.jpg)
ភ្ញៀវទេសចរបរទេសដ៏ច្រើនកុះករបានទស្សនាតំបន់អង្គរវត្តក្នុងឆ្នាំ ២០១៥។ ហេង ជីវ័ន
ភ្នំពេញៈ កម្ពុជាមានផែនការទាក់ទាញភ្ញៀវទេសចរឱ្យបាន ១៨,៤ លាននាក់ បន្ទាប់ពីរដ្ឋាភិបាលដាក់ចេញនូវផែនការចង្អុលផ្លូវ (Roadmap) និងផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ ២០២១-២០៣៥ ដើម្បីលើកស្ទួយវិស័យទេសចរណ៍កម្ពុជានៅក្នុងអំឡុងពេល និងក្រោយពេលវិបត្តិជំងឺកូវីដ ១៩។
សេចក្តីប្រកាសព័ត៌មានរបស់ក្រសួងទេសចរណ៍កាលពីថ្ងៃទី ១ ខែមេសា បង្ហាញថា តាមរយៈផែនការមេនេះខេត្តសៀមរាបនឹងអាចទាក់ទាញបានភ្ញៀវទេសចរជាតិ ១០,៩ លាននាក់នៅឆ្នាំ ២០២៣ និងភ្ញៀវទេសចរអន្តរជាតិ ៧,៥ លាននាក់នៅឆ្នាំ ២០២៥។
សេចក្តីប្រកាសព័ត៌មានបានបន្តថា ផែនការមេនេះ រដ្ឋាភិបាលមានចក្ខុវិស័យបង្កើតការងារឱ្យបាន ៩៤ ម៉ឺននាក់ និងប្រាក់ចំណូលហូរចូលក្នុងចរន្តសេដ្ឋកិច្ចខេត្តសៀមរាបប្រមាណ ៦ ពាន់លានដុល្លារ។
ផែនការមេនេះក៏នឹងជួយធ្វើឱ្យខេត្តសៀមរាប និងតំបន់នៅជុំវិញក្លាយជាគោលដៅទេសចរណ៍ប្រកបដោយគុណភាពឆ្ពោះទៅឆ្នាំ ២០៣៥ តាមរយៈការអនុវត្តនូវយុទ្ធសាស្ត្រចំនួន ៧ រួមមាន ការអភិវឌ្ឍតំបន់ទេសចរណ៍អាទិភាពក្នុងខេត្ត ការអភិវឌ្ឍផលិតផលទេសចរណ៍ថ្មីៗ ការផ្សព្វផ្សាយ និងទាក់ទាញភ្ញៀវទេសចរ ការពង្រឹងគុណភាព និងនិរន្តរភាព ការគ្រប់គ្រងបរិស្ថាន ការអភិវឌ្ឍហេដ្ឋារចនាសម្ព័ន្ធ និងពង្រីកការតភ្ជាប់គាំទ្រវិស័យទេសចរណ៍ និងការពង្រឹងអភិបាលកិច្ចសម្រាប់ទ្រទ្រង់ការអភិវឌ្ឍវិស័យទេសចរណ៍ខេត្តនេះ។
ផែនការមេនេះបានដាក់ចេញយុទ្ធសាស្ត្រចំនួន ៤៤ សកម្មភាពអនុវត្តចំនួន ១៣៦ សម្រាប់រយៈពេលខ្លី មធ្យម និងវែង ជាមួយនឹងគម្រោងសកម្មភាពអាទិភាពចំនួន ២០។
សេចក្តីប្រកាសព័ត៌មានឱ្យដឹងថា ផែនការចង្អុលផ្លូវនេះនឹងក្លាយជាត្រីវិស័យ និងជាផែនការយុទ្ធសាស្ត្រមួយដ៏សំខាន់ ដើម្បីធានានូវវិធានការអន្តរាគមន៍ទាន់ពេលវេលា និងប្រែក្លាយវិបត្តិកូវីដ១៩ ទៅជាកាលានុវត្តភាពសម្រាប់ការកែទម្រង់ក្នុងវិស័យទេសចរណ៍កម្ពុជាឱ្យទៅជាគោលដៅទេសចរណ៍គុណភាព សុវត្ថិភាព និងនិរន្តរភាពក្នុងការទាញយកមកវិញនូវចំនួនភ្ញៀវទេសចរអន្តរជាតិ និងជំរុញសកម្មភាពទេសចរណ៍ក្នុងស្រុក។
ផែនការចង្អុលផ្លូវនឹងត្រូវអនុវត្តជា ៣ ដំណាក់កាល គឺទី១ Resilience & Restart សំដៅដល់ការគ្រប់គ្រងវិបត្តិក្នុងដំណាក់កាលទម្លាប់ថ្មី និងរៀបចំផែនការសម្រាប់ការស្ដារឡើងវិញ (២០២១)។ ដំណាក់កាលទី២ ការស្ដារឡើងវិញលើវិស័យទេសចរណ៍កម្ពុជាក្រោយវិបត្តិកូវីដ ១៩ (២០២២-២០២៣) និងកាត់បន្ថយផលប៉ះពាល់នៃវិបត្តិនេះជាអតិបរមា។
ក្នុងដំណាក់កាលទី ២ នេះរដ្ឋាភិបាលនឹងបន្តផ្ដល់ការបណ្តុះបណ្តាលជំនាញវិជ្ជាជីវៈទេសចរណ៍ ជំនាញឌីជីថល និងជំនាញថ្មីៗឱ្យស្របតាមតម្រូវការទីផ្សារក្រោយវិបត្តិជំងឺកូវីដ ១៩ និងការខិតខំលើកកម្ពស់កិត្យានុភាពកម្ពុជាជាគោលដៅទេសចរណ៍ប្រកបដោយសុវត្ថិភាព ក្រោយវិបត្តិជំងឺកូវីដ ១៩។
ក្នុងដំណាក់កាលនេះ ដើម្បីបង្កើនឧត្តមភាពប្រកួតប្រជែងទេសចរណ៍កម្ពុជាក្នុងតំបន់ និងសកលលោក រដ្ឋាភិបាលក៏នឹងបង្កើតកញ្ចប់មូលនិធិលើកស្ទួយដើម្បីគាំទ្រលើគម្រោងអាទិភាពក្នុងវិស័យទេសចរណ៍ ព្រមទាំងបន្តការលើកទឹកចិត្តដល់គំរូអាជីវកម្មទេសចរណ៍ថ្មីៗដែលមានភាពច្នៃប្រឌិត និងនវានុវត្តន៍ជាដើម។
ដោយឡែកដំណាក់កាលទី៣ Relaunch គឺជាការរៀបចំឆ្ពោះទៅកាន់អនាគតថ្មី ឆ្នាំ ២០២៤-២០២៥ សម្រាប់វិស័យទេសចរណ៍កម្ពុជាដោយសំដៅដល់ការទាញយកផលប្រយោជន៍ពីការអភិវឌ្ឍវិស័យទេសចរណ៍ឱ្យបានជាអតិបរមាប្រកបដោយនិរន្តរភាព និងការទទួលខុសត្រូវ។
លោកនាយករដ្ឋមន្ត្រី ហ៊ុន សែន កាលពីថ្ងៃទី ១ ខែមេសា ឱ្យដឹងថា នេះជាចក្ខុវិស័យច្បាស់លាស់សម្រាប់ការស្ដារ និងលើកស្ទួយវិស័យទេសចរណ៍កម្ពុជាក្រោយជំងឺកូវីដ ១៩។
លោកបន្តថា ផលប៉ះពាល់នៃជំងឺកូវីដ ១៩ បាននាំឱ្យភ្ញៀវទេសចរអន្តរជាតិមកប្រទេសកម្ពុជាកាលពីឆ្នាំ ២០២០ ធ្លាក់ចុះ ៨០,២ ភាគរយ និងភ្ញៀវទេសចរក្នុងស្រុកធ្លាក់ចុះក្នុងរង្វង់ ២០ ភាគរយ ជាមួយនឹងការខាតបង់ប្រាក់ចំណូលប្រមាណ ៣ ពាន់លានដុល្លារនៅក្នុងឆ្នាំ ២០២០។
លោក ហ៊ុន សែន មានប្រសាសន៍ថា៖ «ក្នុងន័យនេះ វិស័យទេសចរណ៍កម្ពុជាត្រៀមនឹងងើបឡើងវិញអាចក្រោមទម្រង់ជាអក្សរ U សម្រាប់ទេសចរណ៍អន្តរជាតិ និងទម្រង់អក្សរ V សម្រាប់ទេសចរណ៍ក្នុងស្រុក»។
លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិក (PATA) ប្រាប់ភ្នំពេញប៉ុស្តិ៍ថា តាមរយៈផែនការទាំង ២ នេះវានឹងរួមចំណែកក្នុងការស្តារវិស័យទេសចរណ៍នៅកម្ពុជាដែលកំពុងរងផលប៉ះខ្លាំងដោយជំងឺកូវីដ ១៩។
លោកនិយាយថា៖ «បើយើងដើរតាមផែនការចង្អុលផ្លូវនេះ ខ្ញុំជឿថានឹងសម្រេចបានគោលដៅកំណត់ ឬយ៉ាងហោចណាស់ក៏យើងបានទៅជិតដល់គោលដៅទាំងនេះដែរ។ ខ្ញុំរីករាយ និងអបអរសាទរចំពោះការសម្រេចបានផែនការចង្អុលផ្លូវនេះ ព្រោះកិច្ចការនេះខ្ញុំឃើញថា ក្រសួងក៏ដូចជារដ្ឋាភិបាលមានការយកចិត្តទុកដាក់ការងារនេះយ៉ាងហ្មត់ចត់»។
ផែនទីចង្អុលផ្លូវនេះមានយុទ្ធសាស្ដ្រសរុបចំនួន ៩ សកម្មភាពយុទ្ធសាស្ដ្រចំនួន ៤៩ និងសកម្មភាពយុទ្ធសាស្ដ្រលម្អិតចំនួន ១៨០ រួមជាមួយគម្រោងកម្មវិធីអាទិភាពចំនួន ១៧។
យោងតាមទិន្នន័យពីក្រសួងទេសចរណ៍ក្នុងឆ្នាំ ២០២០ កម្ពុជាទទួលបានភ្ញៀវទេសចរបរទេសសរុប ១,៣ លាននាក់ ធ្លាក់ចុះ ៨០,២ ភាគរយបើធៀបនឹងឆ្នាំ ២០១៩ ដែលមានចំនួន ៦ ៦១០ ៥៩២ នាក់៕
