ភ្នំពេញៈ មន្ដ្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃពុធបានឲ្យដឹងថា ចំណាត់ការលើកទឹកចិត្តពន្ធ និងការប្រើប្រាស់កញ្ចប់ថវិកាបម្រុងរដ្ឋាភិបាល គឺជាកម្លាំងចលករមួយដ៏រឹងមាំ និងមានប្រសិទ្ធភាពក្នុងការបន្តជំរុញចរន្តសេដ្ឋកិច្ចកម្ពុជាដែលកំពុងទទួលរងផលប៉ះពាល់ពីការរីករាលដាលនៃជំងឺកូវីដ ១៩ នាពេលបច្ចុប្បន្ន ខណៈធនាគារពិភពលោកបានទម្លាក់ការព្យាករកំណើនសេដ្ឋកិច្ចកម្ពុជាមកនៅត្រឹម ២,៥ ភាគរយ ក្នុងឆ្នាំ ២០២០។
ធនាគារពិភពលោក (WB) បានចេញផ្សាយរបាយការណ៍មួយកាលពីថ្ងៃអង្គារថា កំណើនសេដ្ឋកិច្ចពិតរបស់កម្ពុជាត្រូវបានព្យាករថា នឹងធ្លាក់ចុះខ្លាំងមកនៅត្រឹម ២,៥ ភាគរយ ក្នុងឆ្នាំ ២០២០ ប៉ុន្តែការស្ទុះងើបឡើងវិញ ៥,៩ ភាគរយ ក្នុងឆ្នាំ ២០២១ ស្ថិតក្រោមសេណារីយោមូលដ្ឋាន។
វិស័យទេសចរណ៍ត្រូវបានរងផលប៉ះពាល់ខ្លាំងដោយការរីករាលដាលនេះ ខណៈដែលឧស្សាហកម្មកាត់ដេរកំពុងប្រឈមនឹងវិបត្តិតម្រូវការពិភពលោក ព្រមទាំងការដកមួយផ្នែកនៃការអនុគ្រោះពាណិជ្ជកម្ម «អ្វីៗគ្រប់យ៉ាងលើកលែងតែអាវុធ» (EBA)។
របាយការណ៍ឲ្យដឹងថា៖ «ផលប៉ះពាល់លើវិស័យសំណង់ និងអចលនទ្រព្យ ដែលកត្តាមួយក្នុងចំណោមកត្តាជំរុញកំណើនជាច្រើនរបស់ប្រទេស កម្ពុជា ចំពេលភាពចលាចលទីផ្សារហិរញ្ញវត្ថុអាចធ្វើឲ្យប៉ះពាល់ទៅដល់កំណើន។ ការស្ទុះងើបឡើងវិញសកម្មភាពសេដ្ឋកិច្ចនៅក្នុងប្រទេស ចិន និងទីផ្សារសំខាន់ៗក្នុងឆ្នាំ ២០២០ បង្កើនចក្ខុវិស័យកំណើនរបស់ប្រទេស កម្ពុជា នៅឆ្នាំក្រោយ»។
លោក មាស សុខសែនសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុបានប្រាប់ភ្នំពេញប៉ុស្ដិ៍កាលពីថ្ងៃពុធថា លោកមិនបដិសេធ ហើយក៏មិនឯកភាពលើការព្យាករដោយធនាគារពិភពលោកលើការទម្លាក់កំណើនសេដ្ឋកិច្ចរបស់កម្ពុជានៅឆ្នាំនេះ ដោយលោកលើកឡើងថា រដ្ឋាភិបាលនៅតែប្រើប្រាស់ការព្យាករលើកមុនចំនួន ៦ ភាគរយទោះបីជាផលប៉ះពាល់ដោយសារតែកូវីដ១៩ ក៏ដោយ។
លោកលើកឡើងថា៖ «រហូតមកដល់ពេលនេះរដ្ឋាភិបាលមិនទាន់ធ្វើការវាយតម្លៃណាមួយលើផលប៉ះពាល់សេដ្ឋកិច្ចនោះទេ។ យើងកំពុងត្រួតពិនិត្យទិដ្ឋភាពទាំងអស់នៃសេដ្ឋកិច្ចមុនពេលយើងធ្វើការវាយតម្លៃជាថ្មីសម្រាប់សេដ្ឋកិច្ច»។
លោកបន្ថែមថា៖ «នៅពេលបច្ចុប្បន្នយើងនៅតែប្រើការព្យាករកំណើនរបស់យើងចំនួន ៦ ភាគរយ នៃកំណើនសេដ្ឋកិច្ចរបស់កម្ពុជាដែលបានព្យាករនាពេលកន្លងមក។ ទោះយ៉ាងណា យើងបន្តត្រួតពិនិត្យផលប៉ះពាល់ពីជំងឺកូវីដ១៩ និងថា តើវានឹងអូសបន្លាយរយៈពេលយូរប៉ុន្មានដើម្បីយើងនឹងវាយតម្លៃសេដ្ឋកិច្ចឡើងវិញ»។
លោក Raymond Sia អគ្គនាយកធនាគារកាណាឌីយ៉ាបានឲ្យដឹងថា ប្រទេសកម្ពុជានឹងទទួលរងផលប៉ះពាល់ដោយសារតែការរីករាលដាលរបស់កូវីដ១៩ ខណៈវាកំពុងប៉ះពាល់ដល់ទាំងអស់គ្នា «មិនមានប្រទេសណាមួយនៅលើពិភពលោករួចផុតពីផលប៉ះពាល់អវិជ្ជមានដោយសារតែស្ថានការណ៍កូវីដ ១៩ បច្ចុប្បន្ននេះទេ។ ប្រទេសកម្ពុជាដែលអនុវត្តសេដ្ឋកិច្ចទីផ្សារបើកចំហក៏នឹងទទួលរងផលប៉ះពាល់នេះដែរ»។
លោកបញ្ជាក់ថា៖ «ទោះយ៉ាងណាយើងជឿថា វិធានការនានាដែលបានដាក់ឲ្យដំណើរការដោយរដ្ឋាភិបាល និងធនាគារជាតិនៃកម្ពុជានឹងកាត់បន្ថយផលប៉ះពាល់អវិជ្ជមាន និងក៏ផ្ដល់ភាពធូរស្រាលមួយចំនួនទាំងអតិថិជន និងគ្រឹះស្ថានហិរញ្ញវត្ថុក្នុងអំឡុងពេលជួបការលំបាកនេះ»។
កាលពីដើមខែមីនាលោកនាយករដ្ឋមន្ដ្រី ហ៊ុន សែន បានឲ្យដឹងថា រដ្ឋាភិបាលបានទុកប្រាក់ចន្លោះពី ៨០០ ដល់ ២ ពាន់លានដុល្លារ ដើម្បីកាត់បន្ថយផលប៉ះពាល់សេដ្ឋកិច្ចដោយសារតែការរីករាលដាលកូវីដ ១៩ ក្នុងចំនួននោះ ប្រាក់ ៨០០ លានដុល្លារ សម្រាប់អំឡុងពេល ៦ ខែ និង ២ ពាន់លានដុល្លារ ប្រសិនបើជំងឺនេះមានរយៈពេលយូររហូតដល់ ១ ឆ្នាំ ឬកាន់តែយូរជាងនេះ។
កាលពីថ្ងៃទី ៣១ ខែមីនា រដ្ឋាភិបាលកម្ពុជាបានចេញកញ្ចប់លើកទឹកចិត្តជុំទី ២ តាមរយៈការផ្ដល់ការលើកលែងពន្ធអប្បបរមារយៈពេល ៣ ខែសម្រាប់វិស័យអាកាសចរណ៍ និងការលើកលែងលើពន្ធប្រចាំខែគ្រប់ប្រភេទទាំងអស់សម្រាប់ប្រតិបត្តិករទេសចរណ៍។ ការលើកលែងពន្ធអប្បបរមា ១០ ភាគរយ អនុវត្តចាប់ពីខែមីនាដល់ខែឧសភា សម្រាប់ក្រុមហ៊ុនអាកាសចរណ៍ដែលប្រតិបត្តិការនៅក្នុងប្រទេស កម្ពុជា។
រដ្ឋាភិបាលក៏បង្កើនទំហំនៃយន្តការរួមចំណែកឧបត្ថម្ភ ២០ ភាគរយ របស់ខ្លួនដល់កម្មករ និងបុគ្គលិកដែលរងផលប៉ះពាល់ដោយការផ្អាកប្រតិបត្តិការនៅក្នុងវិស័យទេសចរណ៍។
លោក សុខ សែនសាន បានឲ្យដឹងថារហូតមកដល់ពេលនេះរដ្ឋាភិបាលកំពុងប្រើប្រាស់កញ្ចប់លើកទឹកចិត្តនេះ។ គិតត្រឹមថ្ងៃទី ៣១ ខែមីនា រដ្ឋាភិបាលបានដាក់ចេញកញ្ចប់លើកទឹកចិត្តជុំទី ២ រួចហើយ។
លោកបន្ថែមថា៖ «កាលពីថ្ងៃអង្គារនៅក្នុងសេចក្ដីប្រកាសមួយនៃកញ្ចប់លើកទឹកចិត្តរបស់រដ្ឋាភិបាលបានចង្អុលបង្ហាញថា យើងមិនមានការបារម្ភច្រើននោះទេ ដោយសារតែរដ្ឋាភិបាលនៅតែចេញកញ្ចប់លើកទឹកចិត្តដើម្បីបង្កើនសេដ្ឋកិច្ច»៕ LA