អាហ្សង់ទីនៈ លោក Nicolas Dujovne រដ្ឋមន្ដ្រីក្រសួងសេដ្ឋកិច្ចរបស់ប្រទេសអាហ្សង់ទីនបានលាលែងពីតំណែងកាលពីថ្ងៃអាទិត្យ បន្ទាប់ពីមួយសប្ដាហ៍នៃភាពចលាចលសេដ្ឋកិច្ច ដែលបណ្ដាលមកពីការចាញ់របស់លោកប្រធានាធិបតី Mauricio Macri នៅក្នុងការបោះឆ្នោតបឋមមុនពេលការបោះឆ្នោតទូទៅមួយ។
ប្រព័ន្ធព័ត៌មានរបស់ប្រទេសអាហ្សង់ទីនបានរាយការណ៍ថា លោក Dujovne នឹងត្រូវបានជំនួសដោយលោក Hernan Lacunza រដ្ឋមន្ដ្រីក្រសួងសេដ្ឋកិច្ចទទួលបន្ទុកខេត្ត Buenos Aires ។
តម្លៃប្រាក់ប៉េសូរបស់ប្រទេសនេះបានបញ្ចប់នៅសប្ដាហ៍នេះដែលបានធ្លាក់ចុះ ២០ ភាគរយនៃតម្លៃរបស់ខ្លួនធៀបនឹងប្រាក់ដុល្លារអាមេរិក ខណៈដែលទីភ្នាក់ងារវាយតម្លៃ Fitch និង S&P បានកាត់បន្ថយតម្លៃបំណុលរយៈពេលវែងរបស់ប្រទេសនេះដែលលើកឡើងពីភាពមិនច្បាស់លាស់ និងកំណើនហានិភ័យនៃការខកខានសងបំណុល។
លោក Dujovne បានឲ្យដឹងនៅក្នុងលិខិតមួយដែលបានបង្ហោះនៅលើគេហទំព័ររបស់កាសែត La Nacion ថាលោក «មានការជឿជាក់ថាស្ថិតក្រោមកាលៈទេសៈនេះថ្នាក់គ្រប់គ្រងរបស់រដ្ឋាភិបាលត្រូវការការបន្តជាថ្មីដ៏សំខាន់នៃសង្វៀនសេដ្ឋកិច្ច»។
លោកចាកចេញនៅពាក់កណ្ដាលនៃវិបត្តិសេដ្ឋកិច្ចកាន់តែខ្លាំង បន្ទាប់ពីការបោះឆ្នោតជុំដំបូងកាលពីថ្ងៃអាទិត្យមុនដែលមិនប៉ះពាល់ដល់សេដ្ឋកិច្ចទីផ្សារលោក Macri យ៉ាងខ្លាំងដែលលោកបានរៀបចំឡើងសម្រាប់ការបោះឆ្នោតជាថ្មី នៅពេលការស្ទង់មតិបង្ហាញថាលោក Alberto Fernandez ជាបេក្ខជនប្រកាន់កណ្ដាលឆ្វេងមានប្រៀបជាង។
ការបោះឆ្នោតជុំដំបូងនេះជាការបង្ហាញសម្រាប់ការបោះឆ្នោតទូទៅនៅខែតុលា។ សេចក្ដីប្រកាសរបស់លោក Dujovne បង្ហាញការផ្លាស់ប្តូរលើកដំបូងនៅក្នុងគណៈរដ្ឋមន្ដ្រីរបស់លោក Macri តាំងពីក្រុមអ្នកបោះឆ្នោតបានទៅបោះឆ្នោត។
ទីភ្នាក់ងារវាយតម្លៃ Fitch ដែលបានទម្លាក់ចំណាត់ថ្នាក់បំណុលរបស់ប្រទេសអាហ្សង់ទីន ២ កម្រិតមកនៅត្រឹម « CCC» បានឲ្យដឹងថា ការបរាជ័យរបស់ក្រុមប្រកាន់កណ្ដាលស្ដាំ «បង្កើនហានិភ័យនៃបែកបាក់ដោយសារតែយុទ្ធសាស្ដ្រគោលនយោបាយរបស់រដ្ឋបាលបច្ចុប្បន្នរបស់លោក Mauricio Macri ដែលបានដឹកនាំដោយកម្មវិធីមួយជាមួយនឹងមូលនិធិរូបិយវត្ថុអន្តរជាតិ (IMF)»។
លោក Fernandez បានចោទសួរកម្មវិធីកែទម្រង់ដែលគាំទ្រដោយកញ្ចប់សង្គ្រោះ ៥៦ ពាន់លានដុល្លារពីមូលនិធិរូបិយវត្ថុអន្តរជាតិរបស់រដ្ឋាភិបាលបច្ចុប្បន្ន។
ភ្នាក់ងារវាយតម្លៃ Standard & Poor''s បានទម្លាក់ចំណាត់ថ្នាក់របស់ប្រទេសអាហ្សង់ទីនពី B មកនៅត្រឹម B-។
លោក Dujovne បានឲ្យដឹងនៅក្នុងលិខិតមួយទៅអ្នកបោះឆ្នោតរបស់ប្រទេសអាហ្សង់ទីនដែលនៅសល់រយៈពេល ២ ខែរហូតដល់ការបោះឆ្នោតប្រធានាធិបតីថា៖ «ការលាលែងតំណែងរបស់ខ្ញុំគឺស្របជាមួយនឹងរដ្ឋាភិបាល និងឱកាសនយោបាយដែលស្ដាប់ប្រជាជន ហើយដែលធ្វើសកម្មភាពតាមនោះ»។
ប្រទេសនេះបច្ចុប្បន្នកំពុងស្ថិតក្នុងការធ្លាក់ចុះ និងបានបង្ហាញអតិផរណា ២២ ភាគរយនៅឆមាសទី ១ ឆ្នាំនេះដែលជាអត្រាមួយក្នុងចំណោមអត្រាខ្ពស់បំផុតជាច្រើននៅលើពិភពលោក ប៉ុន្តែ IMF បានឲ្យដឹងថាកម្មវិធីកំណែទម្រង់របស់លោក Macri កំពុងចាប់ផ្ដើមក្នុងការនាំមកនូវលទ្ធផល។
រដ្ឋមន្ដ្រីក្រសួងសេដ្ឋកិច្ចថ្មីនឹងមានភារកិច្ចដ៏ពិបាកនៃការព្យាយាមក្នុងការបណ្ដុះសន្ដិភាពផ្លូវចិត្តនៅក្នុងទីផ្សារស្របគ្នានឹងការដោះស្រាយការធ្លាក់ចុះសេដ្ឋកិច្ចរបស់ប្រទេសនេះនៅចំកណ្ដាលនៃសង្គ្រាមការបោះឆ្នោតកាន់តែខ្លាំងរបស់លោក Macri។
ប្រទេសអាហ្សង់ទីន ៣២ ភាគរយនៃប្រជាជនរស់នៅក្រោមបន្ទាត់ភាពក្រីក្រ។ ប្រទេសនេះមានអតិផរណាប្រចាំឆ្នាំជាង ៥០ ភាគរយ៕ LA