The Phnom Penh Post Search

Search form




Logo of Phnom Penh Post newspaper Phnom Penh Post - ម្រេច​កំពត​ទទួល​បាន​ការ​ការពារ​ពី​ EU

ម្រេច​កំពត​ទទួល​បាន​ការ​ការពារ​ពី​ EU

កសិករ​កំពុង​ពិនិត្យ​ម្រេច​ក្នុង​ចម្ការ​នៅ​ខេត្ត​កំពត​។
កសិករ​កំពុង​ពិនិត្យ​ម្រេច​ក្នុង​ចម្ការ​នៅ​ខេត្ត​កំពត​។ ម៉េង គឹមឡុង

ម្រេច​កំពត​ទទួល​បាន​ការ​ការពារ​ពី​ EU

ភ្នំពេញៈ សហភាព​អឺរ៉ុប​ (EU​) កាល​ពី​សប្តាហ៍​មុន​បាន​​ដាក់​​បញ្ចូល​ឈ្មោះ​ «​ម្រេច​កំពត​» របស់​កម្ពុជា​ជា​ផ្លូវការ​ទៅ​ក្នុង​បញ្ជី​ការពារ​ផលិតផល​ដើម​​របស់​ខ្លួន​ និង​​ការ​ចង្អុល​បង្ហាញ​ភូមិសាស្ដ្រ​ដែល​មាន​ការ​ការពារ​។ នេះ​បើ​យោង​សេចក្តី​ប្រកាស​ព័ត៌មាន​របស់​​សហភាព​អឺរ៉ុប​​កាលពី​សប្តាហ៍​មុន​។

សេចក្ដី​ប្រកាស​ព័ត៌មាន​នេះ​​បាន​ឲ្យ​ដឹង​ថា​ឈ្មោះ «​​ម្រេច​កំពត» ​ត្រូវ​បាន​ដាក់​បញ្ចូល​នៅ​ក្នុង​បញ្ជី​របស់​ EU កាលពី​ថ្ងៃ​ទី​ ២ ខែ​កុម្ភៈ​ជាមួយ​នឹង​បទប្បញ្ញតិ្ត​​ចូល​ជាធរមាន​នៅ​ដើម​ខែ​មីនា​។

លោក ងួន ឡាយ ប្រធាន​សមាគម​លើក​កម្ពស់​​ម្រេច​កំពត (KPPA) បាន​ថ្លែង​ថា​ការ​ទទួល​ស្គាល់​ផលិតផល​សម្គាល់​​ភូមិសាស្ដ្រ (GI) របស់​ EU នឹង​ជួយ​ការពារ​យីហោ​អន្តរជាតិ​ដែល​កំពុង​កើនឡើង​របស់​ផលិតផល​នេះ​។

លោក​បាន​ថ្លែង​ថា​ម្រេច​ជាច្រើន​ដែល​មិន​បាន​ផលិត​​យោង​​តាម​តម្រូវការ​តឹងរ៉ឹង​នៃ​ស្លាក​សញ្ញា​ GI កំពុង​ធ្វើ​ឲ្យ​ខូច​ប្រយោជន៍​ដល់​កិច្ច​ខិតខំ​ប្រឹងប្រែង​រក​ទីផ្សារ​របស់​ខ្លួន។​

លោក​​លើក​​ឡើង​ថា​៖ «​វា​ពិតជា​មាន​សារៈសំខាន់​ [​ក្នុង​ការ​ធានា​ដល់​ការ​ចុះ​បញ្ជី​របស់ EU ​]​ ដោយសារ​តែ​ផលិតផល​របស់​យើង​​ល្បី​ឈ្មោះ​នៅក្នុង​អឺរ៉ុប​ប៉ុន្តែ​មាន​ម្រេច​ជាច្រើន​ដែល​​បាន​រកឃើញ​ថា​មិន​ត្រូវ​​បាន​ផលិត​ដោយ​សមាជិក​របស់​​សមាគម​របស់​យើង​»​។

KPPA ជា​ស្ថាប័ន​តែ​មួយ​គត់​​ដែល​បាន​ទទួល​អាជ្ញាប័ណ្ណ​ក្នុង​ការ​​ផលិត​ និង​នាំ​ចេញ​គ្រាប់​ម្រេច​មាន​យីហោ​ជា​ម្រេច​កំពត​។ សមាជិក​របស់​ខ្លួន​បាន​ផលិត​​ម្រេច​​បាន​​ ៦០ ​តោន​កាលពី​ឆ្នាំ​មុន​ដែល​ក្នុង​ចំណោម​នោះ ៧០ ​​ភាគរយ​ត្រូវ​បាន​នាំ​ចេញ​។ EU គឺជា​​ទីផ្សារ​ធំ​ជាង​គេ​។

ម្រេច​កំពត​ត្រូវ​ចុះ​បញ្ជី​នៅក្នុង​ប្រទេស​ថៃ និង​វៀតណាម​កាលពី​ឆ្នាំ​មុន​ដើម្បី​ការពារ​ឈ្មោះ​យីហោ​ពី​ការ​ក្លែង​បន្លំ​នៅ​ទី​នោះ​។ នេះ​បើ​យោង​តាម​លោក ងួន ឡាយ​៕LA

អត្ថបទគួរចាប់អារម្មណ៍