ភ្នំពេញៈ រដ្ឋមន្ត្រីក្រសួងទេសចរណ៍បានលើកទឹកចិត្តឲ្យវិនិយោគិនជប៉ុនចូលមកវិនិយោគក្នុងវិស័យទេសចរណ៍ក្នុងខេត្តកែបដែលមិនទាន់ត្រូវបានអភិវឌ្ឍពេញលេញនៅឡើយ។
ការលើកឡើងនេះត្រូវបានធ្វើឡើងក្នុងជំនួបរវាងរដ្ឋមន្ត្រីក្រសួងទេសចរណ៍ លោក ថោង ខុន និង ក្រុមវិនិយោគិនមកពីប្រទេសជប៉ុននៅក្នុងខេត្តកែបកាលពីរាត្រីថ្ងៃពុធ។
លោក ថោង ខុន ថ្លែងថាភាពអំណោយផលពីធម្មជាតិដែលស្ថិតនៅជាប់មាត់សមុទ្រ និងមានកោះជាច្រើនបានធ្វើឲ្យខេត្តកែបមានសក្តានុពលយ៉ាងខ្លាំងសម្រាប់ការវិនិយោគលើវិស័យទេសចរណ៍ ពិសេសឆ្នេរអង្កោល និងកោះទន្សាយដែលកន្លែងទាំង ២ នេះអាចវិនិយោគទៅជាតំបន់ទេសចរណ៍ថ្មី ព្រោះជាឆ្នេរធម្មជាតិដែលមិនទាន់មានការអភិវឌ្ឍ។
លោកថ្លែងថា៖ «ប្រសិនបើឆ្នេរនេះត្រូវអភិវឌ្ឍទៅជាតំបន់ទេសចរណ៍បានល្អ វានឹងក្លាយជាមេដែកដ៏សំខាន់ក្នុងការស្រូបយកភ្ញៀវទេសចរពីគ្រប់ទិសទី ខណៈរដ្ឋាភិបាលកម្ពុជាបានកំណត់យកខេត្តកែបជាតំបន់ទេសចរណ៍សម្រាកលម្ហែកម្រិតខ្ពស់»។
តាមលោក ថោង ខុន ក្រសួងទេសចរណ៍កំពុងសិក្សារៀបចំផែនការមេអភិវឌ្ឍវិស័យទេសចរណ៍នៅខេត្តកែប ហើយកំពុងត្រូវការអ្នកជំនាញបន្ថែមទៀត ដើម្បីជំរុញឲ្យការងារនេះអាចសម្រេចបានជោគជ័យ។
លោកបន្តទៀតថាជាមួយនឹងបទពិសោធ និងជំនាញរបស់វិនិយោគិនជប៉ុន លោកសង្ឃឹមថាការវិនិយោគនៅតំបន់ទេសចរណ៍ទាំងនេះប្រាកដជាអាចធ្វើទៅបានជាមិនខាន។
ខណៈបានបង្ហាញពីការចាប់អារម្មណ៍សម្រស់ផ្កាថ្មនៅសមុទ្រកម្ពុជា វិនិយោគិនជប៉ុនក៏ចាប់អារម្មណ៍លើការវិនិយោគនៅរមណីយដ្ឋានធម្មជាតិទឹកពុះក្នុងខេត្តកំពង់ស្ពឺផងដែរ។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបានប្រាប់ភ្នំពេញប៉ុស្តិ៍កាលពីម្សិលមិញថា បច្ចុប្បន្នក្នុងខេត្តកែបមាននៅសល់កន្លែងសម្រាប់វិនិយោគលើតំបន់ទេសចរណ៍បែបធម្មជាតិជាច្រើន ដូច្នេះបើជប៉ុនដែលជាអ្នកចូលចិត្តអភិរក្សធម្មជាតិចូលទៅអភិវឌ្ឍនោះ វានឹងធ្វើឲ្យទីនោះមានភាពទាក់ទាញខ្លាំង។
លោកថ្លែងថា៖ «បើក្នុងករណីមានការវិនិយោគពីជប៉ុនពិតមែននោះ ខ្ញុំគិតថាតំបន់នោះគឺក្លាយជាកន្លែងដែលមានភាពទាក់ទាញយ៉ាងខ្លាំងសម្រាប់អេកូទេសចរណ៍នៅកម្ពុជា ព្រោះជនជាតិជប៉ុនគឺជាអ្នកចូលចិត្តអភិរក្សធម្មជាតិ បើគាត់ទៅវិនិយោគនៅកន្លែងនោះនឹងមានភាពស្រស់បំព្រង និងមាននិរន្តរភាព»។
លោកបន្តថា ការវិនិយោគរបស់ជប៉ុនអាចនិយាយថា ជាការវិនិយោគដែលមានភាពច្បាស់លាស់ និងបានគិតទៅលើសិទ្ធិមនុស្ស និងបរិស្ថានជាចម្បង។
លោក សោម ចិន្តា ប្រធានមន្ទីរទេសចរណ៍ ខេត្តកែបបានឲ្យដឹងថា លោកមិនទាន់បានដឹងព័ត៌មាននេះទេ ប៉ុន្តែប្រសិនបើមានការចូលមកវិនិយោគលើវិស័យទេសចណ៍នោះ វានឹងផ្តល់ផលវិជ្ជមានច្រើនសម្រាប់ខេត្តកែប ខណៈក្នុងខេត្តកែបមានតំបន់ទេសចរណ៍បែបធម្មជាតិជាច្រើនដែលមិនទាន់មានអភិវឌ្ឍន៍។ លោកថ្លែងថា៖ «យើងពិតជាចង់បានវិនិយោគគិនឲ្យចូលមកអភិវឌ្ឍតំបន់ទាំង ២ នេះឲ្យកាន់តែមានភាពទាក់ទាញបន្ថែមទៀត»។
បើតាមលោក សោម ចិន្តា បច្ចុប្បន្នកោះទន្សាយតែងទទួលបានភ្ញៀវទេសចរទៅកម្សាន្តជាច្រើន ខណៈឆ្នេរអង្កោលមិនសូវមានភ្ញៀវទៅកម្សាន្តនោះទេ។
របាយការណ៍ក្រសួងទេសចរណ៍ដែលចេញផ្សាយកាលពីដើមសប្តាហ៍នេះ បានបង្ហាញថាក្នុងរយៈពេល ១០ ខែឆ្នាំ ២០១៩ កម្ពុជាទទួលបានភ្ញៀវទេសចរបរទេសសរុប ៥,២៩ លាននាក់កើនឡើង ៩,៧ ភាគរយបើធៀបនឹងរយៈពេលដូចគ្នាក្នុងឆ្នាំ ២០១៨ ដែលមាន ៤,៨២ លាននាក់។ ក្នុងនោះភ្ញៀវទេសចរជប៉ុនមាន ១៦៣- ៦៣៧ នាក់កើន ៣,៣ ភាគរយពី ១៥៨ ៤៣៩ នាក់៕