.jpg)
កសិដ្ឋានចិញ្ចឹមគោយកទឹកដោះរបស់ក្រុមហ៊ុនទឹកដោះគោស្រស់ម៉ូម៉ូ នៅអរិយក្សត្រ។ ហុង មិនា
ភ្នំពេញៈ កម្ពុជាបានស្នើឲ្យអង្គការស្បៀងអាហារ និងកសិកម្មនៃអង្គការសហប្រជាជាតិ (FAO) ពិនិត្យលទ្ធភាព និងផ្តល់ការគាំទ្រដល់ការចិញ្ចឹមគោយកទឹកដោះនៅកម្ពុជា ខណៈផលិតផលទឹកដោះគោក្នុងទីផ្សារនាពេលបច្ចុប្បន្នភាគច្រើនជាផលិតផលនាំចូលមកពីប្រទេសជិតខាង។
សំណើនេះត្រូវបានលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទលើកឡើងក្នុងឱកាសជំនួបពិភាក្សាជាមួយ លោក Alexandre Huynh តំណាងអង្គការស្បៀងអាហារ និងកសិកម្មនៃអង្គការសហប្រជាជាតិប្រចាំកម្ពុជាកាលពីល្ងាចថ្ងៃពុធ។
លោក វេង សាខុន បាននិយាយថា បើទោះបីជាក្រសួងកសិកម្មបានខិតខំធ្វើការកែសម្រួលគោលនយោបាយរបស់ខ្លួនជាច្រើនមកហើយក៏ដោយ ក៏វិស័យនេះនៅមិនទាន់មានភាពល្អគ្រប់ផ្នែកនោះទេ។ លោកបន្តថា ជាក់ស្តែងការចិញ្ចឹមគោដើម្បីយកទឹកដោះសម្រាប់ផ្គត់ផ្គង់តម្រូវការទីផ្សារក្នុងស្រុកគឺនៅមានបរិមាណតិចតួចនៅឡើយ ដោយលោកស្នើឲ្យអង្គការ FAO និងដៃគូអភិវឌ្ឍន៍ដទៃទៀតចូលរួមគាំទ្រ ព្រោះទឹកដោះគោគឺជាអាហារូបត្ថម្ភដ៏សំខាន់សម្រាប់ទ្រទ្រង់ដល់ការលូតលាស់របស់កុមារនៅកម្ពុជា។
លោកបានថ្លែងថា៖ «ខ្ញុំសូមណែនាំអង្គការ FAO និងដៃគូអភិវឌ្ឍន៍ដទៃថា គួរពិចារណាផ្តល់ការគាំទ្រដល់ការចិញ្ចឹមគោយកទឹកដោះ ព្រោះទឹកដោះគោពោរពេញទៅដោយសារជាតិបំប៉ន និងសារជាតិលូតលាស់ដែលពិតជាសំខាន់ណាស់សម្រាប់កុមារ ជាពិសេសកុមារនៅជនបទ»។
កិច្ចសហការជាមួយបណ្តាអង្គការនានានឹងផ្តល់នូវផលប្រយោជន៍ជាច្រើនដើម្បីការអភិវឌ្ឍការចិញ្ចឹមគោយកទឹកដោះឲ្យបានកាន់តែច្រើននៅកម្ពុជា។នេះបើតាមលោក វេង សាខុន។
លោក Alexandre Huynh បានឯកភាពចំពោះការលើកឡើងរបស់លោក វេង សាខុន ហើយបានសន្យាថានឹងពិនិត្យលទ្ធភាពក្នុងការផ្ដល់កិច្ចសហការ ដោយលោកបញ្ជាក់ថា អង្គការ FAO នឹងនៅតែបន្តផ្តល់ការគាំទ្រដល់ក្រសួង ដើម្បីរួមគ្នាអភិវឌ្ឍវិស័យនេះឲ្យកាន់តែរីកចម្រើន។
កញ្ញា ម៉ៅ សុគន្ធា អ្នកទទួលបន្ទុកផ្នែកទីផ្សារនៃកសិដ្ឋានផលិតទឹកដោះគោ តេជោសែនឫស្សីត្រឹបដែលចិញ្ចឹមគោចំនួន ១០០ ក្បាល និងអាចផលិតទឹកដោះគោបានក្នុងរង្វង់ ៦០០ លីត្រ ក្នុង ១ ថ្ងៃ នៅខេត្តព្រះវិហារបានប្រាប់ភ្នំពេញប៉ុស្តិ៍កាលពីថ្ងៃម្សិលមិញថា បើទោះបីជាទឹកដោះគោមានតម្រូវការខ្ពស់នៅលើទីផ្សារក៏ដោយ ប៉ុន្តែសកម្មភាពនៃការវិនិយោគលើការចិញ្ចឹមគោដើម្បីយកទឹកដោះនៅកម្ពុជានៅមានកម្រិតតិចតួចនៅឡើយ។
កញ្ញាបន្តថា ប្រសិនបើកម្ពុជាមានការវិនិយោគបន្ថែមលើការចិញ្ចឹមគោយកទឹកដោះទៀតនោះគឺជាការល្អណាស់ ព្រោះវាមិនត្រឹមតែអាចជួយកាត់បន្ថយការនាំចូលប៉ុណ្ណោះទេ តែវាថែមទាំងជួយបង្កើតឱកាសការងារថ្មីៗសម្រាប់ប្រជាជនកម្ពុជាផងដែរ។
កញ្ញា ថ្លែងថា៖ «ខ្ញុំគាំទ្រឲ្យមានការវិនិយោគលើការចិញ្ចឹមគោយកទឹកដោះឲ្យបានច្រើនដើម្បីលើកកម្ពស់ផលិតផលក្នុងស្រុកក៏ដូចជាជំរុញអ្នកផលិតក្នុងស្រុកឲ្យខិតខំបង្កើនគុណភាពទឹកដោះគោរបស់ខ្លួនផងដែរ»។់
សម្រាប់ផែនការនៅពេលខាងមុខកញ្ញា សុគន្ធា បានប្រាប់ទៀតថា កសិដ្ឋានផលិតទឹកដោះគោតេជោសែនឫស្សី ត្រឹប ក៏មានផែនការបង្កើនការចិញ្ចឹមដែរ ប៉ុន្តែចំនួនប៉ុន្មាននោះកញ្ញាមិនទាន់អាចប្រាប់បាននោះទេ។
ខណៈការរីករាលដាលនៃជំងឺកូវីដ ១៩ កំពុងធ្វើឲ្យការលក់ផលិតផលជាច្រើនត្រូវធ្លាក់ចុះនោះ កញ្ញា សុគន្ធា បានប្រាប់ថាក្នុងអំឡុងពេលជំងឺកូវីដ ១៩ កំពុងរីករាលដាលនេះតម្រូវការទឹកដោះគោបានធ្លាក់ចុះយ៉ាងច្រើន តែកញ្ញារំពឹងថា បន្ទាប់ពីវិបត្តិនេះផុតរលត់ទៅតម្រូវការទឹកដោះគោនឹងមានកំណើនខ្ពស់ឡើងវិញជាមិនខាន។
នៅកម្ពុជាបច្ចុប្បន្នមានកសិដ្ឋានចិញ្ចឹមគោយកទឹកដោះប្រមាណ ២-៣ កន្លែងប៉ុណ្ណោះ ខណៈក្រៅពីនោះគឺជាការចិញ្ចឹមជាលក្ខណៈគ្រួសារ។ នេះបើតាមកញ្ញា សុគន្ធា៕ LA
