.jpg)
យន្តហោះ ARJ21 របស់ចិន ដែលហោះហើរក្នុងពេលកន្លងមក។ រូបថត People's Daily
ក្រុងប៉េកាំងៈ យន្តហោះ ARJ21 ដែលផលិតនៅក្នុងប្រទេសចិនបានបញ្ចប់ការហោះហើរសាកល្បងសីតុណ្ហភាពខ្ពស់នៅទីក្រុង Turpan ជាតំបន់ស្វយ័ត Xinjiang Uygur របស់ប្រទេសចិនភាគពាយព្យ។ នេះបើយោងតាមក្រុមហ៊ុនផលិតយន្តហោះមួយនេះកាលពីថ្ងៃអង្គារ។
ក្រុមហ៊ុន Commercial Aircraft Corporation of China (COMAC) របស់រដ្ឋចិន បានឲ្យដឹងថា យន្តហោះនេះបានចំណាយពេល ១២ ថ្ងៃនៅទីក្រុង Turpan ដោយសាកល្បងប្រតិបត្តិការ និងអនុវត្តប្រព័ន្ធដែលពាក់ព័ន្ធរបស់យន្តហោះម៉ូដែលនេះ។
ទីក្រុង Turpan មានចម្ងាយប្រហែល ១៥០ គីឡូម៉ែត្រភាគខាងត្បូងនៃទីក្រុង Urumqi។ ទីក្រុងមានឈ្មោះល្បីខាងបរិយាកាសវាលខ្សាច់ដ៏អាក្រក់ខ្លាំង ជាពិសេសរដូវក្ដៅហួតហែងខ្លាំង។
ការហោះហើរសាកល្បង ត្រូវបានធ្វើឡើងដើម្បីពង្រឹងបន្ថែមទៀតឲ្យបានកាន់តែប្រសើរដល់ប្រព័ន្ធ ARJ21 ខណៈដែលក្រុមហ៊ុនកំពុងខិតខំប្រឹងប្រែងផ្ដល់ម៉ូដែលយន្តហោះដែលមានទម្ងន់ស្រាល ស៊ីសាំងតិច និងដែលអាចថែទាំងបានងាយស្រួល។ នេះបើយោងតាម COMAC ។
យន្តហោះ ARJ21 មានកន្លែងអង្គុយពី ៧៨ ទៅ ៩០ កៅអី មានរយៈចម្ងាយហោះហើរ ៣ ៧០០ គីឡូម៉ែត្រ និងជាយន្តហោះដឹកអ្នកដំណើរក្នុងតំបន់លើកដំបូងដែលប្រទេសចិន បានអភិវឌ្ឍឡើង ដោយប្រើប្រាស់ស្ដង់ដារហោះហើរអន្តរជាតិ។
យន្តហោះនេះបានចាប់ផ្ដើមជើងហោះហើរពាណិជ្ជកម្មនៅកាលពីថ្ងៃទី២៨ ខែមិថុនា ឆ្នាំ២០១៦ ដោយផលិតកម្មទ្រង់ទ្រាយធំចាប់ផ្ដើមកាលពីខែកញ្ញា ឆ្នាំ ២០១៧។
ក្រុមហ៊ុន Chengdu Airlines ដែលជាក្រុមហ៊ុនអាកាសចរណ៍ដំបូងដែលប្រើយន្តហោះ ARJ21 បានប្រើប្រាស់យន្តហោះនេះចំនួន ៥ គ្រឿងសម្រាប់ផ្លូវហោះហើរ ៨ ដែលតភ្ជាប់ទីក្រុងរបស់ប្រទេសចំនួន ១៥៕ People’s Daily/LA
