.jpg)
ពិធីចុះកិច្ចព្រមព្រៀងមូលនិធិរួមរវាង Grab និង UNDP ស្តីពីនិរន្តរភាពចរាចរណ៍នៅភ្នំពេញពីម្សិលមិញ។ ហេង ជីវ័ន
ភ្នំពេញៈ រដ្ឋមន្ត្រីក្រសួងសាធារណការ និងដឹកជញ្ជូនបានបញ្ជាក់ជាថ្មីកាលពីម្សិលមិញថា គម្រោងរថភ្លើងអាកាសនៅកណ្ដាលទីក្រុងភ្នំពេញដែលស្ថិតក្រោមការគាំទ្រពីរដ្ឋាភិបាលជប៉ុននៅតែកំពុងបន្តដំណើរការ ហើយការសិក្សាលទ្ធភាពត្រូវបានរំពឹងថានឹងត្រូវបញ្ចប់នៅឆ្នាំនេះ ឬត្រឹមឆ្នាំក្រោយ។
លោក ស៊ុន ចាន់ថុល បានប្រាប់អ្នកយកព័ត៌មានក្នុងអំឡុងពេលនៃការចុះហត្ថលេខាលើកិច្ចព្រមព្រៀងរវាងក្រុមហ៊ុនហៅតាក់ស៊ីជិះ Grab និងអង្គការ UNDP កាលពីម្សិលមិញស្តីពីការលើកកម្ពស់សុវត្ថិភាព និងសម្អាតការដឹកជញ្ជូននៅទីក្រុងភ្នំពេញថា រដ្ឋាភិបាលកម្ពុជាកំពុងបន្តធ្វើការលើគម្រោងរថភ្លើងអាកាសដើម្បីកាត់បន្ថយការកកស្ទះចរាចរណ៍ទីក្រុង។ លោកថ្លែងថា៖ «ការសិក្សានឹងត្រូវបញ្ចប់នៅឆ្នាំនេះ ឬត្រឹមឆ្នាំក្រោយដោយសារតែការសិក្សាទាំងអស់របស់ជប៉ុនជាទិន្នន័យទូលំទូលាយ ដូច្នេះវាត្រូវការពេលវេលាប្រហែលពី ២ ឬ ៣ ឆ្នាំ»។
លោកក៏បានបដិសេធពីព័ត៌មានដែលថា រដ្ឋាភិបាលជប៉ុនបានបដិសេធថវិកាលើគម្រោងនេះផងដែរ។
លោកបានថ្លែងថា៖ «ខ្ញុំចង់បញ្ជាក់ឲ្យច្បាស់ថា រដ្ឋាភិបាលជប៉ុនបានយល់ព្រមរួចហើយ បន្ទាប់ពីការស្នើសុំដោយលោកនាយករដ្ឋមន្ដ្រី ហ៊ុន សែន សម្រាប់ការសាងសង់រថភ្លើងអាកាស ប៉ុន្តែការសិក្សាត្រូវការពេលវេលាយូរ»។ លោកបន្ថែមថាភាគីទាំង ២ បានជួបគ្នា ២ ដងរួចហើយសម្រាប់ការពិភាក្សាលើគម្រោងនេះ។
លោក ស៊ុន ចាន់ថុល បានថ្លែងថាការពិភាក្សាលើកទី ៣ នឹងធ្វើនៅខែមិថុនានេះ ហើយរដ្ឋាភិបាលនឹងប្រកាសជាសាធារណៈអំពីការសាងសង់នេះ។ លោកបញ្ជាក់ថារថភ្លើងអាកាសទៅព្រលានយន្តហោះប្រវែង ១៨ គីឡូម៉ែត្រចេញពីតំបន់ជុំវិញផ្សារថ្មីមកព្រលានយន្តហោះភ្នំពេញនឹងចំណាយថវិកាពី ៨០០ ទៅ ១ ០០០ លានដុល្លារ។
ការដោះស្រាយចរាចរណ៍
កម្មវិធីអភិវឌ្ឍន៍របស់អង្គការសហប្រជាជាតិ (UNDP) និងក្រុមហ៊ុនហៅតាក់ស៊ីជិះ Grab កាលពីថ្ងៃម្សិលមិញបានចុះហត្ថលេខាលើកិច្ចព្រមព្រៀងមូលនិធិរួម ស្ដីពីការពង្រឹងសុវត្ថិភាព និងនិរន្តរភាពនៃចរាចរណ៍ក្នុងទីក្រុងភ្នំពេញ។ គម្រោងនេះនឹងមានមូលនិធិ ៥០ ម៉ឺនដុល្លារដែលនឹងអនុវត្តរយៈពេល ៣ ឆ្នាំដើម្បីសម្រួលលើបញ្ហាការកកស្ទះចរាចរណ៍ក្នុងទីក្រុង និងសុវត្ថិភាពដឹកជញ្ជូនប្រកបដោយចីរភាព។
លោក ស៊ុន ចាន់ថុល ដែលធ្វើជាអធិបតីនៃការចុះហត្ថលេខាថ្លែងថា៖ «យើងមានក្រុមការងារពិសេសរួចហើយក្នុងការស្វែងរកដំណោះស្រាយលើការកកស្ទះចរាចរណ៍នៅទីក្រុងភ្នំពេញ និងជ្រើសរើសទិសដៅជាក់លាក់នៅទីក្រុង ដើម្បីត្រួតពិនិត្យលើបញ្ហានោះ»។
លោកបន្តថា៖ «ក្រុមហ៊ុន Grab នឹងបញ្ជូនទិន្នន័យព័ត៌មានឲ្យពួកយើងអំពីការកកស្ទះចរាចរណ៍ ហើយនឹងធ្វើការរួមគ្នាជាមួយ UNDP ដើម្បីរកឲ្យឃើញបញ្ហានេះ»។
គម្រោងនេះនឹងផ្តោតលើការធ្វើឲ្យប្រសើរឡើងវិញនូវស្ថានភាពចរាចរណ៍ក្នុងទីក្រុងភ្នំពេញ និងប្រព័ន្ធដឹកជញ្ជូនតាមរយៈការប្រមូលចងក្រងទិន្នន័យចរាចរណ៍ ការកាត់បន្ថយការបំភាយឧស្ម័នផ្ទះកញ្ចក់ តាមរយៈវិធានការពាក់ព័ន្ធនឹងប្រេងឥន្ធនៈ និងការប្រើប្រាស់យានយន្តបែបបរិស្ថាន។
តាមក្រសួងសាធារណការ និងដឹកជញ្ជូនចំនួនយានយន្តនៅទីក្រុងភ្នំពេញបានកើនឡើងរៀងរាល់ឆ្នាំជាមធ្យម ២០ ភាគរយដែលនាំឲ្យចំនួនយានយន្តសរុបដែលចុះបញ្ជីគិតមកដល់ពេលនេះមានចំនួនជាង ៤,៥ លានគ្រឿង។
លោក Nick Beresford នាយកប្រចាំប្រទេសទទួលបន្ទុក UNDP ប្រចាំនៅកម្ពុជាថ្លែងថាគំនិតផ្ដួចផ្ដើមនេះនឹងអនុវត្តលើការទទួលខុសត្រូវសង្គម និងផ្ដល់គំរូថ្មីនៃការចូលរួមរបស់វិស័យឯកជន និងសាធារណៈ។
លោក Russell Cohen ប្រធានផ្នែកប្រតិបត្តិការប្រចាំតំបន់របស់ Grab ថ្លែងថាវាជាឱកាសដ៏ធំដែល Grab ធ្វើភាពជាដៃគូជាមួយ UNDP ដើម្បីដោះស្រាយបញ្ហានេះ៕LA
