.jpg)
លោក ចម ប្រសិទ្ធ រដ្ឋមន្ដ្រីក្រសួងឧស្សាហកម្ម និងសិប្បកម្ម។ រូបភាព ក្រសួងឧស្សាហកម្ម និងសិប្បកម្ម
ភ្នំពេញៈ រដ្ឋមន្រ្តីក្រសួងឧស្សាហកម្ម និងសិប្បកម្ម កាលពីម្សិលមិញបានព្រមានដកអាជ្ញាប័ណ្ណសហគ្រាសផ្គត់ផ្គង់ទឹកស្អាតឯកជនទំាងឡាយណា ដែលមិនបានអនុវត្តតាមផែនការអាជីវកម្មរបស់ខ្លួន។
ការព្រមាននេះធ្វើឡើងក្នុងសិក្ខាសាលាផ្សព្វផ្សាយអំពីកម្មវិធី « Pay As You Save» របស់ក្រុមហ៊ុនផ្គត់ផ្គង់ម៉ូទ័របូមទឹក Grundfos និងការបង្ហាញលទ្ធផលគម្រោងកែលម្អស្ថានីយ ទឹកស្អាតក្រុងដូនកែវ ខេត្តតាកែវ កាលពីថ្ងៃម្សិលមិញ។
លោក ចម ប្រសិទ្ធ រដ្ឋមន្ដ្រីក្រសួងឧស្សាហកម្ម និងសិប្បកម្ម ថ្លែងថា មានក្រុមហ៊ុនផ្គត់ផ្គង់ទឹកស្អាតឯកជនជាច្រើន មិនបានពង្រីកតំបន់ចែកចាយ តាមផែនការដែលពួកគេបង្ហាញដើម្បីទទួលបានអាជ្ញាប័ណ្ណនោះទេ។
លោកបានថ្លែងថា៖ «ប្រសិនបើប្រតិបត្តិករផ្គត់ផ្គង់ទឹកស្អាត មិនអាចពង្រីកបណ្ដាញចែកចាយរបស់ពួកគេ ទៅដល់តំបន់ជាច្រើន តាមផែនការ [ដែលពួកគេសន្យា] ក្រសួងនឹងចាត់វិធានការចាប់ពីឆ្នាំក្រោយ ដោយអនុញ្ញាតឲ្យប្រតិបត្តិករថ្មីៗ ធ្វើការប្រកួតប្រជែង»។
លោកបន្តថា៖ «ខ្ញុំផ្ដល់សិទ្ធិផ្ដាច់មុខដល់អ្នក ប៉ុន្តែអ្នកមិនបានប្រើប្រាស់ភាពផ្ដាច់មុខនេះត្រឹមត្រូវនោះទេ។ អ្នកគ្រាន់តែដេក និងមិនធ្វើអ្វីសោះ ដូច្នេះ ខ្ញុំនឹងដកហូតអាជ្ញាប័ណ្ណរបស់អ្នក ឬតំបន់ណាមួយដែលអ្នកមិនប្រតិបត្តិការ ទុកឲ្យក្រុមហ៊ុនផ្សេងធ្វើការងារជំនួស»។
លោករដ្ឋមន្ដ្រី ក៏បានជំរុញឲ្យក្រុមហ៊ុនផ្គត់ផ្គង់ទឹកស្អាត ត្រូវបំពាក់ដោយបច្ចេកវិទ្យាចុងក្រោយ និងគំរូពាណិជ្ជកម្មថ្មីៗ ក្នុងការជំរុញប្រសិទ្ធភាពការគ្រប់គ្រងទឹកស្អាត ដើម្បីអាចពង្រីកតំបន់ចែកចាយ។
តួលេខពីក្រសួងឧស្សាហកម្ម និងសិប្បកម្ម ឲ្យដឹងថា ក្រសួងបានផ្ដល់អាជ្ញាប័ណ្ណ ២៤០ ដល់ក្រុមហ៊ុនទឹកស្អាតឯកជន សម្រាប់ការផ្គត់ផ្គង់ទូទាំងប្រទេស។ ក្រៅពីនេះ មានសហគ្រាសទឹកស្អាតគ្រប់គ្រងដោយរដ្ឋ ១០ ផ្សេងទៀតផងដែរ។ ប្រតិបត្តិករទាំងអស់រួមបញ្ចូលគ្នា អាចផ្គត់ផ្គង់ទឹកស្អាតប្រហែល ១ ភាគ ៣ ប៉ុណ្ណោះនៃប្រជាជនកម្ពុជា ភាគច្រើននៅតំបន់ទីក្រុង។
បច្ចុប្បន្ន Grundfos កំពុងអនុវត្តគម្រោងសាកល្បងនៃការកែលម្អស្ថានីយទឹកស្អាតក្រុងដូនកែវ ខេត្តតាកែវ ដែលបានបង្ហាញពីជោគជ័យក្នុងការគ្រប់គ្រងទឹកស្អាត។
លោក Leong Chee Khuan តំណាងពី Grundfos ឲ្យដឹងថា គំរូអាជីវកម្មថ្មីនេះបានជួយរោងចក្រសន្សំថាមពលបានជាង ២៧០,០០០ គីឡូវ៉ាត់ម៉ោង ហើយសន្សំទឹកប្រហែល ២០ ម៉ឺនម៉ែត្រគុបក្នុង ១ ឆ្នាំ។ លោកថ្លែងថា៖ «គម្រោងនៅខេត្តតាកែវបង្ហាញថា គម្រោងអាជីវកម្មថ្មីរបស់យើងមានសក្ដានុពលខ្ពស់នៅកម្ពុជា»៕LA
