ភ្នំពេញៈ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានស្នើសភាពាណិជ្ជកម្មអឺរ៉ុបប្រចាំព្រះរាជាណាចក្រកម្ពុជាជួយជំរុញឱ្យបណ្តាក្រុមហ៊ុនរបស់អឺរ៉ុបបង្កើនការនាំចូលផលិតផលកសិកម្មពីប្រទេសកម្ពុជា ឱ្យបានច្រើន ដោយសារទំហំនៃការនាំចេញផលិតផលទាំងនេះទៅកាន់ទីផ្សារអឺរ៉ុបនៅមានកម្រិតទាបនៅឡើយ ខណៈរដ្ឋាភិបាលកម្ពុជាកំពុងជំរុញការនាំចេញនូវកសិផលទាំងនេះ។
ការស្នើរបស់លោករដ្ឋមន្ត្រីធ្វើឡើងក្នុងជំនួបកាលពីថ្ងៃអង្គារកន្លងមកនេះជាមួយលោក Tassilo Brinzer ប្រធាន EuroCham ដែលទើបតែងតាំងថ្មី។
លោក វេង សាខុន បានលើកឡើងពីដំណើរការវិវឌ្ឍន៍រីកចម្រើនរបស់វិស័យកសិកម្មក្នុងបរិបទនៃការរីករាលដាលជាសកលនៃជំងឺឆ្លងកូវីដ ១៩ ដែលកម្ពុជាធានាបាននូវសន្តិសុខស្បៀង ហើយបាននិងកំពុងជំរុញការនាំចេញកសិផលទៅកាន់ទីផ្សារអន្តរជាតិ ជាពិសេសទីផ្សារចិន កូរ៉េ និងសហភាពអឺរ៉ុប រួមមាន អង្ករ ម្រេច ចំណិតដំឡូងក្រៀម គ្រាប់ស្វាយចន្ទីកែច្នៃរួច ចេកអំបូងលឿង ស្វាយកែវរមៀត និងសេរ៉ូស្វាយ ជាដើម។
លោករដ្ឋមន្ត្រីថ្លែងថា៖ «សម្រាប់ទីផ្សារអឺរ៉ុប ក្រៅពីអង្ករ បរិមាណកសិផលនាំចេញដទៃទៀត ហាក់ដូចជានៅមានកម្រិតទាប ហេតុនេះលោកប្រធានថ្មីជួយពិនិត្យ ពិចារណាលើកសិផលកម្ពុជា ធ្វើយ៉ាងណាឱ្យកម្ពុជាអាចនាំកសិផលរបស់ខ្លួនទៅកាន់ទីផ្សារអឺរ៉ុបបានកាន់តែច្រើនថែមទៀត»។
លោក Brinzer លើកឡើងថា ជំនួបនេះនឹងពង្រឹង និងពង្រីកកិច្ចសហការរវាង The EuroCham និងក្រសួងនេះដោយធ្វើយ៉ាងណារួមគ្នាអភិវឌ្ឍវិស័យកសិកម្មនៅកម្ពុជាទាំងបច្ចុប្បន្ន និងអនាគត។
លោកថា សហភាពអឺរ៉ុបនឹងនៅតែជាដៃគូសហការជាមួយរាជរដ្ឋាភិបាលកម្ពុជា ពិសេសក្រសួងកសិកម្មក្នុងការជំរុញកំណើនផលិតកម្មកសិកម្មតាមរយ:ការអនុវត្តបច្ចេកវិទ្យាថ្មីៗ សមស្របតាមតម្រូវការទីផ្សារ និងពង្រីកការកែច្នៃ៕ LA