើន​ការ​ផលិត​បន្ថែម​ដើម្បី​បំពេញ​តាម​តម្រូវការ​។ វា​ចេះ​តែ​កើន​»​។ លោក​ថា ការ​វិនិយោគ​នេះ​ជា​ការ​ត្រៀម​ខ្លួន​សម្រាប់​គោលដៅ​នាំ​ចេញ​អង្ករ​ឲ្យ​បាន មួយ​លាន​តោន​ឆ្នាំ​២០១៥​ដែល​កំណត់​ដោយ​រដ្ឋាភិបាល។

បច្ចុប្បន្ន ដំណើរការ​ដំឡើង​គ្រឿង​ម៉ាស៊ីន​ទាំងនេះ​បាន​រួចរាល់​ប្រហែល​៨០​ភាគរយ ហើយ​នឹង​ដំណើរ​សាកល្បង​ប្រើប្រាស់​នៅ​ដើម​ខែ​មេសា​ខាង​មុខ​នេះ​។

បើ តាម​លោក ជួន កុល ក្រុមហ៊ុន ម៉ែន សារុន កាលពី​ឆ្នាំ​២០១៣ នាំ​អង្ករ​ចេញ​បាន​៥​ពាន់​តោន​ដែល​ភាគច្រើន​ទៅ​ហុងកុង​និង​ទៅ​អឺរ៉ុប​។ ជាមួយ​នឹង​ការ​វិនិយោគ​នេះ ក្រុមហ៊ុន​គ្រោង​នាំ​ចេញ​អង្ករ​ឲ្យ​បាន​១​ម៉ឺន​តោន​ក្នុង​ឆ្នាំ​២០១៤​។

លោក កាន់ គន្ធី នាយកប្រតិបត្តិ​នៃ​ក្រុមហ៊ុន Battambang Rice Investment ដែល​ផ្តោត​លើ​ការ​នាំ​ចេញ​អង្ករ​ក្រអូប​ដែរ​នោះ និយាយ​ថា គោលដៅ​នាំ​អង្ករ​ក្រអូប​ឲ្យ​បាន​មួយ​ម៉ឺន​តោន​របស់​ក្រុមហ៊ុន ម៉ែន សារុន ទំនង​មិន​អាច​ទៅ​រួច​ទេ ព្រោះ​អង្ករ​កម្ពុជា​កំពុង​ប្រឈម​នឹង​ការ​ប្រកួតប្រជែង​ពី​ទីផ្សារ អង្ករ​ក្រអូប​ថៃ​ដល់​១០​លាន​តោន​ក្នុង​ស្តុក​។

អង្ករ​ក្រអូប​ផ្កា ម្លិះ​របស់​កម្ពុជា ទទួល​បាន​ការ​ចាប់​អារម្មណ៍​ពី​ទីផ្សារ​អន្តរជាតិ​ខ្លាំង បន្ទាប់ពី​ទទួល​បាន​ពាន​រង្វាន់​ជា​អង្ករ​ឆ្ងាញ់​ជាង​គេ​របស់​ពិភពលោក ពីរ​ឆ្នាំ​ជាប់ៗ​គ្នា លើក​ទី​មួយ​នៅ​ឆ្នាំ​២០១២ នៅ​ប្រទេស​ឥណ្ឌូនេស៊ី និង​លើក​ទី​ពីរ​នៅ​ទីក្រុង​ហុងកុង​ឆ្នាំ​២០១៣។

របាយការណ៍​ពី ក្រសួង​កសិកម្ម​បង្ហាញ​ថា រយៈពេល​មួយ​ខែ​ដំបូង​នៃ​ឆ្នាំ​២០១៤​នេះ កម្ពុជា​នាំ​ចេញ​អង្ករ​សរុប​បាន​ចំនួន​២១ ៥៣៦ តោន​ទៅ​ទីផ្សារ​អន្តរជាតិ​៕

អត្ថបទគួរចាប់អារម្មណ៍