The Phnom Penh Post Search

Search form




Logo of Phnom Penh Post newspaper Phnom Penh Post - យក​ស្តុក​ស្រូវ​ជា​វត្ថុ​បញ្ចាំ​នៅ​តែ​ជា​បញ្ហា​សម្រាប់​ទទួល​បាន​កម្ចី

យក​ស្តុក​ស្រូវ​ជា​វត្ថុ​បញ្ចាំ​នៅ​តែ​ជា​បញ្ហា​សម្រាប់​ទទួល​បាន​កម្ចី

យក​ស្តុក​ស្រូវ​ជា​វត្ថុ​បញ្ចាំ​នៅ​តែ​ជា​បញ្ហា​សម្រាប់​ទទួល​បាន​កម្ចី

20140313_12
កម្មករកំពុងលើកស្រូវនៅក្រុមហ៊ុនកែច្នៃអង្ករក្នុងស្រុកមួយ

ភ្នំពេញៈ ការ​ទទួល​យក​ស្រូវ​ក្នុង​ស្តុក​ជា​ទ្រព្យ​បញ្ចាំ​ដើម្បី​ទទួល​បាន​កម្ចី នៅ​តែ​ជា​ឧបសគ្គ​សម្រាប់​វិស័យ​ស្រូវ​អង្ករ​នៅ​កម្ពុជា ខណៈ​អ្នក​ជំនាញ​និយាយ​ថា ដំណើរការ​របស់​រោង​ម៉ាស៊ីន​កិន​ស្រូវ​នៅ​មិន​ទាន់​ឆ្លើយតប​ទៅ​នឹង តម្រូវការ​របស់​ស្ថាប័ន​ហរិញ្ញវត្ថុ​នៅ​ឡើយ​ទេ​។

លោក លឹម ប៊ុនហេង អគ្គនាយក​ក្រុមហ៊ុន​ឡូរ៉ង់ និង​ជា​សហប្រធាន​នៃ​ក្រុម​ការងារ​វិស័យឯកជន​ផ្នែក​ស្រូវ​អង្ករ បាន​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា កត្តា​ខ្វះ​ទុន​ក្នុង​ការ​ទិញ​ស្រូវ​ស្តុក​ទុក​នៅ​តែ​ជា​ឧបសគ្គ​សម្រាប់ រោង​ម៉ាស៊ីន​កិន​ស្រូវ​ក្នុង​ស្រុក​ជាច្រើន​។

លោក​ថ្លែង​ថា​៖ «​យើង​មាន​លុយ​តិចតួច នៅពេល​យើង​ទិញ​ស្រូវ​អស់​ហើយ យើង​ចង់​យក​ស្រូវ​ទៅ​បញ្ចាំ​យក​ទុន​បន្ថែម​ទៀត​។ រហូត​មក​ទល់​ពេល​នេះ មិន​ទាន់​មាន​ធនាគារ​ដែល​ព្រម​យក​ស្រូវ​ធ្វើ​ជា​របស់​បញ្ចាំ​ទេ​»។

លោក​បន្ត​ថា ធនាគារ​ទទួល​យក​តែ​អចលនទ្រព្យ​ជា​របស់​បញ្ចាំ​ប៉ុណ្ណោះ ហើយ​ការ​វាយតម្លៃ​លើ​អចលនទ្រព្យ​នោះ​មាន​កម្រិត​ទាប​។

ពាក់ព័ន្ធ នឹង​បញ្ហា​ប្រាក់កម្ចី​នេះ​ដែរ លោក អ៊ិន ចាន់នី អគ្គនាយក​និង​នាយក​ប្រតិបត្តិ​ធនាគារ​អេស៊ីលីដា​បាន​ឲ្យ​ដឹង​ថា ស្ថាប័ន​របស់​លោក​ធ្លាប់​អនុវត្ត​កន្លង​មក​ហើយ​ក្នុង​ការ​ទទួល​យក​ស្តុក ស្រូវ​ជា​ទ្រព្យបញ្ចាំ​។ ទោះ​យ៉ាង​ណា លោក​បញ្ជាក់​ថា អតិថិជន​ត្រូវ​ភ្ជាប់​មក​ជាមួយ​របាយការណ៍​ហរិញ្ញវត្ថុ​ដែល​បង្ហាញ ពី​ស្ថានភាព​ហរិញ្ញវត្ថុ​រយៈពេល​៣​ឆ្នាំ​ចុងក្រោយ​របស់​ក្រុមហ៊ុន នោះ​។

លោក​បាន​ពន្យល់​ដូច្នេះ​ថា អចលនទ្រព្យ​ដូចជា ដី ផ្ទះ អគារ​ជាដើម គឺជា​ទ្រព្យបញ្ចាំ​សំខាន់​ទី​មួយ​ក្នុង​ការ​ទទួល​បាន​ប្រាក់កម្ចី​ពី ធនាគារ​។ លោក​បន្ត​ថា​៖ «​ប្រសិន​ជា​មិន​មាន ដី អគារ​គ្រប់​ទេ មាន​ន័យ​ថា តម្លៃ​ទ្រព្យ​ដែល​ធានា​នោះ​មិន​ស្មើ​នឹង​ឥណទាន​ដែល​ផ្តល់​ឲ្យ​ទេ នោះ​ត្រូវ​តែ​មាន​របាយការណ៍​ហរិញ្ញវត្ថុ​ដែល​បញ្ជាក់​ពី​លំហូរ​សាច់ ប្រាក់​របស់​អតិថិជន​ភ្ជាប់​មក​»។

តាម​លោក អ៊ិន ចាន់នី កាលពី​ឆ្នាំ​២០១៣ ធនាគារ​អេស៊ីលីដា​បាន​ផ្តល់​កម្ចី​ដល់​វិស័យ​កសិកម្ម​រហូត​ដល់​៣២៣ លាន​ដុល្លារ ពោល​គឺ​ស្មើ​នឹង​១៩​ភាគរយ​នៃ​ឥណទាន​សរុប​របស់​ធនាគារ​ដែល​មាន​១ ៧០០​លាន​ដុល្លារ​។

ទោះ ជា​យ៉ាង​នេះ​ក្តី លោក​មិន​លើក​ទឹកចិត្ត​ឲ្យ​រោង​ម៉ាស៊ីន​កិនស្រូវ​ពឹងផ្អែក​លើ​ការ​យក ស្រូវ​ជា​ទ្រព្យ​បញ្ចាំ​នោះ​ទេ។ លោក​បន្ថែម​ថា កន្លង​មក​មិន​មាន​ធនាគារ​ច្រើន​ដែល​ទទួល​យក​ស្រូវ​ជា​ទ្រព្យ​បញ្ចាំ ព្រោះ​ស្រូវ​ជា​ទ្រព្យ​ដែល​ប្រឈម​នឹង​ហានិភ័យ​ខ្ពស់ មាន​ដូចជា ការ​ឆេះ ការ​ងាយស្រួល​ក្នុង​ការ​ដឹក​ពី​កន្លែង​មួយ​ទៅ​កន្លែង​មួយ ហើយ​ស្រូវ​អាច​នឹង​ស្រក​ទម្ងន់​ប្រសិន​បើ​ទុក​ក្នុង​ឃ្លាំង​យូរ។

លោក អ៊ិន ចាន់នី បន្ត​ថា ក្នុង​ករណី ធនាគារ​ត្រូវ​យក​ស្រូវ​ក្នុង​ស្តុក​ទាំងអស់​ជា​ទ្រព្យ​បញ្ចាំ គឺ​ស្រូវ​ទាំងអស់​នឹង​ត្រូវ​បញ្ជូន​ទៅ​ដាក់​នៅក្នុង​ឃ្លាំង​ដាច់​ដោយឡែក ដែល​នឹង​ស្ថិត​ក្រោម​ការ​គ្រប់គ្រង​របស់​ស្ថាប័ន​ឯករាជ្យ​មួយ​ដែល​មាន ជំនាញ និង​ទទួល​សេវាកម្ម​ទុក​ដាក់​ស្រូវ ហើយ​ថ្លៃ​ការ​គ្រប់គ្រង អតិថិជន​ជា​អ្នក​ចំណាយ​។ លោក​បន្ត​ថា កន្លង​មក​ឧបសគ្គ​គឺ រោង​ម៉ាស៊ីន​កិនស្រូវ​ក្នុង​ស្រុក​មិន​អាច​ផ្តល់​របាយការណ៍​ហរិញ្ញ វត្ថុ​ដល់​ធនាគារ​។

លោក សុខ ដេវិដ អនុប្រធាន​ក្រុមហ៊ុន Golden Rice Cambodia ស្វាគមន៍​ចំពោះ​ព័ត៌មាន​ដែល​ធនាគារ​ទទួល​ស្តុក​ស្រូវ​ជា​របស់​បញ្ចាំ​។

លោក​ថា កត្តា​នេះ​នឹង​ជួយ​ដល់​អ្នក​កិន​ស្រូវ​នៅ​កម្ពុជា បើ​រោង​ម៉ាស៊ីន​កិន​ស្រូវ​នីមួយៗ​មាន​ការ​រៀបចំ​របាយការណ៍​ហរិញ្ញវត្ថុ​ត្រឹមត្រូវ​។ លោក​បាន​បន្ត​ថា កម្ពុជា​នៅ​មាន​រោងម៉ាស៊ីន​កិន​ស្រូវ និង​ក្រុមហ៊ុន​នាំ​អង្ករ​ចេញ​ច្រើន​ដែល​អនុវត្ត​អាជីវកម្ម​បែប​ប្រពៃណី​នៅ ឡើយ។

លោក Grant Knuckey នាយកប្រតិបត្តិ​នៃ​ធនាគារ ANZ និយាយ​ថា ធនាគារ​បាន​ផ្តល់​ប្រាក់កម្ចី​ដល់​វិស័យ​កសិកម្ម​ក្នុង​ចំណែក​ដែល គួរ​ឲ្យ​កត់សម្គាល់​មួយ។ លោក​ហៅ​ការ​ទទួល​ស្រូវ​ជា​ទ្រព្យ​បញ្ចាំ​មាន​លក្ខណៈ​ជា​ទ្រឹស្តី ប៉ុន្តែ​ដើម្បី​ទទួល​ហរិញ្ញ​ប្បទាន​ពី​ការ​យក​ឃ្លាំង​ជា​ទ្រព្យ​បញ្ចាំ វា​ទាមទារ​ឲ្យ​មាន​អ្នក​ជំនាញ​ការ មាន​អ្នក​មើលការ​ខុស​ត្រូវ​លើ​ឃ្លាំង​នោះ​និង​ត្រូវ​ទាមទារ​ឲ្យ​មាន​បទដ្ឋាន​គតិយុត្ត​ដ៏​ត្រឹមត្រូវ​៕

អត្ថបទគួរចាប់អារម្មណ៍