.jpg)
សកម្មភាពនៃការរុះរើបណ្តាញអគ្គិសនីនៅទីក្រុងភ្នំពេញនាពេលកន្លងមក។ ហេង ជីវ័ន
ភ្នំពេញៈ ក្រសួងរ៉ែ និងថាមពលបានឲ្យដឹងថា ប្រទេសកម្ពុជានឹងមិនប្រឈមនឹងកង្វះថាមពលអគ្គិសនីទៀតទេនៅឆ្នាំនេះ ខណៈការផ្គត់ផ្គង់នឹងកើនឡើង។
ថ្លែងនៅក្នុងបទសម្ភាសមួយជាមួយទូរទស្សន៍ក្នុងស្រុកកាលពីថ្ងៃអង្គារលោក ស៊ុយ សែម រដ្ឋមន្ដ្រីក្រសួងរ៉ែ និងថាមពលបានឲ្យដឹងថានៅរដូវប្រាំងឆ្នាំនេះ តម្រូវការថាមពលនឹងមានប្រហែល ២ ២១៤ មេហ្គាវ៉ាត់ កើនឡើង ៤១៤ មេហ្គាវ៉ាត់ធៀបនឹងឆ្នាំមុន។ លោកបានថ្លែងបន្តទៀតថា៖ «កង្វះថាមពលអគ្គិសនីនឹងមិនកើតឡើងជាថ្មីទៀតនោះទេនៅក្នុងរដូវប្រាំងឆ្នាំនេះ បច្ចុប្បន្នយើងមានទឹកនៅក្នុងអាងទំនប់ ៩០ ភាគរយ»។
វិស័យឯកជនបានស្វាគមន៍ចំពោះការប្រកាសរបស់រដ្ឋាភិបាលនៅពេលនេះ។
លោក ចាន់ សុខឃាំង អនុប្រធានសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្ដិ៍កាលពីថ្ងៃអង្គារថា វានឹងជួយដល់វិស័យស្រូវអង្ករក្នុងការរក្សាការប្រកួតប្រជែង និងការផលិត។ លោកបន្តថា៖ «យើងរីករាយយ៉ាងខ្លាំង និងស្វាគមន៍ ដូច្នេះការផលិតរបស់យើងនឹងដំណើរការដោយរលូន»។
លោក ស៊ុយ សែម បញ្ជាក់ថាដើម្បីដោះស្រាយកង្វះថាមពល រដ្ឋាភិបាលមានយុទ្ធសាស្ដ្រសំខាន់ៗ ៣។ ទី១ រក្សាទឹកទុកនៅក្នុងអាង។ ទី២ បង្កើនការនាំចូលថាមពលពីប្រទេសឡាវ និងថៃ ហើយចុងក្រោយគឺបង្កើតគម្រោងអភិវឌ្ឍន៍កាន់តែច្រើនពីថាមពលសូឡា ថាមពលខ្យល់ និងរោងចក្រថាមពលជីវម៉ាស់។
លោកបាននិយាយយោងទៅដល់ម៉ាស៊ីនភ្លើង ២០០ មេហ្គាវ៉ាត់ តម្លៃ ១៨០ លានដុល្លារ ពីប្រទេស អាល្លឺម៉ង់ និងម៉ាស៊ីនថាមពល ២០០ មេហ្គាវ៉ាត់ តម្លៃ ១៧៥ លានដុល្លារ ពីប្រទេស ហ្វាំងឡង់ ថានឹងផលិតថាមពលអគ្គិសនីលើកដំបូងប្រហែល ១០០ មេហ្គាវ៉ាត់ នៅខែមេសាឆ្នាំនេះ និង ៣០០ មេហ្គាវ៉ាត់នៅខែមិថុនា។
លោកលើកឡើងថា៖ «យើងក៏បាននាំចូលថាមពល ៣០ មេហ្គាវ៉ាត់បន្ថែមពីប្រទេស ថៃ និង ១៥០ មេហ្គាវ៉ាត់ ពីប្រទេស ឡាវ បូកនឹង ១៩៥ មេហ្គាវ៉ាត់ ពីទំនប់ដនសាហុងដែលបានតភ្ជាប់អគ្គិសនីជាតិកាលពីពេលថ្មីៗនេះ និងថាមពល ១៥០ មេហ្គាវ៉ាត់ បានពីរោងចក្រដំណើរការដោយធ្យូងថ្មនៅក្រុងព្រះសីហនុកាលពីឆ្នាំមុន»។
ប្រទេស កម្ពុជា បាននាំចូលអគ្គិសនីពីប្រទេស ឡាវ មានតម្លៃប្រហែល ៨ លានដុល្លារ កាលពីឆ្នាំមុន។ នេះបើតាម Vientiane Times ជាទីភ្នាក់ងារព័ត៌មានរបស់ឡាវ។
ប្រទេស កម្ពុជា ផលិតអគ្គិសនីដោយខ្លួនឯងភាគច្រើនចេញពីទំនប់វារីអគ្គិសនី មានចំនួនប្រហែល ៤៨ ភាគរយ និងរោងចក្រដំណើរការដោយធ្យូងថ្ម ដែលមានចំនួនប្រហែល ៤៧ ភាគរយ នៃការផលិតថាមពល។ ប្រហែល ១៥ ភាគរយ ត្រូវបាននាំចូលពីប្រទេសជិតខាង៕LA
