.jpg)
យន្តហោះ Boeing 7879 ដែលហោះហើររយៈចម្ងាយឆ្ងាយបំផុត ពីទីក្រុងញូវយ៉កទៅទីក្រុងស៊ីតនីឥតឈប់។
ក្រុងស៊ីដនីៈ ជើងហោះហើរឥតឈប់រយៈចម្ងាយឆ្ងាយបំផុតបានចុះចតនៅប្រទេស អូស្ត្រាលី កាលពីព្រឹកថ្ងៃអាទិត្យ បន្ទាប់ពីហោះហើរជាង ១៩ ម៉ោងនៅលើអាកាសពោលគឺជា ការធ្វើដំណើរដ៏សំខាន់មួយពីទីក្រុងញូវយ៉កដែលក្រុមហ៊ុនអាកាសចរណ៍ Qantas សង្ឃឹមថានឹងទទួលបានជោគជ័យក្នុងការធ្វើពាណិជ្ជកម្ម។
ជើងហោះហើរលេខ QF7879 របស់ក្រុមហ៊ុនអាកាសចរណ៍ Qantas បានចំណាយពេល ១៩ ម៉ោង និង ១៦ នាទី ដើម្បីហោះហើរត្រង់ពីទីក្រុងញូវយ៉កទៅកាន់ទីក្រុងស៊ីដនីនៅក្នុងការហោះហើរទីមួយក្នុងចំណោមការធ្វើដំណើរ «រយៈចម្ងាយឆ្ងាយខ្លាំង» ចំនួន ៣ ដែលគ្រោងធ្វើឡើងដោយក្រុមហ៊ុនក្នុងឆ្នាំនេះ។
ក្រុមហ៊ុនអាកាសចរណ៍ជាតិរបស់ប្រទេសអូស្ត្រាលីនេះកំពុងប្រតិបត្តិការការហោះហើរសាកល្បងនេះដែលក៏រួមបញ្ចូលទាំងការហោះហើរមួយពីទីក្រុងឡុងដ៍ទៅកាន់ទីក្រុងស៊ីដនីផងដែរ ខណៈក្រុមហ៊ុនពិចារណាដាក់ដំណើរការសេវាជាប្រចាំលើផ្លូវឆ្ងាយពីសហរដ្ឋអាមេរិក និងអង់គ្លេសទៅកាន់ប្រទេស អូស្ត្រាលី។
មានមនុស្សត្រឹមតែ ៤៩ នាក់ប៉ុណ្ណោះ ដែលបានធ្វើដំណើរនៅលើយន្តហោះ Boeing 7879 ដើម្បីកាត់បន្ថយទម្ងន់ផ្ទុកនៅលើយន្តហោះ និងផ្តល់ឲ្យយន្តហោះនូវកម្រិតស៊ីសាំងតិច ដើម្បីធ្វើដំណើរបានជាង ១៦ ០០០ គីឡូម៉ែត្រ ដោយមិនមានការចាក់សាំងឡើងវិញ។
លោក Alan Joyce អគ្គនាយកក្រុមហ៊ុន Qantas បានហៅការធ្វើដំណើរនេះថាជា «ប្រវត្តិសាស្ត្រពិតមួយ» ទាំងសម្រាប់ក្រុមហ៊ុនរបស់លោក និងអាកាសចរណ៍ពិភពលោក។
លោកថ្លែងថា៖ «នេះជាជើងហោះហើរទី ១ ក្នុងចំណោមជើងហោះហើរសាកល្បងចំនួន ៣ ដែលបង្ហាញពីរបៀបដែលយើងគ្រប់គ្រងភាពហត់នឿយរបស់អ្នកបើកបរ និងរបៀបដែលយើងគ្រប់គ្រងយន្តហោះ»៕ KC
