.jpg)
លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុ ថ្លែងនាពេលកន្លងមក។ រូបថត ក្រសួងសេដ្ឋកិច្ច និងហិរញ្ញវត្
ភ្នំពេញៈ រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុរបស់កម្ពុជាបានអំពាវនាវឲ្យវិស័យឯកជន និងរដ្ឋាភិបាលត្រូវតែធ្វើការប្រកៀកស្មាគ្នា ដើម្បីរក្សាកំណើនសេដ្ឋកិច្ចរបស់ប្រទេស ខណៈជំងឺកូវីដ ១៩ កំពុងធ្វើឲ្យប៉ះពាល់ដល់សេដ្ឋកិច្ចពិភពលោក និងតំបន់ ជាពិសេសលើតម្រូវការ និងផលិតកម្ម។
លោក អូន ព័ន្ធមុនីរ័ត្ន រដ្ឋមន្ដ្រីក្រសួងសេដ្ឋកិច្ច និងហិរញ្ញវត្ថុបានលើកឡើងក្នុងអំឡុងកិច្ចប្រជុំពិសេសជាមួយវិស័យឯកជនកាលពីចុងខែមេសាថា ការរីករាលដាលកូវីដ ១៩ កំពុងគំរាមកំហែងកាន់តែខ្លាំងមកលើដំណើរការអាជីវកម្មក្នុងវិស័យសេដ្ឋកិច្ចសំខាន់ៗរបស់កម្ពុជា។ កំណើនសេដ្ឋកិច្ចតំបន់ និងសកលនឹងមានការថមថយ ជាពិសេសការធ្លាក់ចុះតម្រូវការទីផ្សារខាងក្រៅ ការបិទការធ្វើដំណើររបស់ប្រទេសក្នុងតំបន់ និងសកលលោកដើម្បីទប់ស្កាត់ការឆ្លងនៃជំងឺកូវីដ ១៩។
លោកថ្លែងថា៖ «រដ្ឋាភិបាលតែងចាត់ទុកវិស័យឯកជនជាចលករដ៏សំខាន់ក្នុងការជំរុញកំណើនសេដ្ឋកិច្ច និងបង្កើតការងារជូនប្រជាពលរដ្ឋ។ ក្នុងបរិការណ៍នៃការរីករាលដាលជំងឺកូវីដ១៩ នេះរដ្ឋាភិបាល និង វិស័យឯកជនកំពុងប្រឈមបញ្ហារួមក្នុងការបន្តលើកកម្ពស់កិច្ចអភិវឌ្ឍន៍សង្គមសេដ្ឋកិច្ចកម្ពុជាប្រកបដោយចីរភាព»។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថា ចាប់តាំងពីការរីករាលដាលកូវីដ១៩ រដ្ឋាភិបាលបានដាក់ចេញដំណោះស្រាយឆ្លើយតបជាច្រើនក្នុងគោលបំណងជួយស្រោចស្រង់វិស័យដែលរងផលប៉ះពាល់ដូចជា កាត់ដេរ ទេសចរណ៍ សហគ្រាសធុនតូច និងមធ្យម និងដឹកជញ្ជូន។
លោកថ្លែងថា៖ «យើងអង្កេតឃើញថា រដ្ឋាភិបាលបានដាក់ចេញនូវវិធានការចំនួន ៣ ជុំរួចមកហើយដើម្បីជួយវិស័យឯកជនដូចជា ការលើកលែងពន្ធ ជាពិសេសលើវិស័យដែលរងផលប៉ះពាល់។ នេះជាការជួយដ៏សំខាន់មួយសម្រាប់ពួកយើងក្នុងអំឡុងពេលដ៏លំបាក ហើយយើងស្វាគមន៍ក្នុងការធ្វើការងារជាមួយរដ្ឋាភិបាលដើម្បីជំរុញកំណើនសេដ្ឋកិច្ច»។
កាលពីពាក់កណ្ដាលខែមីនា រដ្ឋាភិបាលបានដាក់ចេញនូវកញ្ចប់ផែនការចំនួន ៨០០ លានដុល្លារដល់ ២ ពាន់លានដុល្លារដើម្បីបន្ធូរបន្ថយផលប៉ះពាល់ខ្លាំងដោយសារវីរុសកូរ៉ូណាក្នុងរយៈពេល ៦ ខែដល់ ១ ឆ្នាំ។
ជាមួយគ្នានេះលោកនាយករដ្ឋមន្ដ្រី ហ៊ុន សែន ក៏បានប្រកាសកាលពីថ្ងៃទី ២៤ ខែកុម្ភៈថា កម្មករទាំងអស់ដែលធ្វើការនៅរោងចក្រដែលព្យួរការងារគួរតែទទួលបានយ៉ាងហោច ៦០ ភាគរយនៃប្រាក់ឈ្នួលអប្បបរមាក្នុងនោះ ៤០ ភាគរយបានមកពីថៅកែរោងចក្រ និង ២០ ភាគរយបានពីរដ្ឋាភិបាល។
ធនាគារសហគ្រាសធុនតូច និងមធ្យម (SME Bank) ថ្មីមួយមានមូលធនដំបូង ១០០ លានដុល្លារត្រូវបានដាក់ឲ្យដំណើរការដើម្បីផ្ដល់ហិរញ្ញប្បទានដល់ SME ខណៈធនាគារកសិកម្ម និងអភិវឌ្ឍន៍ជនបទ (ARDB) ដែលគ្រប់គ្រងដោយរដ្ឋក៏ត្រូវបានដាក់ឲ្យដំណើរការនូវកញ្ចប់ថវិកាចំនួន ៥០ លានដុល្លារដើម្បីផ្ដល់ឥណទានសម្រាប់ SME នៅក្នុងវិស័យកសិកម្មក្នុងស្រុកផងដែរ។
លោក អូន ព័ន្ធមុនីរ័ត្ន បានឲ្យដឹងថា ជាក់ស្ដែងរដ្ឋាភិបាលបានដាក់ចេញនូវវិធានការអន្តរាគមន៍ ៣ ជុំរួចមកហើយដើម្បីគ្រប់គ្រងផលប៉ះពាល់នៅក្នុងវិស័យសំខាន់ៗក្នុងគោលបំណងជួយដល់ក្រុមហ៊ុន រោងចក្រ សហគ្រាស និងអាជីវកម្មដែលទទួលរងផលប៉ះពាល់ ដើម្បីឲ្យក្រុមហ៊ុនទាំងនោះអាចបន្តអាជីវកម្មបាន។ ដូចជាការជួយដល់កម្មករ និយោជិតដែលបាត់បង់ ឬត្រូវព្យួរការងារឲ្យមានលំនឹងជីវភាព និងទ្រទ្រង់កំណើន ជាពិសេសជួយដល់សហគ្រាសធុនតូច និងមធ្យមដែលជាឆ្អឹងខ្នងសេដ្ឋកិច្ចជាតិ។
លោកថ្លែងថា៖ «ទាំងវិស័យឯកជន និងរដ្ឋាភិបាលត្រូវបន្តសហការយ៉ាងជិតស្និទ្ធក្នុងការត្រៀមកម្លាំងជាស្រេចដើម្បីចាប់យកកាលានុវត្តភាពថ្មីៗដែលអាចកើតឡើងក្នុងអំឡុងពេល និងក្រោយវិបត្តិកូវីដ១៩»។
ធនាគារអភិវឌ្ឍន៍អាស៊ីបានឲ្យដឹងនៅពេលថ្មីៗនេះថា នៅក្នុងសេណារីយោករណីល្អបំផុតមួយបន្ទាប់ពីការហាមឃាត់ការធ្វើដំណើររយៈពេល ២ ខែ និងការធ្លាក់ចុះយ៉ាងខ្លាំងតម្រូវការក្នុងស្រុក ដោយសារតែការរីករាលដាលជំងឺនេះ ប្រទេស កម្ពុជា អាចប្រឈមនឹងផលប៉ះពាល់ ១,១៥ ភាគរយទៅលើផលិតផលក្នុងស្រុកសរុបដែលស្មើនឹង ២៨៣,៣ លានដុល្លារ ហើយបើការរីករាលដាលនេះបន្តរយៈពេល ៦ ខែទៀត កើនឡើងរហូតដល់ ៧១១,៤ លានដុល្លារ។ ធនាគារបន្តថា សម្រាប់ករណីអាក្រក់បំផុតការខាតបង់ជិត ១ ពាន់លានដុល្លារចំពោះការរីករាលដាលមានរយៈពេលលើសពី ៦ ខែ៕LA
