ភ្នំពេញ៖ ក្រសួងពាណិជ្ជកម្មនៅថ្ងៃទី ២០ ខែមេសានេះ បញ្ចេញរថយន្តចល័ត ៥ គ្រឿង ដឹកស្បៀងលក់ជូនប្រជាជននៅតំបន់ក្រហមក្នុងតម្លៃក្រោមទីផ្សារ ដើម្បីសម្រួលជីវភាពប្រជាពលរដ្ឋក្នុងអំឡុងពេលបិទខ្ទបនៅទីក្រុងភ្នំពេញ និងក្រុងតាខ្មៅ (ខេត្តកណ្តាល)។
តំបន់ក្រហមទាំង ៧ ទីតាំងនោះ ស្ថិតនៅក្នុងខណ្ឌចំនួន ៣ គឺ ខណ្ឌមានជ័យ ខណ្ឌពោធិ៍សែនជ័យ និងខណ្ឌទួលគោក។
អនុរដ្ឋលេខាធិការនៃក្រសួងពាណិជ្ជកម្ម លោក ប៉ែន សុវិជាតិ បានឲ្យដឹងថា តាមអនុសាសន៍របស់ប្រមុខរដ្ឋាភិបាល ក្រសួងពាណិជ្ជកម្មបានសម្រេចបញ្ចេញរថយន្តដឹកទំនិញចំនួន ៥ គ្រឿង ដែលផ្ទុកទំនិញបរិភោគឧបភោគ និងគ្រឿងទេស ដើម្បីចល័តលក់ជូនប្រជាជននៅតំបន់ក្រហមក្នុងរាជធានីភ្នំពេញ។
លោក ប៉ែន សុវិជាតិ មានប្រសាសន៍ថា៖ «ព្រឹកនេះ រថយន្តចល័តទាំង ៥ គ្រឿង របស់ក្រសួងពាណិជ្ជកម្ម រួមជាមួយរថយន្តចល័តមួយចំនួនទៀត របស់សាលារាជធានីភ្នំពេញ នឹងចេញទៅចល័តលក់តាមទីតាំង ទាំង ៧ កន្លែង នៃតំបន់ក្រហមទាំងនោះ»។
លោក សុវិជាតិ បានឲ្យដឹងទៀតថា ក្រសួងពាណិជ្ជកម្មបានណែនាំបន្ថែមឲ្យក្រុមហ៊ុន ហ្គ្រិន ត្រេដ (Green Trade) គ្រប់គ្រងដោយក្រសួងពាណិជ្ជកម្មត្រូវជំរុញធ្វើសកម្មភាពនេះឲ្យបានឆាប់រហ័ស និងទាន់ពេលវេលា ដើម្បីចូលរួមដោះស្រាយការលំបាករបស់ប្រជាជនដែលកំពុងអនុវត្តវិធានការបិទខ្ទប់នៅតាមតំបន់ក្រហមក្នុងខណ្ឌទាំង ៣ នៃភូមិសាស្រ្តរាជធានីភ្នំពេញ។
លោកថ្លែងថា៖ «ទំនិញដាក់លក់ជូននៅថ្ងៃនេះ មានតម្លៃទាបជាងតម្លៃទីផ្សារដែលមាន អង្ករ មី ទឹកសុទ្ធ ត្រីខកំប៉ុង ទឹកត្រី និងទឹកស៊ីអ៊ីវ ជាដើម។ ក្រសួងក៏កំពុងរៀបចំបញ្ចូលទំនិញចាំបាច់មួយចំនួនបន្ថែមទៀត សម្រាប់ឆ្លើយតបនឹងសេចក្តីត្រូវការរបស់ប្រជាជនក្នុងគ្រាលំបាកនេះ ដូចជា ត្រីងៀត ត្រីឆ្អើ ឆៃប៉ូវ និងអាហារយុទ្ធសាស្រ្តផ្សេងទៀត ដែលអាចរក្សាសម្រាប់ប្រើប្រាស់បានយូរ»។
កាលពីថ្ងៃទី ១៥ ខែ មេសា ឆ្នាំ ២០២១ ក្រសួងពាណិជ្ជកម្ម បានចាប់ផ្ដើមលក់ អង្ករ និងមី ចល័តក្នុងរាជធានីភ្នំពេញ ដែលមានតម្លៃទាបជាងទីផ្សារ ដើម្បីជួយសម្រួលដល់ប្រជាពលរដ្ឋ ដោយកំណត់ក្នុងមួយគ្រួសារ ទិញបានអង្ករមួយបាវ និងមីមួយកេស។
រយៈពេល ៥ ថ្ងៃ ចាប់ពីថ្ងៃទី ១៥-១៩ ខែមេសា ឆ្នាំ ២០២១ រថយន្ដចល័តរបស់ក្រសួងពាណិជ្ជកម្មបានលក់អង្ករសរុប ចំនួន ២៩៧ បេ មីជាតិចំនួន ១ ៩៧៥ កេស ទឹកត្រីទឹកស៊ីអ៊ីវសរុបចំនួន ១៣៦ យួរ ជូនប្រជាពលរដ្ឋក្នុងភូមិសាស្ត្របិទខ្ទប់នៃរាជធានីភ្នំពេញ និងក្រុងតាខ្មៅ (ខេត្តកណ្តាល)៕