The Phnom Penh Post Search

Search form

Logo of Phnom Penh Post newspaper Phnom Penh Post - រដ្ឋ​កំពុង​រៀបចំ​គោលនយោបាយ​ពង្រីក​ការដាំ​ទុរេន




រដ្ឋ​កំពុង​រៀបចំ​គោលនយោបាយ​ពង្រីក​ការដាំ​ទុរេន

Content image - Phnom Penh Post
អាជីវករលក់ទុរេននៅខេត្តកោះកុង នាពេលកន្លងទៅ។ ហុង មិនា

រដ្ឋ​កំពុង​រៀបចំ​គោលនយោបាយ​ពង្រីក​ការដាំ​ទុរេន

ភ្នំពេញៈ កម្ពុជា​កំពុង​រៀបចំ​គោលនយោបាយ​ពង្រីក​ការដាំដុះ​ទុរេន​ឱ្យបាន​កាន់តែច្រើន ខណៈ​ផលិតផល​មួយ​នេះ​កំពុង​ទទួល​ការគាំទ្រ​កាន់តែ​ច្រើន​នៅលើ​ទីផ្សារ​ក្នុងស្រុក និង​ឈាន​ដល់​ការនាំ​ទៅ​ទីផ្សារ​អន្តរជាតិ​នៅពេល​ខាងមុខ​។

លោក វេង សាខុន រដ្ឋមន្ត្រី​ក្រសួងកសិកម្ម រុក្ខាប្រមាញ់ និង​នេសាទ​កាលពី​ថ្ងៃទី​ ២៩ ខែឧសភា បាន​លើកឡើង​ថា ការដាំ​ដំណាំ​ទុរេន​កំពុង​ផុលផុស​ឡើងជា​បន្តបន្ទាប់​នៅ​កម្ពុជា ខណៈ​ផលិតផល​ក្នុង​ស្រុក​កំពុង​ទទួលបាន​ការគាំទ្រ​កាន់តែ​ច្រើន​លើ​គុណភាព និង​សុវត្ថិភាព​។ ជាមួយគ្នានេះ​ក្រសួង​ក៏​កំពុង​រៀបចំ​ផែនការ និង​ទិសដៅ​សម្រាប់​ពង្រីក​ការដាំ​ទុរេន និង​ដំណាំ​ឈើ​ហូប​ផ្លែ​ដែល​មាន​សក្តានុពល​សម្រាប់​ទីផ្សារ​ក្នុង និង​ក្រៅប្រទេស​ផងដែរ​។

លោក​បន្ថែមថា រដ្ឋាភិបាល​នឹង​អភិវឌ្ឍ​ហេដ្ឋារចនាសម្ព័ន្ធ​ចាំបាច់​ដើម្បី​ជួយ​សម្រួល​ដល់​ខ្សែចង្វាក់​ផលិតកម្ម​ដំណាំ​ទុរេន និង​ដំណាំ​ហូប​ផ្លែ​ផ្សេងទៀត ហើយ​ចងក្រង​ជា​សហគមន៍​ដើម្បី​ជំរុញ​ផលិតកម្ម​ស្របតាម​ស្ដង់ដា និង​តម្រូវការ​ទីផ្សារ​។

លោក​ថ្លែងថា​៖ «​សព្វថ្ងៃ​ការដាំដុះ​ដំណាំ​ទុរេន​របស់​ប្រជាពលរដ្ឋ​មួយចំនួន គឺ​បាន​អនុវត្តតាម​ការណែនាំ​របស់​ក្រសួងកសិកម្ម ជាពិសេស​កសិករ​ខ្នាត​មធ្យម និង​ធំ ដោយសារ​ពួកគេ​មានលទ្ធភាព និង​ថវិកា​សម្រាប់​វិនិយោគ​ជា​លក្ខណៈ​អាជីវកម្ម​ពិតប្រាកដ​។ ប៉ុន្តែ​សម្រាប់​កសិករ​ខ្នាតតូច​មួយចំនួន​គឺ​ដាំ​ទុរេន​ជា​លក្ខណៈ​គ្រួសារ ឬ​ជា​ការកម្សាន្ត​ប៉ុណ្ណោះ ដោយ​មិន​យកចិត្ត​ទុកដាក់​អនុវត្តតាម​បច្ចេកទេស​ឱ្យបាន​ត្រឹមត្រូវ​ទេ​»​។

បើតាម​លោក សាខុន គោលនយោបាយ​ទាំងនោះ​មាន​ដូចជា ការបង្កើត​ស្ថានីយ​បង្កាត់ និង​ផលិត​ពូជ​ទុរេន និង​ដំណាំ​ហូបផ្លែ​ដែល​ពេញនិយម និង​ការបណ្តុះបណ្តាល​បច្ចេកទេស​ដាំដុះ​ទំនើប រួមទាំង​បច្ចេកទេស​មុន និង​ក្រោយពេល​ប្រមូលផល​ដល់​អ្នក​ដាំដុះ​ឱ្យស្រប​ទៅតាម​ស្តង់ដា​សុវត្ថិភាព ដើម្បី​ឆ្លើយតប​នឹង​លក្ខខណ្ឌ​តម្រូវ​សម្រាប់​ការនាំចេញ​។

លោក ឃឹម ប៊ុនឡេង ស្ថាបនិក​ហាង​ទុរេន «​ស្តេច​ទុរេន​» និង​ជា​កសិករ​ដាំ​ទុរេន​នៅ​ខេត្តកំពត​បាន​ស្វាគមន៍​ចំពោះ​ក្រសួង​កសិកម្ម​ដែល​កំពុង​រៀបចំ​គោលនយោបាយ​ជំរុញ​ការដាំដុះ និង​រក​ទីផ្សារ​ទុរេន​ខ្មែរ​ដោយ​លោក​ជឿថា ផែនការ​នេះ​នឹង​ជួយ​ឱ្យមាន​ការវិនិយោគ​បន្ថែមទៀត​នៅពេល​អនាគត​។

លោក​បាន​ប្រាប់​ភ្នំពេញ​ប៉ុស្តិ៍​កាលពី​ថ្ងៃអាទិត្យ​ថា​៖ «​នេះ​ជា​ដំណឹង​ល្អ​! ខ្ញុំ​រង់ចាំ​យូរ​ឆ្នាំ​មកហើយ​! ផែនការ​នេះ នឹងធ្វើ​ឱ្យ​យើង​ជា​អ្នក​ដាំ​ទុរេន​មាន​ភាពកក់ក្តៅ​ក្នុង​ការខិតខំ​ប្រឹងប្រែង​ថែទាំ​ឱ្យស្រប​តាម​បច្ចេកទេស​ត្រឹមត្រូវ​»​។

យោងតាម​លោក ប៊ុនឡេង បច្ចុប្បន្ន​ទុរេន​ខ្មែរ​លក់រាយ​មានតម្លៃ​ពី ២៦ ០០០-២៨ ០០០ ​រៀល​ក្នុង​ ១ ​គីឡូក្រាម​។

លោក​រដ្ឋមន្ត្រី​កត់សម្គាល់ថា បើ​កសិករ​ដាំ​ជា​ទ្រង់ទ្រាយ​ធំ ឬ​ច្រើន​គ្រួសារ​ដោយមាន​ការចងក្រង​ជា​សហគមន៍ ដំណាំ​ទុរេន​នឹង​អាចជួយ​រកចំណូលបាន​ច្រើន​ដល់​សេដ្ឋកិច្ចជាតិ​។ ទោះបី​ដំណាំ​ប្រភេទ​នេះ ទទួល​បាន​ប្រាក់ចំណូល​ខ្ពស់ ប៉ុន្តែ​តម្រូវ​ឱ្យ​មាន​ការវិនិយោគ​ទុន​ច្រើន និង​ទាមទារ​ការអនុវត្ត​បច្ចេកទេស​ត្រឹមត្រូវ​ជាមួយ​នឹង​ការថែទាំ​យ៉ាង​ដិតដល់​។

កម្ពុជា​មាន​ផ្ទៃដី​ដាំដុះ​ដំណាំ​ទុរេន ៥ ២៨៩ ​ហិកតា​ក្នុង​នោះ​ផ្ទៃដី​ប្រមូលផល ៣ ៤០៣ ហិកតា ដោយ​ទទួល​បាន​ផល​ប្រមាណ ៣៦ ៦៥៦ ​តោន ​ក្នុង​ ១ ​ឆ្នាំ​។ នេះ​បើ​យោងតាម​លោក វេង សាខុន​៕ LA

វីដេអូ៖

អត្ថបទគួរចាប់អារម្មណ៍