ភ្នំពេញ: ម្ចាស់រោងម៉ាស៊ីនកិនស្រូវមួយចំនួនដែលស្ថិតនៅតំបន់វាយប្រហារដោយជំនន់ទឹកភ្លៀងមិនបង្អង់ការប្រមូលទិញស្រូវពីប្រជាកសិករជាមួយតម្លៃគោរពតាមកិច្ចសន្យាកសិកម្ម ដែលបានកំណត់ ទោះបីស្រូវទាំងនោះជោកជាំដោយសារទឹក ខណៈជំនន់ទឹកភ្លៀងនេះបានបង្កផលប៉ះពាល់ដំណាំស្រូវប្រមាណ ១១៦ ៧៦៤ ហិកតានៅក្របខ័ណ្ឌទូទាំងប្រទេស។
សហព័ន្ធស្រូវអង្ករកម្ពុជា និងធនាគារអភិវឌ្ឍន៍ជនបទនិងកសិកម្មបានអំពាវនាវឱ្យម្ចាស់រោងម៉ាស៊ីនប្រឹងប្រែងឱ្យអស់លទ្ធភាពដើម្បីប្រមូលទិញស្រូវពីប្រជាកសិករ។
លោក អៀង ហ៊ាង ម្ចាស់សហគ្រាសកិនស្រូវ អៀង ហ៊ាង ស្ថិតនៅក្នុងស្រុកសង្កែ ខេត្តបាត់ដំបងដែលកំពុងទទួលរងឥទ្ធិពលទឹកជំនន់នៅឡើយបានប្រាប់ ភ្នំពេញ ប៉ុស្តិ៍ ថា រហូតមកដល់ពេលនេះ លោកប្រមូលទិញស្រូវរបស់កសិករបានជាង ១០ ០០០ តោន ដែលមានតម្លៃមធ្យមចន្លោះពី ៩៥០ ទៅ ១ ០០០ រៀល ក្នុង ១ គីឡូក្រាម។
លោកបន្តថា លោកនៅតែបន្តទិញស្រូវពីកសិករដោយគ្មានការកំណត់។
លោកថ្លែងថា៖ «ខ្ញុំជួយទិញគាត់រាល់ថ្ងៃតាំងមុនទឹកជន់លិចរហូតដល់បច្ចុប្បន្ននេះ។ ខ្ញុំសូមអំពាវនាវឱ្យកសិករប្រមូលផលហើយត្រូវយកមកលក់ភ្លាមៗកុំផ្អាប់ទុកចោល ២ ទៅ ៣ ថ្ងៃនាំឱ្យខូចគុណភាពស្រូវ»។
ចំណែកអ្នកស្រី ប៉ាន់ ចន្ទ្រា ម្ចាស់រោងម៉ាស៊ីនកិនស្រូវ ថន ជា ស្ថិតនៅស្រុកអូររាំងឪ ខេត្តត្បូងឃ្មុំ ក៏បានប្រកាសប្រមូលទិញស្រូវសើមពីកសិករដោយគ្មានការកំណត់ដែរ ដោយ ១ ថ្ងៃអ្នកស្រីប្រមូលទិញស្រូវបានប្រមាណ ២០០ តោន។
កសិករភាគច្រើនមកពីខេត្តពោធិ៍សាត់ដែលរងផលប៉ះពាល់ជំនន់ទឹកភ្លៀងបានដឹកមកដល់រោងម៉ាស៊ីនរបស់អ្នកស្រី។
អ្នកស្រីនិយាយថា៖ «ខ្ញុំប្រមូលទិញស្រូវសើមទាំងអស់ឱ្យតែមានទិញក្នុងតម្លៃគោល ៩៥០ រៀល ក្នុង ១ គីឡូក្រាម ខ្ញុំត្រូវតែជួយទិញគាត់កុំឱ្យធ្លាក់ថ្លៃ»។
សហព័ន្ធស្រូវកម្ពុជា (CRF) នៅថ្ងៃទី ១៤ ខែតុលា និង ធនាគារអភិវឌ្ឍន៍ជនបទ និងកសិកម្ម (ARDB) នៅថ្ងៃទី ១៥ ខែតុលា នេះ បានអំពាវនាវស្រដៀងគ្នាឱ្យម្ចាស់រោងម៉ាស៊ីនកិនស្រូវប្រមូលទិញស្រូវពីកសិករដែលជន់លិចក្នុងអំឡុងប្រមូលផលដោយជំនន់ទឹកភ្លៀង។
បើតាម CRF ម្ចាស់រោងម៉ាស៊ីនកិនស្រូវអាចទទួលទិញស្រូវសើមនេះក្នុងតម្លៃតាមស្ថានភាពនៃគុណភាពស្រូវគឺចន្លោះតម្លៃ ៩០០ ទៅ ១ ១៣០ រៀល (លេខ១ តម្លៃ ១ ១៣០ រៀល លេខ ២ តម្លៃ ១ ០៣០ រៀលលេខ ៣ តម្លៃ ៩៥០ រៀល និងលេខ ៤ តម្លៃ ៩០០ រៀល។
គណៈកម្មាធិការជាតិគ្រប់គ្រងគ្រោះមហន្តរាយបានឱ្យដឹងថា គិតត្រឹមថ្ងៃទី ១៤ ខែតុលា នេះ ជំនន់ទឹកភ្លៀងបានបង្កផលប៉ះពាល់ស្រូវប្រមាណជាង ១១ ម៉ឺនហិកតា និងជិត ៥ ពាន់ហិកតាខូចទាំងស្រុង៕ LA