.jpg)
សកម្មភាពបុគ្គលិកកំពុងបម្រើការងារនៅផ្សារមូលបត្រកម្ពុជា។ ហេង ជីវ័ន
ភ្នំពេញៈ រដ្ឋាភិបាលបានអនុម័តការលើកទឹកចិត្តពន្ធលើមូលបត្របំណុល ដែលនេះគឺជាវិធានការមួយ ដើម្បីទាក់ទាញក្រុមវិនិយោគិនសាធារណៈក្នុងការវិនិយោគលើក្រុមហ៊ុនផ្សារមូលបត្រកម្ពុជា (CSX)។
យោងតាមប្រកាសក្រសួងសេដ្ឋកិច្ច និងហិរញ្ញវត្ថុ ដែលចុះហត្ថលេខាដោយលោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី ៥ ខែឧសភា បានឲ្យដឹងថា ក្រុមហ៊ុនចេញលក់សញ្ញាប័ណ្ណសាជីវកម្ម និងក្រុមវិនិយោគិនណាដែលកាន់កាប់ និងការលក់ ការទិញសញ្ញាបណ្ណសាជីវកម្ម នឹងត្រូវមានសិទ្ធិទទួលបានពន្ធកាត់ទុក។
វិនិយោគិនសាធារណៈត្រូវទទួលបានការបន្ថយពន្ធកាត់ទុក ៥០ ភាគរយ ក្នុងរយៈពេល ៣ ឆ្នាំ ដែលចាប់ផ្ដើមកាលពីថ្ងៃទី ១ ខែមករា ឆ្នាំ ២០០៩ ដល់ថ្ងៃទី ៣១ ខែ ធ្នូ ឆ្នាំ ២០២១ ដោយផ្អែកលើអនុក្រឹត្យស្ដីពីការលើកទឹកចិត្តពន្ធសម្រាប់វិស័យមូលបត្រដែលចុះកាលបរិច្ឆេទកាលពីថ្ងៃទី ៤ ខែ មករា ឆ្នាំ ២០១៩។ នេះបើតាមប្រកាស។
ប្រកាសនេះ គឺជាឧបករណ៍ស្ដីពីការអនុវត្តគោលការណ៍ណែនាំលើពន្ធកាត់ទុកសម្រាប់ក្រុមវិនិយោគិនក្នុងវិស័យមូលបត្របំណុល និងផ្ដល់ការបញ្ជាក់លើអត្រាពន្ធកាត់ទុក ៦ ភាគរយ សម្រាប់និវេសនជន និង ១៤ ភាគរយ សម្រាប់អនិវេសនជនបន្ថែមលើច្បាប់ស្ដីពីសារពើពន្ធ។
លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា (SECC) បានប្រាប់ភ្នំពេញប៉ុស្ដិ៍កាលពីថ្ងៃព្រហស្បតិ៍ថា ប្រកាសស្ដីពីការលើកទឹកចិត្តពន្ធនេះ មានគោលបំណងកំណត់អត្រាពន្ធសម្រាប់សញ្ញាបណ្ណសាជីវកម្ម និងក៏ដើម្បីទាក់ទាញវិនិយោគិនកាន់តែច្រើនមកផ្សារហ៊ុនផងដែរ។
លោកថ្លែងថា៖ «យើងមានអនុក្រឹត្យស្ដីពីការលើកទឹកចិត្តពន្ធចាប់តាំងពីដើមឆ្នាំ ២០១៩ មក។ ប្រកាសថ្មីនេះ មានគោលបំណងតែមួយគត់ ដើម្បីកំណត់អត្រាពន្ធសម្រាប់សញ្ញាបណ្ណសាជីវកម្ម។ បើគ្មានអត្រាគិតពន្ធ ពន្ធនេះនឹងមិនត្រូវបានអនុវត្តសម្រាប់សញ្ញាបណ្ណសាជីវកម្មឡើយ។ ដូច្នេះចាប់ពីការចេញប្រកាសនេះ រដ្ឋាភិបាលចាប់ផ្ដើមប្រមូលពន្ធពីទីផ្សារសញ្ញាបណ្ណសាជីវកម្ម»។
លោកបានបន្ថែមថា៖ «ប្រកាសនេះនឹងគាំទ្រស្ថានការនៅពេលនេះ និងសម្រាប់ក្រុមវិនិយោគិន ដោយសារតែប្រកាសនេះធ្វើឲ្យកាន់តែច្បាស់លាស់ ស្ដីពីអត្រាពន្ធ។ យើងមើលឃើញថា ទំនុកចិត្តពីក្រុមវិនិយោគិនសាធារណៈកំពុងកើនឡើង»។
លោក Jong Woen Ha អនុប្រធាន CSX បានឲ្យដឹងថា ប្រកាសនេះផ្ដល់គោលការណ៍ណែនាំច្បាស់លាស់សម្រាប់ក្រុមហ៊ុនចុះបញ្ជីមូលបត្រ និងក្រុមវិនិយោគិនទាក់ទងនឹងអត្រាពន្ធកាត់ទុក។ លោកបន្តថា៖ «សម្រាប់ភាគីវិនិយោគិន ពួកគេដឹងយ៉ាងច្បាស់ថា តើការលើកទឹកចិត្តពន្ធប៉ុន្មានដែលពួកគេនឹងទទួលបានពីការវិនិយោគនៅក្នុងវិស័យមូលបត្រនេះ។ នឹងមានក្រុមវិនិយោគិនកាន់តែច្រើនមានបំណងវិនិយោគក្នុងទីផ្សារនេះ»។
ផ្សារមូលបត្រកម្ពុជាត្រូវបានដំណើរការជាផ្លូវការចាប់តាំងពីខែមេសា ឆ្នាំ ២០១២។ គិតត្រឹមខែឧសភា ទីផ្សារនេះ មានក្រុមហ៊ុនចុះបញ្ជីចំនួន ១១ ក្នុងចំណោមនោះ ៦ ចេញសញ្ញាបណ្ណសាជីវកម្ម និងក្រុមហ៊ុនផ្សេងទៀតចុះបញ្ជីជាមូលបត្រកម្មសិទ្ធិ។ ក្រុមហ៊ុនចុះបញ្ជីទាំងអស់ប្រមូលមូលនិធិបានប្រហែល ២២៣ លានដុល្លារ៕LA
