ភ្នំពេញ៖ ប្រទេសកម្ពុជា ដោយមានការសហការពីវេទិកាសេដ្ឋកិច្ចពិភពលោក (WEF) បានដាក់ឲ្យដំណើរការជាផ្លូវការនូវប្រព័ន្ធទិន្នន័យស្តីពីសន្ធានកម្មខ្សែច្រវាក់ផ្គត់ផ្គង់សំដៅផ្តល់កិច្ចសម្រួលវិនិយោគសម្រាប់អភិវឌ្ឍន៍ចីរភាព ហៅកាត់ថា «SD2» ដែលជាតារាងទិន្នន័យលើកដំបូងរបស់ខ្លួនក្នុងការផ្ដល់ព័ត៌មានស្ដីពីប្រតិបត្តិការប្រកបដោយនិរន្តរភាពនៃក្រុមហ៊ុនក្នុងស្រុក ហើយវានឹងបម្រើជាវេទិកាដ៏សំខាន់មួយក្នុងការតភ្ជាប់ទំនាក់ទំនងរវាងក្រុមហ៊ុនបរទេស និងក្រុមហ៊ុនក្នុងស្រុក អាចស្វែងរកភាពជាដៃគូណាមួយ ឬការធ្វើការវិនិយោគនៅក្នុងប្រទេសកម្ពុជាបាន។
SD2 ត្រូវបានដាក់ឲ្យដំណើរការរួមគ្នាតាមវីដេអូកាលពីថ្ងៃទី ១២ ខែឧសភា ដោយក្រុមប្រឹក្សាអភិវឌ្ឍន៍កម្ពុជា (CDC) និង WEF ។ ការដាក់ឲ្យដំណើរការ SD2 នឹងបង្កើនការតភ្ជាប់រវាងក្រុមហ៊ុនបរទេស និងក្រុមហ៊ុនផ្គត់ផ្គង់ក្នុងស្រុក ជាពិសេសបណ្ដាក្រុមហ៊ុនក្នុងស្រុកជាច្រើនដែលអាចផ្ដល់ទំនិញ និងសេវាប្រកបដោយគុណភាព។
យោងតាមសេចក្ដីប្រកាសបានពី CDC៖ «ប្រព័ន្ធទិន្នន័យនេះ មានគោលបំណងជួយសម្រួលការវិនិយោគ និងរួមចំណែកដល់ផលប៉ះពាល់ដល់ការអភិវឌ្ឍសំខាន់ៗ។ ក្រុមហ៊ុនផ្គត់ផ្គង់ក្នុងស្រុកអាចចុះបញ្ជីក្រុមហ៊ុនរបស់ពួកគេលើប្រព័ន្ធនេះ ដើម្បីផ្សព្វផ្សាយអាជីវកម្មរបស់ពួកគេ ជាមួយនឹងវិនិយោគិនដែលមានសក្ដានុពល ដែលចូលមើលគេហទំព័ររបស់ CDC យ៉ាងទៀងទាត់»។
លោក សុខ ចិន្តាសោភា រដ្ឋមន្ដ្រីប្រតិភូអមនាយករដ្ឋមន្ដ្រី អគ្គលេខាធិការក្រុមប្រឹក្សាអភិវឌ្ឍន៍កម្ពុជា បានឲ្យដឹងនៅក្នុងសុន្ទរកថា បើកដំណើរការ SD2 នេះថា វានឹងជួយក្រុមវិនិយោគិនកាន់តែងាយស្រួល ក្នុងការស្វែងរកឱកាសវិនិយោគបន្ថែមទៀត និងក្រុមហ៊ុនក្នុងស្រុកដែលមានសក្ដានុពលនៅក្នុងប្រទេសកម្ពុជា។
លោកថ្លែងថា៖ «យើងសង្ឃឹមយ៉ាងមុតមាំថា វិនិយោគិន និងក្រុមហ៊ុនបរទេសនឹងមើលឃើញថា កម្ពុជាកំពុងបង្កើតនូវបរិស្ថានវិនិយោគ ដែលស្វាគមន៍វត្តមានរបស់ពួកគេ ខណៈខិតខំជំរុញការវិនិយោគដែលមានទងើ្វធុរកិច្ចប្រកបដោយការទទួលខុសត្រូវ និងមានចីរភាព»។
ក្នុងនាមជាប្រទេសដ៏តូចមួយ កម្ពុជាអាចធ្វើខ្លួនឯងឲ្យប្រសើរជាងគេ តាមរយៈការធ្វើជាប្រទេសដៃគូក្នុងការជួយសម្រួលការវិនិយោគប្រកបដោយចីរភាព»។ លោកបន្តថា៖ «យើងស្នើសុំឲ្យតួអង្គពាក់ព័ន្ធទាំងអស់ចូលរួមប្រើប្រាស់ប្រព័ន្ធទិន្នន័យនេះ និងស្វែងរកដៃគូក្នុងស្រុកប្រកបដោយគុណសម្បត្តិគ្រប់គ្រាន់នៅក្នុងប្រទេសកម្ពុជា»។
លោក Matthew Stephenson នាយកគោលនយោបាយ និងសហគមន៍នៃនាយកដ្ឋានវិនិយោគ និងពាណិជ្ជកម្មអន្តរជាតិនៅ WEF បានឲ្យដឹងនៅក្នុងការដាក់ឲ្យដំណើរការនេះថា តារាងទិន្នន័យនេះ នឹងជាឧបករណ៍មួយសម្រាប់ក្រុមហ៊ុនបរទេស ដែលចង់វិនិយោគ ឬធ្វើពាណិជ្ជកម្មនៅក្នុងប្រទេសកម្ពុជា។
លោកថ្លែងថា៖ «ក្រុមហ៊ុនបរទេសដែលស្វែងរកការវិនិយោគអនុលោមភាពតាមគោលការណ៍បរិស្ថាន សង្គម និងអភិបាលកិច្ច (ESG) អាចដាក់ការវិនិយោគនៅកម្ពុជាជាមួយក្រុមហ៊ុនក្នុងស្រុកដែលកំពុងប្រតិបត្តិការប្រកបដោយចីរភាព ហើយក្រុមហ៊ុនកម្ពុជាផ្សេងទៀតអាចបង្វែរការតម្រង់ទិសប្រតិបត្តិការធុរកិច្ចរបស់ខ្លួនទៅរកការអភិវឌ្ឍប្រកបដោយចីរភាពកាន់តែច្រើនថែមទៀត ដើម្បីទាក់ទាញការធ្វើធុរៈកិច្ចរួមគ្នាជាមួយនឹងក្រុមហ៊ុនបរទេស សំដៅលើកកម្ពស់ការធ្វើសន្ធានកម្មខ្សែច្រវាក់ផ្គត់ផ្គង់តំបន់ និងសកលលោក»។
លោកលើកឡើងថា៖ «បណ្ដាប្រទេសផ្សេងទៀតក៏អាចពិចារណាការបន្ថែមទំហំទិដ្ឋភាពប្រកបដោយចីរភាពដល់ប្រព័ន្ធទិន្នន័យដែលមានស្រាប់របស់ពួកគេ ដែលបានចាត់ទុកជាយូរមកហើយជាឧបករណ៍ដ៏សំខាន់មួយក្នុងការជួយសម្រួលការវិនិយោគ»។
គម្រោងវិនិយោគប្រកបដោយចីរភាពត្រូវបានដាក់ឲ្យដំណើរការកាលពីដើមឆ្នាំ ២០១៩ តាមរយៈការធ្វើបទសម្ភាសភាគីពាក់ព័ន្ធជាតិ និងអន្តរជាតិ ៥០ ដើម្បីយល់ដឹងពីរបៀបក្នុងការបង្កើនទាំងបរិមាណ និងគុណភាពនៃលំហូរវិនិយោគនៅក្នុងប្រទេសកម្ពុជា។ បន្ទាប់ពីសិក្ខាសាលាពីរលើក និងពិគ្រោះយោបល់បន្ថែមទៀត ការបង្កើត SD2 ត្រូវបានកំណត់ថា ជាគម្រោងមួយក្នុងចំណោមគម្រោងដ៏សំខាន់បំផុតជាច្រើន ដែលអាចប្រើប្រាស់ទៅបាន។
CDC បានចាប់ផ្ដើមការសហការរបស់ខ្លួនជាមួយ WEF កាលពីខែមីនា ឆ្នាំ ២០១៩ ដើម្បីអនុវត្តគម្រោងលើការជួយសម្រួលការវិនិយោគ សម្រាប់ការអភិវឌ្ឍប្រកបដោយចីរភាព។ គម្រោងនេះមានគោលបំណងក្នុងការប្រមូលការយល់ដឹងនៅកន្លែងជាក់ស្ដែងលើបទពិសោធន៍របស់បណ្ដាប្រទេសនានា ជាមួយនឹងវិធានការជួយសម្រួលការវិនិយោគ។
SD2 ត្រូវបានគ្រប់គ្រងដោយ CDC និងត្រូវបានអភិវឌ្ឍជាផ្នែកមួយនៃគម្រោងអភិវឌ្ឍន៍ប្រកបដោយចីរភាព ដែលបានអនុវត្តដោយ CDC និង WEF រួមគ្នាជាមួយនឹងភាពជាដៃគូកម្ពុជាសម្រាប់កសិកម្មប្រកបដោយចីរភាព (CPSA)។
ក្រៅពីព័ត៌មានទូទៅស្ដីពីក្រុមហ៊ុន (ដូចជាផលិតផល និងសេវាកម្មរបស់ខ្លួន) ប្រព័ន្ធទិន្នន័យនេះបង្ហាញពីលក្ខណពិសេសប្រកបដោយចីរភាពរបស់ក្រុមហ៊ុនផ្គត់ផ្គង់ដែលជ្រើសរើស។ មានទំហំទិដ្ឋភាពប្រកបដោយចីរភាពចំនួន ៦ ដែលក្រុមហ៊ុនចុះបញ្ជីអាចបញ្ជាក់ (និងផ្ទៀងផ្ទាត់) នៅក្នុងតារាងទិន្នន័យនេះគឺ ស្ដង់ដាគុណភាព និងការបញ្ជាក់ ខ្សែច្រវាក់ផ្គត់ផ្គង់ប្រកបដោយការទទួលខុសត្រូវ យិនឌ័រ និងបរិយាប័ន្ធ និរន្តរភាពបរិសា្ថន ការកសាងសមត្ថភាពបុគ្គលិក និងការថែទាំបុគ្គលិក។
រដ្ឋាភិបាលកម្ពុជា ក្នុងពេលឆាប់ៗខាងមុខនេះ នឹងអនុម័តលើច្បាប់វិនិយោគថ្មី សំដៅធ្វើទំនើបកម្ម និងបង្កើនផលិតភាពរបស់ឧស្សាហកម្មក្នុងស្រុក និងអភិវឌ្ឍការតភ្ជាប់កាន់តែធំនៅក្នុងខ្សែច្រវាក់ផ្គត់ផ្គង់ក្នុងតំបន់ និងពិភពលោក។
កាលពីឆ្នាំ ១៩៩៥ រយៈពេលមួយឆ្នាំបន្ទាប់ពីការអនុម័តច្បាប់ស្ដីពីការវិនិយោគ ចំនួនការវិនិយោគដែលបានអនុម័តដោយ CDC មានចំនួនសរុបប្រហែល ២,៣ ពាន់លានដុល្លារ។
ការអនុម័តការវិនិយោគសម្រេចបាន ៨៥,៨៨ ពាន់លានដុល្លារអាមេរិក គិតត្រឹមដំណាច់ឆ្នាំ ២០១៩។ កាលពីឆ្នាំ ២០១៨ ការវិនិយោគដែលបានអនុម័តបានកើនឡើងគួរឲ្យកត់សម្គាល់ដល់ ១០,៨៩ ពាន់លានដុល្លារអាមេរិក ក្នុងនោះវិស័យកសិកម្មបានទាក់ទាញរហូតដល់ ១០៦,៧៣ លានដុល្លារអាមេរិក ខណៈដែលវិស័យទេសចរណ៍បានកើនឡើងរហូតដល់ ៨,៧៧ ពាន់លានដុល្លារអាមេរិក និងសេវាកម្មបានកើនឡើងរហូតដល់ ១,២៩ ពាន់លានដុល្លារអាមេរិក។
កាលពីឆ្នាំ ២០១៩ ការអនុម័តការវិនិយោគបានកត់ត្រា ៩,៤០ ពាន់លានដុល្លារអាមេរិកក្នុងចំណោមនោះប្រទេសចិន បានវិនិយោគ ២,៧៥ ពាន់លានដុល្លារអាមេរិក បន្ទាប់មកទីក្រុងហុងកុង ៩១២,៥៥ លានដុល្លារអាមេរិក និងជប៉ុន ២៩៨,៨៤ លានដុល្លារ៕LA