.jpg)
រដ្ឋមន្រ្តីក្រសួងពាណិជ្ជកម្ម លោក ប៉ាន សូរស័ក្តិ បានបន្តសន្យាថានឹងដោះស្រាយបញ្ហាប្រឈមរបស់សហគ្រាសធុនតូច និងមធ្យម (SME)។ Ministry of Commerce Via Facebook.
ភ្នំពេញៈ រដ្ឋមន្រ្តីក្រសួងពាណិជ្ជកម្ម លោក ប៉ាន សូរស័ក្តិ បានបន្តសន្យាថានឹងដោះស្រាយបញ្ហាប្រឈមរបស់សហគ្រាសធុនតូច និងមធ្យម (SME) ដើម្បីអភិវឌ្ឍទីផ្សារវិស័យនេះ ជាអ្វីដែលតំណាង SME នៅកម្ពុជាលើកឡើងថា ជាការសន្យាដដែលៗ ខណៈបញ្ហារបស់សហគ្រិននៅតែគ្មានដំណោះស្រាយ។
ការលើកឡើងរបស់ លោក ប៉ាន សូរស័កិ្ដ រដ្ឋមន្ដ្រីក្រសួងពាណិជ្ជកម្ម ធ្វើឡើងក្នុងពិធីបុណ្យសមុទ្រលើកទី ៧ នៅខេត្តកោះកុងកាលពីចុងសប្ដាហ៍មុន ដែលស្ដង់លក់ ទំនិញកម្ពុជាចំនួន ១០៣ កំពុងប្រមូលផ្ដុំគ្នានៅក្នុង ពិព័រណ៍ក្នុងព្រឹត្តិការណ៍នេះ។
សេចក្ដីប្រកាសព័ត៌មានបានពីក្រសួងពាណិជ្ជកម្ម (MoC) បានឲ្យដឹងនៅលើគេហទំព័រហ្វេសប៊ុករបស់ខ្លួនកាលពីថ្ងៃសៅរ៍ថា លោក សូរស័កិ្ដ បានប្រកាសថា លោកនឹងដោះស្រាយបញ្ហាប្រឈមសម្រាប់ SME សម្រាប់អត្ថប្រយោជន៍របស់កសិករ និងក្រុមហ៊ុនផលិតដែលធ្វើឲ្យវាក្លាយជាក្បាលម៉ាស៊ីនសម្រាប់សេដ្ឋកិច្ចកម្ពុជា ដូចដែលបានកំណត់ រួចហើយនៅក្នុងយុទ្ធសាស្ដ្រចតុកោណដំណាក់កាលទី ៤ របស់រដ្ឋាភិបាល។
ទោះបីជាមិនបានបង្ហាញផែនការពិតប្រាកដ ក្នុងការជួយដល់វិស័យ SME ក៏ដោយ ក៏លោក សូរស័កិ្ដ ជំរុញក្រុមហ៊ុនផលិត និងពាណិជ្ជករត្រូវលើកឡើងមតិយោបល់ និងការផ្ដល់យោបល់ដើម្បីកែលម្អបញ្ហាទីផ្សារ ដើម្បីឲ្យក្រសួងនឹងចេញផ្សាយការវាស់វែងពិតប្រាកដដើម្បីកែលម្អបញ្ហានេះ។
លោក ស៊ាង ថៃ អ្នកនាំពាក្យរបស់ MoC បានឲ្យដឹងកាលពីម្សិលមិញថា ក្រសួងនឹងជួយសម្រួលនីតិវិធីធ្វើពាណិជ្ជកម្ម ដើម្បីកាត់បន្ថយនីតិវិធីស្មុគស្មាញ ក្នុងការធ្វើពាណិជ្ជកម្មសម្រាប់ SME និងការបង្កើនការចរចាអំពីវិញ្ញាបនបត្រអនាម័យ និងភូតគាមអនាម័យ (SPS) ដើម្បីបង្កើនសមត្ថភាពប្រកួតប្រជែងរបស់SME នៅក្នុងប្រទេស កម្ពុជា។
លោកថ្លែងថា៖ «បញ្ហាពាណិជ្ជកម្មអន្តរជាតិបច្ចុប្បន្ន លែងជាបញ្ហានៃពន្ធនាំចូលដូចជាពន្ធគយដូចមុនទៀតហើយ ប៉ុន្តែគឺបញ្ហាអនាម័យ ដូចជាបញ្ហា SPS»។ លោកបន្ថែមថា ទីផ្សារជាច្រើនប្រើប្រាស់ SPS ជាឧបសគ្គក្នុងការបន្ថយល្បឿនការ នាំចេញពីប្រទេសជាច្រើន ហើយ SME របស់កម្ពុជា មានការពិបាកក្នុងការឆ្លើយតបតាមតម្រូវការរឹតបន្តឹង SPS នៅក្នុងប្រទេសមួយចំនួន។
លោកបានបញ្ជាក់ទៀតថា៖ «យើងកំពុងចរចាជាមួយប្រទេសជាច្រើន ដើម្បីកាត់បន្ថយបញ្ហា SPS ហើយវានឹងផ្ដល់អត្ថប្រយោជន៍ដល់ SME របស់កម្ពុជា»។
បញ្ហាប្រឈមមួយចំនួនមាននៅក្នុងការអភិវឌ្ឍឧស្សាហកម្ម និង SME នៅក្នុងប្រទេស កម្ពុជា ដែលរួមមានផលិតភាពទាប តម្លៃធ្វើពាណិជ្ជកម្មខ្ពស់ លំហូរចូលច្រើននៃទំនិញសម្រេចមកពីបរទេស ដែលកម្រិតសក្ដានុពលកំណើន SME ក្នុងស្រុក។
លោក តែ តាំងប៉រ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (Fasmec) បានឲ្យដឹងកាលពីម្សិលមិញថា លោកមានសង្ឃឹមបន្តិចបន្តួចលើការសន្យារបស់រដ្ឋមន្ដ្រី MoC ដោយលើកឡើងថា និយាយតែមាត់ម្ដងហើយម្ដងទៀត ប៉ុន្តែវិធានការតិចតួច ក្នុងការដោះស្រាយបញ្ហាពិតប្រាកដ និងបញ្ហាប្រឈមនៅក្នុង SME របស់កម្ពុជា។
លោក តែ តាំងប៉រ ដែលសម្ព័ន្ធរបស់លោកមានសមាជិកជាង ៣០០ និងការិយាល័យ ២៥ នៅទូទាំងប្រទេស បានឲ្យដឹងថា រដ្ឋាភិបាលកម្ពុជា បានកំណត់យ៉ាងច្បាស់ពីផែនការសកម្មភាព ដើម្បីជួយដល់ការអភិវឌ្ឍរបស់ SME កម្ពុជា នៅក្នុងយុទ្ធសាស្ដ្រចតុកោណ និងគោលនយោបាយអភិវឌ្ឍន៍ឧស្សាហកម្មឆ្នាំ ២០១៥-២០២៥ ប៉ុន្តែគោលនយោបាយនេះមិនបាន អនុវត្តដោយត្រឹមត្រូវនោះទេ។
លោកថ្លែងថា៖ «វាជាពាក្យដែល [រដ្ឋមន្ដ្រី] បាននិយាយច្រើនអាណត្តិមកហើយ ប៉ុន្តែបញ្ហាដដែលនៅតែកើតឡើង។ គោលនយោបាយបានពីនាយករដ្ឋមន្ដ្រីគឺល្អគ្រប់គ្រាន់ ប៉ុន្តែវាមិនត្រូវបានដំណើរការត្រឹមត្រូវទេ»។
លោកបន្ថែមថា ផលិតផលសម្រេចមកពីប្រទេសជិតខាង នៅតែកំពុងជោរជន់នៅក្នុងប្រទេស កម្ពុជា ដោយគ្មានតម្លៃពន្ធនាំចូលត្រឹមត្រូវ ហើយវាគ្រោះថ្នាក់ខ្លាំងដល់ការផលិតរបស់ SME ក្នុងស្រុក។ លោកបន្ថែមថា ក្រសួងបានអនុញ្ញាតឲ្យមានលំហូរចូលទំនិញបរទេសយ៉ាងច្រើនស្ថិតក្រោមមូលហេតុពាណិជ្ជកម្មសេរីដែលវាប៉ះពាល់ដល់កំណើនរបស់ SME ក្នុងស្រុក។
លោកបន្តថា៖ «ខ្ញុំផ្ដល់យោបល់ដល់លោករដ្ឋមន្ដ្រី ត្រូវសម្លឹងមើលគោលនយោបាយរបស់រដ្ឋាភិបាល ដែលអនុម័តពីលោកនាយករដ្ឋមន្ដ្រី ក្នុងការកាត់បន្ថយផលិតផលសម្រេចពីប្រទេសជិតខាង និងជំរុញការកែច្នៃការផលិតដែលត្រូវបានកំណត់ នៅក្នុងគោលនយោបាយអភិវឌ្ឍន៍ឧស្សាហកម្មឆ្នាំ ២០១៥-២០២៥»។
លោកបន្ថែមថា បើអាចអនុវត្តតាមគោលនយោបាយរបស់រដ្ឋាភិបាល គឺគ្រប់គ្រាន់ ហើយវាមានប្រយោជន៍ជាជាងគ្រាន់តែនិយាយដោយមិនមានវិធានការនោះ៕LA
