.jpg)
ភ្ញៀវទេសចរជាតិ និងអន្តរជាតិ មកទស្សនាប្រសាទអង្គរវត្តមុនការរីករាលដាលជំងឺកូវីដ ១៩។ ហុង មិនា
ភ្នំពេញៈ ក្រសួងទេសចរណ៍បានរៀបចំនូវសេចក្តីព្រាងយុទ្ធសាស្ត្រដើម្បីធ្វើជាផែនទីបង្ហាញផ្លូវ សម្រាប់ផែនការស្តារ និងលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ ១៩ ខណៈវិស័យនេះចាប់ផ្តើមមានពន្លឺឡើងវិញខ្លះៗហើយ ក្រោយពីប្រទេសមួយចំនួនចាប់ផ្តើមចាក់វ៉ាក់សាំងកូវីដ ១៩ ទៅដល់ប្រជាជនរបស់គេ។
បន្ទាប់ពីឆ្លងកាត់កិច្ចប្រជុំជាមួយគណៈកម្មាធិការជាតិអភិវឌ្ឍន៍ទេសចរណ៍ និងអ្នកពាក់ព័ន្ធរួចមក សេចក្តីព្រាងយុទ្ធសាស្ត្រស្តីពីផែនការស្តារ និងលើកស្ទួយវិស័យទេសចរណ៍ក្នុង និងក្រោយវិបត្តិជំងឺកូវីដ ១៩ ឆ្នាំ ២០២០-២០២៥ ត្រូវចែកចេញជា ៣ ដំណាក់កាលគឺការគ្រប់គ្រងវិបតិ្តក្នុងដំណាក់កាលទម្លាប់ថ្មី និងការរៀបចំផែនការស្តារឡើងវិញ (២០២០-២០២១), ការស្តារឡើងវិញនៃវិស័យទេសចរណ៍កម្ពុជាក្រោយវិបត្តិកូវីដ ១៩ (២០២២-២០២៣),និងការរៀបចំឆ្ពោះទៅកាន់អនាគតថ្មីនៃវិស័យទេសចរណ៍កម្ពុជា (២០២៤-២០២៥)។
លោក តុប សុភ័ក អ្នកនាំពាក្យក្រសួងទេសចរណ៍បានប្រាប់ ភ្នំពេញ ប៉ុស្តិ៍ កាលពីថ្ងៃចន្ទថា សេចក្តីព្រាងយុទ្ធសាស្ត្រនេះត្រូវបានរៀបចំឡើងក្នុងគោលបំណងដើម្បីធ្វើឱ្យវិស័យទេសចរណ៍កម្ពុជាអាចបន្តនិរន្តរភាពរបស់ខ្លួនក្នុងបរិបទថ្មីនៃការឆ្លងរាលដាលជំងឺកូវីដ ១៩ និងការត្រៀមខ្លួនពេលជំងឺនេះបញ្ចប់ទៅវិញ។
លោកបន្តថា ចាប់ពីកូវីដ ១៩ ផ្ទុះឡើងក្រសួងបានធ្វើកិច្ចការជាច្រើន ដើម្បីជួយទ្រទ្រង់វិស័យនេះឱ្យមាននិរន្តរភាពដូចជា ការដាក់ចេញវិធានការប្រយុទ្ធប្រឆាំងនឹងការរីករាលដាលជំងឺកូវីដ ១៩ ការបង្កើតផលិតផលទេសចរណ៍ថ្មីៗ និងការបណ្តុះបណ្តាលធនធានមនុស្ស។
លោកនិយាយថា៖ «សេចក្តីព្រាងយុទ្ធសាស្ត្រនេះនឹងក្លាយជាផែនទីចង្អុលបង្ហាញដើម្បីធ្វើយ៉ាងណាពង្រឹងគោលដៅទេសចរណ៍របស់យើងឱ្យក្លាយទៅជាគោលដៅទេសចរណ៍មានសុវត្ថិភាព ផ្តល់ភាពកក់ក្តៅ និងទំនុកចិត្តពីគ្រប់មជ្ឈដ្ឋាន ព្រមទាំងដើរស្របតាមបរិបទគន្លងថ្មីនៃវិស័យទេសចរណ៍ពិភពលោក»។
ទាក់ទងក្តីរំពឹងពីចំនួនភ្ញៀវទេសចរបរទេសធ្វើដំណើរមកកម្ពុជា លោក សុភ័ក ប្រាប់ថា៖ «មានសេណារីយោចំនួន ២ គឺទី ១ បើកូវីដ ១៩ អាចគ្រប់គ្រងបានទាំងស្រុងនៅក្នុងឆ្នាំ ២០២១ កម្ពុជារំពឹងថា នៅឆ្នាំ ២០២៣ វិស័យនេះនឹងមានសម្ទុះឡើងវិញ ហើយចំនួនតួលេខភ្ញៀវទេសចរបរទេសអាចមានប្រហាក់ប្រហែលឆ្នាំ ២០១៩។ ទោះយ៉ាងណាបើពិនិត្យមើលទៅលើស្ថានភាពពេលនេះ គឺវ៉ាក់សាំងនៅមិនទាន់មានភាពច្បាស់លាស់ ១០០ ភាគរយទេ ដូច្នេះស្ថានភាពទេសចរណ៍កម្ពុជានឹងអាចចូលសេណារីយោ ទី ២ ដោយវានឹងអាចត្រូវការពេលរហូតដល់ឆ្នាំ ២០២៥ ទើបមានភាពល្អប្រសើរដូចក្នុងអំឡុងឆ្នាំ ២០១៩»។
ទិន្នន័យពីក្រសួងទេសចរណ៍បានបង្ហាញថា កាលពីឆ្នាំ ២០១៩ កម្ពុជាទទួលបានភ្ញៀវទេសចរបរទេសសរុប ៦,៦១ លាននាក់ កើន ៦,៦ ភាគរយពីចំនួន ៦,២ លាននាក់ក្នុងឆ្នាំ ២០១៨។
ប្រធានសមាគមទេសចរណ៍អាស៊ីប៉ាស៊ីហ្វិកកម្ពុជាលោក ធួន ស៊ីណាន បានលើកឡើងថា បើទោះបីមិនទាន់គ្រប់ជ្រុងជ្រោយ ប៉ុន្តែលោកគិតថា សេចក្តីព្រាងយុទ្ធសាស្ត្រដែលមាន ៣ ដំណាក់កាលនេះ គឺអាចទទួលយកបាន ព្រោះមុនដល់ពេលនេះវាបានឆ្លងកាត់ការពិភាក្សាជាមួយវិស័យឯកជនមានច្រើនលើករួចមកហើយ។
លោកបន្តថា ការរីករាលដាលកូវីដ ១៩ បានធ្វើឱ្យសេដ្ឋកិច្ចគ្រប់ប្រទេសលើពិភពលោកជួបវិបត្តិដ៏ធំធេង ហេតុនេះទោះបីមនុស្សគ្រប់រូបទទួលបានវ៉ាក់សាំងក៏ដោយ ក៏ស្ថានភាពសេដ្ឋកិច្ចរបស់គេនៅតែជួបបញ្ហាប្រឈមយូរទៅមុខទៀតដដែល។ លោកថ្លែងថា៖ «ខ្ញុំគិតថា វិស័យទេសចរណ៍នៅកម្ពុជាអាចត្រូវការពេលពី ៥-៧ ឆ្នាំ ទើបចំនួនភ្ញៀវទេសចរមកកម្ពុជាអាចមានចំនួនប្រហាក់ប្រហែលឡើងវិញ»។
ខណៈបច្ចុប្បន្នរដ្ឋាភិបាលកំពុងខិតខំអភិវឌ្ឍហេដ្ឋារចនាសម្ព័ន្ធជាច្រើននោះ លោក ស៊ីណាន បានអះអាងថា នេះជាឆ្អឹងខ្នងមួយផ្នែកដែលនឹងជួយឱ្យវិស័យទេសចរណ៍នៅកម្ពុជាមានសកម្មភាពឡើងវិញ។
ទិន្នន័យក្រសួងទេសចរណ៍ឱ្យដឹងថា ពីខែមករា-ខែតុលា កម្ពុជាទទួលបានភ្ញៀវទេសចរបរទេសសរុប ១,២៦ លាននាក់ធ្លាក់ ៧៦,១ ភាគរយធៀបនឹងរយៈពេលដូចគ្នាឆ្នាំ ២០១៩ ដែលមានចំនួន ៥,២៩ លាននាក់៕LA
