ភ្នំពេញៈ រដ្ឋមន្ដ្រីក្រសួងឧស្សាហកម្ម និងសិប្បកម្ម នឹងរៀបចំកិច្ចប្រជុំជាមួយសហគមន៍អំបិលនៅខេត្តកែប និងខេត្តកំពត នៅសប្ដាហ៍ក្រោយ ដើម្បីពិភាក្សាបញ្ហាប្រឈមរបស់ឧស្សាហកម្មនេះ។ នេះបើតាមអ្នកនាំពាក្យរបស់ក្រសួង។
កិច្ចប្រជុំនេះធ្វើឡើងបន្ទាប់ពីសហគមន៍ផលិតអំបិលបានជូនដំណឹងទៅក្រសួងអំពីការរំលាយសហគមន៍ចោល។
លោក អ៊ុំ សុតា្ថ អ្នកនាំពាក្យក្រសួងឧស្សាហកម្ម និងសិប្បកម្ម បានប្រាប់កាសែតភ្នំពេញប៉ុស្ដិ៍កាលពីថ្ងៃពុធថា ក្រសួងបានទទួលលិខិតពីសហគមន៍អំបិលហើយអំពីការស្នើសុំរំលាយសហគមន៍នេះ ប៉ុន្តែមិនបានបញ្ជាក់ពីមូលហេតុជាក់លាក់នោះទេ។
លោកថ្លែងថា៖ «រដ្ឋមន្ដ្រីនឹងមានកិច្ចប្រជុំមួយជាមួយមន្ដ្រីខេត្តនៅក្នុងវិស័យនេះ ដើម្បីមើលបញ្ហាប្រឈម និងស្វែងរកដំណោះស្រាយ»។ លោកបន្តថា៖ «ប៉ុន្តែដោយផ្អែកលើការស្នើសុំរំលាយនេះ សហគមន៍នេះមិនបានបញ្ជាក់ពីបញ្ហាជាក់លាក់នោះទេ»។
ប៉ុន្តែ លោក ប៊ុន ណារិន ប្រធានផ្នែកបច្ចេកទេសនៅសហគមន៍ផលិតអំបិលកែប-កំពតបានប្រាប់កាសែតភ្នំពេញប៉ុស្ដិ៍កាលពីម្សិលមិញថា បញ្ហាប្រឈមគឺដោយសារតែការប្រកួតប្រជែងតម្លៃក្នុងចំណោមក្រុមហ៊ុនផលិតក្នុងស្រុក។
លោកថ្លែងថា៖ «វាកំពុងធ្វើឲ្យប៉ះពាល់ដល់សហគមន៍នេះ ដោយសារតែយើងត្រូវតែប្រកួតប្រជែងជាមួយក្រុមហ៊ុនផលិតក្នុងស្រុកផ្ទាល់របស់យើង»។ លោកបន្តថា៖ «តើយើងអាចដំណើរការសហគមន៍របស់យើងម្ដេចបាន ខណៈ ៣០ ភាគរយនៃអ្នកផលិតអំបិលមិនចូលរួមជាមួយយើងនោះ វាប៉ះពាល់ដល់ប្រតិបត្តិការរបស់សហគមន៍នេះ»។
សហគមន៍អំបិលរបស់កម្ពុជា ដំណើរការអស់រយៈពេល ១៥ ឆ្នាំហើយ រហូតមកដល់ពេលនេះ ដែលមានស្រែអំបិលជាង ៤ ៦០០ ហិកតា នៅក្នុងខេត្តកំពត និងខេត្តកែប ដោយមានសមាជិក ២០០ គ្រួសារ។ លោក ណារិន បានបញ្ជាក់ថា៖ «នៅពេលនេះយើងកំពុងរង់ចាំទទួលដំណឹងពីក្រសួងឧស្សាហកម្មដើម្បីស្វែងរកដំណោះស្រាយសម្រាប់ពួកយើង»។
លោក ណារិន បានឲ្យដឹងថា សហគមន៍នេះ បានផ្ញើលិខិតពីការរំលាយសហគមន៍នេះទៅអភិបាលខេត្ត ក្រសួងមហាផ្ទៃ ក្រសួងឧស្សាហកម្ម និងសិប្បកម្ម តាំងពីដើមខែនេះ។
ជាមួយនឹងពាក្យចចាមអារ៉ាមថា ស្រែអំបិលនឹងត្រូវអភិវឌ្ឍទៅជាអចលនទ្រព្យផ្សេងទៀតដោយក្រុមវិនិយោគិនចិន អ្នកនាំពាក្យក្រសួងឧស្សាហកម្ម និងសិប្បកម្ម បានឲ្យដឹងថា តំបន់នេះត្រូវបានរដ្ឋាភិបាលដាក់ឲ្យស្ថិតនៅក្រោមអនុក្រឹត្យជាតំបន់អភិរក្សសម្រាប់តែការផលិតអំបិលតែប៉ុណ្ណោះ ដែលមិនមានក្រុមវិនិយោគិនណាមួយអាចប្រែក្លាយទៅជាអចលនទ្រព្យផ្សេងនោះទេ។
លោកលើកឡើងថា៖ «ទោះបីដីស្រែអំបិលនោះជាដីឯកជនក៏ដោយ ទោះបីជាពួកគេលក់ឲ្យអ្នកផ្សេងក៏ដោយ ក៏ដីនេះនៅតែត្រូវប្រើប្រាស់សម្រាប់ការផលិតអំបិល ហើយពួកគេមិនអាចផ្លាស់ប្តូរទៅជាវិស័យផ្សេង ឬអភិវឌ្ឍអ្វីផ្សេងបានទេ»។
លោកស្រី ថូង ធីតា ស្ថាបនិកក្រុមហ៊ុនផលិតអំបិល Thaung Enterprise បានប្រាប់ខណៈវិស័យនេះប្រកួតប្រជែងរួចហើយជាមួយអំបិលនាំចូល ការមិនបង្រួបបង្រួមគ្នាក្នុងចំណោមក្រុមហ៊ុនផលិតអំបិលក្នុងស្រុកកំពុងធ្វើឲ្យប៉ះពាល់ដល់ឧស្សាហកម្មនេះទាំងមូល។
លោកស្រីថ្លែងថា៖ «វាសោកស្ដាយខ្លាំងណាស់ ក្នុងការឮដូច្នេះ ហើយយើងសង្ឃឹមថា នៅពេលអនាគតដ៏ខ្លីសមាគម ឬសហគមន៍ថ្មីមួយ អាចត្រូវបានបង្កើតឡើង ដើម្បីការពារផលប្រយោជន៍សហគមន៍អំបិល ដែលរួមមានកសិករ និងក្រុមហ៊ុនផលិតអំបិលទាំងអស់»។ លោកស្រីបានបន្តថា៖ «ស្រែអំបិលគឺជាទ្រព្យសកម្មធំជាងគេសម្រាប់ពួកយើងទាំងអស់គ្នា និងប្រទេសនេះ»។
ប្រទេស កម្ពុជា បានប្រកាសកាលពីឆ្នាំមុនក្នុងការនាំចូលអំបិលប្រហែល ៣០ ០០០ តោនពីប្រទេស ចិន ដើម្បីបំពេញកង្វះខាតអំបិលក្នុងស្រុក ដោយសារកម្ពុជាមិនអាចផលិតអំបិលបានគ្រប់គ្រាន់កាលពី ឆ្នាំ២០១៨៕LA