ទីក្រុងឌូបៃៈ រដ្ឋមន្ត្រីថាមពលអារ៉ាប់រួមលោក Suheil al-Mazrouei បាននិយាយកាលពីថ្ងៃចន្ទថា តម្លៃប្រេង និងឧស្ម័នទាបនាពេលបច្ចុប្បន្នមិនមានចីរភាពទេ ហើយបានព្រមានថា ប្រសិនបើវាមានរយៈពេលយូរ វាអាចនឹងបណ្តាលឲ្យមានបញ្ហាផ្នែកថាមពល។
លោក Mazrouei បានថ្លែងថា៖ «មានសញ្ញាល្អច្រើន» នៃតម្រូវការកើនឡើងសម្រាប់ឥន្ធនៈដែលត្រូវគេមើលឃើញក្នុងប្រទេសចិន និងឥណ្ឌាដែលជាប្រទេសប្រើប្រាស់ប្រេងឆៅធំបំផុតរបស់ពិភពលោក និងចំនួនខ្លះនៅតំបន់អឺរ៉ុប។
លោករដ្ឋមន្ត្រីបាននិយាយនៅក្នុងកិច្ចសម្ភាសន៍ដែលរៀបចំឡើងដោយក្រុមប្រឹក្សាធុរកិច្ចអាមេរិក-អារ៉ាប់រួម ថា «បរិយាកាសនៃតម្លៃប្រេង និងឧស្ម័នទាបនេះ ខ្ញុំមិនយល់ថាវាមាននិរន្តរភាពនោះទេ»។
លោកបន្តទៀតថា ប្រសិនបើតម្លៃប្រេងចុះទាបអូសបន្លាយរយៈពេលវែង អ្នកផលិតដោយចំណាយដើមខ្ពស់ខ្លះនឹងដកខ្លួនចេញដែលបណ្តាលឲ្យមានគម្លាតនៃការផ្គត់ផ្គង់ និងជំរុញឲ្យតម្លៃកើនឡើងវិញ។
លោកថ្លែងថា៖ «យើងត្រូវការអ្នកផលិតដើម្បីបំពេញចន្លោះគម្លាតនេះ។ បើពុំដូច្នេះទេ យើងនឹងមានបញ្ហាចំពោះតម្លៃ ហើយរឿងចុងក្រោយដែលយើងចង់បានគឺមានការបារម្ភ។ យើងត្រូវការឲ្យមានស្ថិរភាព និងតម្លៃសមរម្យ និងយុត្តិធម៌»។
ប្រេងឆៅម៉ាក Brent បានធ្លាក់ចុះទាបក្រោម ២០ ដុល្លារក្នុង ១ បារ៉ែល មិនធ្លាប់មានក្នុងរយៈពេលច្រើនឆ្នាំ និងប្រេងម៉ាក WTI របស់អាមេរិកដែលលក់ក្នុងខែឧសភាបានធ្លាក់ក្រោមសូន្យក្នុងខែមេសា ដែលជាការធ្លាក់ចុះលើកដំបូងក្នុងប្រវត្តិសាស្ត្រពេលដែលតម្រូវការដាំក្បាលចុះដោយសារការបិទប្រទេសបណ្តាលមកពីវីរុសកូរ៉ូណា និងការកាត់ផ្តាច់ការផ្គត់ផ្គង់ក្នុងពិភពលោក។
សន្ទស្សន៍តម្លៃប្រេងទាំង ២ ម៉ាកបានប្រសើរឡើងវិញដល់តម្លៃជុំវិញ ៤០ ដុល្លារ ក្នុង ១ បារ៉ែល បន្ទាប់ពីសម្ព័ន្ធនៃប្រទេសផលិតប្រេងដែលជាសមាជិករបស់អង្គការ OPEC+ យល់ព្រមកាត់បន្ថយផលិតកម្មដល់កំណត់ត្រាចំនួន ៩,៧ លានបារ៉ែលក្នុង ១ ថ្ងៃកាលពីខែមេសាដោយមានប្រសិទ្ធភាពចាប់តាំងពីខែឧសភាមក។
កាលពីដើមខែនេះ សម្ព័ន្ធភាពនៃប្រទេសផលិតប្រេងបានពង្រីកការកាត់បន្ថយជាប្រវត្តិសាស្ត្រដល់ខែកក្កដា ពេលដែលរដ្ឋាភិបាលនៅជុំវិញពិភពលោកបានបញ្ចប់នូវការបិទចរាចរណ៍។
លោក Mazrouei បាននិយាយថា ទោះបីការប្រើប្រាស់ប្រេងបានធ្លាក់ចុះដល់កម្រិតឆ្នាំ ២០១៣«យើងគិតថា អ្វីៗនឹងត្រឡប់ទៅធម្មតាវិញក្នុងរយៈពេល ១ ឬ ២ ឆ្នាំទៀត»។
លោកថ្លែងថា៖ «ដរាបណា យើងមិនមានរលកទី ២ នៃជំងឺកូវីដ ១៩ ទេ ខ្ញុំគិតថា យើងនឹងឃើញការងើបឡើងវិញនៃតម្រូវការនៅពេលណាមួយសមរម្យដែលគ្រប់គ្រាន់ចំពោះការកាត់បន្ថយដែលយើងបានធ្វើពេលកន្លងមក»៕ RR