ភ្នំពេញៈ កម្ពុជានឹងបន្តយកថ្លៃទិដ្ឋាការពីជនបរទេសដែលធ្វើដំណើរមកកម្ពុជាដដែល បើទោះមានសំណើពីអ្នកនៅក្នុងវិស័យទេសចរណ៍ចង់ឱ្យរដ្ឋាភិបាលទម្លាក់ចោលការយកថ្លៃលើសេវានេះក្នុងក្តីរំពឹងថានឹងអាចស្រូបទាញកំណើនភ្ញៀវទេសចរបរទេសឡើងវិញពីការធ្លាក់ចុះយ៉ាងគំហុកចាប់តាំងពីការផ្ទុះឡើងជំងឺកូវីដ ១៩ រហូតមកដល់ពេលនេះ។
ការសម្រេចបន្តយកថ្លៃទិដ្ឋាការនេះត្រូវបានលោកនាយករដ្ឋមន្ត្រី ហ៊ុន សែន លើកឡើងក្នុងពិធីបើកការដ្ឋានសាងសង់រោងចក្រប្រព្រឹត្តិកម្មទឹកស្អាតបាក់ខែង និងសម្ពោធរោងចក្រប្រព្រឹត្តិកម្មទឹកស្អាតចំការមនកាលពីថ្ងៃចន្ទកន្លងមក។
លោក ហ៊ុន សែន បានលើកឡើងថា លោកមិនយល់ស្របចំពោះសំណើមួយចំនួនដែលចង់ឱ្យរដ្ឋាភិបាលបញ្ឈប់ការយកថ្លៃទិដ្ឋាការពីភ្ញៀវបរទេស ដើម្បីទាញយកភ្ញៀវបរទេសឡើយ ព្រោះចំណូលនេះគឺជាផ្នែកមួយដែលបានចូលរួមជួយទ្រទ្រង់ការអភិវឌ្ឍប្រទេសជាតិ ហើយកម្ពុជាក៏នៅមិនទាន់មានប្រភពចំណូលអ្វីយកមកជំនួសដែរ។ លោកបន្តថា ការកំណត់យកថ្លៃទិដ្ឋាការពីជនបរទេសគឺមិនមែនមានតែកម្ពុជាទេ សូម្បីប្រទេសរីកចម្រើនដូចជាបារាំង ក៏នៅតែយកថ្លៃទិដ្ឋាការចូលប្រទេសគេដែរ ហើយថែមទាំងមានតម្លៃខ្ពស់ទៀតផង។
លោកបានថ្លែងថា៖ «ប្រទេសបារាំងគេយកជាង ១០០ ដុល្លារ គេទៅលេងបាន ចុះប្រទេសយើងត្រឹម ៣០ ដុល្លារ ហេតុអ្វីគេមកមិនបាន?»។ លោកបន្តថា៖ «អ៊ីចឹងបានជាខ្ញុំមិនយល់ស្របជាមួយនឹងសំណើណាទាំងអស់ដែលឱ្យកម្ពុជាបញ្ឈប់យកថ្លៃទិដ្ឋាការ ដើម្បីទាញយកភ្ញៀវទេសចរ ខ្ញុំមិនយល់ស្របទេ អ៊ីចឹងគឺបាត់ទាំងអស់។ កម្ពុជានៅមិនទាន់មានអ្វីជំនួសទេ»។
លោកបន្តថា នេះជាចំណូលមិនមែនសារពើពន្ធ ហើយបើគិតជាមួយនឹងចំនួនភ្ញៀវទេសចរដែលកម្ពុជាទទួលបានកាលពីឆ្នាំ ២០១៩ (មុនកូវីដ ១៩) ដែលមានចំនួន ៦,៦ លាននាក់ គឺកម្ពុជាទទួលបានចំណូលពីថ្លៃទិដ្ឋាការរហូតដល់ប្រមាណ ១៨០ លានដុល្លារ។
ទោះយ៉ាងណាលោកអះអាងថា ការលើកលែងនេះអាចនឹងកើតមាននៅពេលណាដែលកម្ពុជា អាចមានមធ្យោបាយក្នុងការទាញយកចំណូលពីវិស័យទេសចរណ៍មកជំនួសថ្លៃទិដ្ឋាការទើបអាចលុបបាន។
បើយោងតាមលោក ថោង ខុន រដ្ឋមន្ត្រីក្រសួងទេសចរណ៍ ដោយសារវិបត្តិជំងឺកូវីដ ១៩ បានធ្វើឱ្យចំនួនភ្ញៀវទេសចរបរទេសដែលធ្វើដំណើរមកកម្ពុជាក្នុងឆ្នាំ ២០២០ មានត្រឹមតែ ១,៣១ លាននាក់ ធ្លាក់ចុះប្រមាណ ៨០ ភាគរយបើធៀបនឹងឆ្នាំ ២០១៩។
ប្រធានសមាគមទីភ្នាក់ងារទេសចរណ៍កម្ពុជាលោកស្រី ឆាយ ស៊ីវលីន បានប្រាប់ ភ្នំពេញ ប៉ុស្តិ៍ កាលពីថ្ងៃអង្គារថា វាមិនមែនជាបញ្ហាទេប្រសិនបើស្ថានភាពធម្មតា ប៉ុន្តែក្នុងអំឡុងពេលការរីករាលដាលជំងឺកូវីដ ១៩ នេះវាពិតជាជះឥទ្ធិពលអវិជ្ជមានខ្លាំងសម្រាប់វិស័យទេសចរណ៍ ហេតុនេះការលើកទឹកចិត្តបន្ថែមគឺពិតជាមានសារៈសំខាន់ណាស់ ដើម្បីអាចឱ្យភ្ញៀវបរទេសធ្វើដំណើរមកកម្ពុជាឡើងវិញ។ វិធានការរឹតបន្តឹងការធ្វើដំណើររបស់ប្រទេសនានាលើពិភពលោកកំពុងធ្វើឱ្យវិស័យមួយនេះពិបាកងើបឡើងវិញណាស់។
លោកស្រីនិយាយថា៖ «ឆ្នាំ ២០២១ នេះបើមិនមានអ្វីជាការលើកទឹកចិត្តទេនោះ ខ្ញុំមិនរំពឹងថា វិស័យទេសចរណ៍នឹងងើបឡើងវិញច្រើនទេ»។
លោកស្រីបន្ថែមថា ទោះជាយ៉ាងណាក្នុងដំណាក់កាលនេះ រដ្ឋាភិបាលក៏អាចរួមចំណែកជួយលើកកម្ពស់វិស័យទេសចរណ៍ឡើងវិញផងដែរ តាមរយៈការបន្ធូរបន្ថយលក្ខខណ្ឌតម្រូវមួយចំនួន។ លោកស្រីបន្ថែមថា កម្ពុជាអាចសម្លឹងទៅមើលប្រទេសណាដែលគេគ្រប់គ្រងកូវីដ ១៩ បានល្អ ហើយគេចង់ចូលមកកម្ពុជា គឺគេអាចចាប់ដៃគូជាមួយប្រទេសនោះតាមយុទ្ធសាស្ត្រ Travel Bubble ដែលអាចសហការគ្នាដើម្បីបន្ធូរបន្ថយលើលក្ខខណ្ឌមួយចំនួនដូចជា ឯកសារតម្រូវការធ្វើចតា្តឡីស័ក និងការតម្កល់ប្រាក់ធានាជាដើម។
លោក ខៀវ ធី ប្រធានសមាគមមគ្គុទ្ទេសក៍ទេសចរអង្គរបាននិយាយថា ប្រសិនបើចាំបាច់រដ្ឋអាចបន្តយកថ្លៃទិដ្ឋាការពីភ្ញៀវទេសចរបរទេសបាន តែនៅពេលរដ្ឋអាចមានប្រភពចំណូលច្រើនគ្រប់គ្រាន់នោះ ការលើកលែងថ្លៃទិដ្ឋាការគឺជាការចាំបាច់ដើម្បីលើកកម្ពស់វិស័យទេសចរណ៍នៅកម្ពុជា។
លោកថ្លែងថា៖ «ខ្ញុំសង្ឃឹមថាពេលវិស័យផ្សេងៗអាចប្រមូលចំណូលបានច្រើន ការលើកលែងកម្រៃពីទិដ្ឋាការទេសចរណ៍គឺជាការល្អ ពិសេសជាមួយប្រទេសដែលមានទំនាក់ទំនងទេសចរណ៍ល្អជាមួយកម្ពុជា»។
យោងតាមលោក ខៀវ ធី បើមិនអាចផ្តល់ការលើកលែងទាំងអស់ គេអាចចាប់ផ្តើមពីប្រទេសដែលមានភ្ញៀវទេសចរនិយមចូលមកទស្សនាកម្ពុជា ដូចជា ចិន ឥណ្ឌា កាណាដា អាមេរិក និងប្រទេសនៅសហគមន៍អឺរ៉ុបជាដើម។
ទិន្នន័យក្រសួងទេសចរណ៍ឱ្យដឹងថា ក្នុងឆ្នាំ ២០១៩ កម្ពុជាទទួលបានភ្ញៀវទេសចរអន្តរជាតិសរុប ៦,៦១ លាននាក់ កើនឡើង ៦,៦ ភាគរយ ធៀបនឹងឆ្នាំ ២០១៨ ដែលមាន ៦,២ លាននាក់។ ចំណែកប្រាក់ចំណូលមានចំនួន ៤,៩១ លានដុល្លារកើន ១២,៤ ភាគរយបើធៀបនឹងឆ្នាំ ២០១៨ ដែលមានចំនួន ៤,៣៧ លានដុល្លារ៕ LA