ភ្នំពេញៈ រដ្ឋាភិបាលកម្ពុជាបានរៀបចំមូលនិធិ ៥០ លានដុល្លារ សម្រាប់វិស័យសហគ្រាសធុនតូច និងមធ្យម (SME) ដើម្បីបង្កើនចង្វាក់ផលិត និងរក្សាសមត្ថភាពប្រកួតប្រជែងនៅក្នុងវិស័យកសិឧស្សាហកម្មនៅក្នុងប្រទេស កម្ពុជា។ នេះបើយោងតាមលោកនាយករដ្ឋមន្ត្រី ហ៊ុន សែន។
មូលនិធិនេះត្រូវបានបង្ហាញកាលពីថ្ងៃចន្ទដោយលោកនាយករដ្ឋមន្ដ្រី ហ៊ុន សែន ក្នុងគោលបំណងលើកកម្ពស់ និងកែលម្អវិស័យ SME ស្ថិតក្រោមក្រសួងមួយចំនួន ដែលជាប់ពាក់ព័ន្ធ។ កម្មវិធីហិរញ្ញវត្ថុជាពិសេសនេះ រដ្ឋាភិបាលនឹងផ្ដល់មូលនិធិ ៥០ លានដុល្លារ ដល់វិស័យ SME តាមរយៈធនាគារអភិវឌ្ឍន៍ជនបទកម្ពុជា (RDB)។
លោកបានឲ្យដឹងថា ជំនួយហិរញ្ញវត្ថុនេះនឹងជួយដល់វិស័យ SME ដើម្បីបង្កើនចង្វាក់ផលិតកម្ម និងសមត្ថភាពប្រកួតប្រជែងរបស់ពួកគេ។ លោកបានថ្លែងថា៖ «បច្ចុប្បន្ន ផលិតផលកសិឧស្សាហកម្មមិនអាចប្រកួតប្រជែងជាមួយបណ្ដាប្រទេសជិតខាង វៀតណាម និងថៃបានទេ ដោយសារតែយើងមានតម្លៃផលិតខ្ពស់»។ លោកលើកឡើងថា៖ «ធនាគារអភិវឌ្ឍន៍ជនបទនឹងផ្ដល់កម្ចីអត្រាការប្រាក់ទាបដល់ SME ដើម្បីវិនិយោគ និងដើម្បីដំណើរការនៅក្នុងវិស័យកសិឧស្សាហកម្ម ព្រមទាំងបន្លែ នេសាទ និងការចិញ្ចឹមសត្វ»។
លោក កៅ ថាច អគ្គនាយកធនាគារអភិវឌ្ឍន៍ជនបទបានប្រាប់ភ្នំពេញប៉ុស្ដិ៍កាលពីថ្ងៃចន្ទថា ជំនួយហិរញ្ញវត្ថុនេះនឹងជួយសម្រួលដល់ SME សម្រាប់ការពង្រីកអាជីវកម្មរបស់ពួកគេ។ លោកបន្តថា៖ «RBC មិនទាន់ទទួលបានមូលនិធិនេះពីរដ្ឋាភិបាលនៅឡើយទេ ហើយខ្លួនកំពុងដំណើរការ»។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញប៉ុស្ដិ៍ថា មូលនិធិនេះនឹងក្លាយជាប្រភពថ្មីមួយសម្រាប់វិស័យ SME ខណៈពួកគេមានលទ្ធភាពទទួលបានហិរញ្ញវត្ថុនៅមានកម្រិតសម្រាប់ការពង្រីកអាជីវកម្មរបស់ពួកគេ។ លោកបញ្ជាក់ថា៖ «វាជាសញ្ញាដ៏ល្អមួយ ប៉ុន្តែយើងកំពុងរង់ចាំមើលថា តើធនាគារនេះកំណត់អត្រាការប្រាក់ដូចម្ដេចសម្រាប់ SME? ហើយអ្វីជាតម្រូវការរបស់ធនាគារនេះពី SME»។
របាយការណ៍សាជីវកម្មហិរញ្ញវត្ថុអន្តរជាតិ (IFC) បានចេញផ្សាយកាលពីខែសីហាបានឲ្យដឹងថា សហគ្រិនស្ដ្រីរបស់ប្រទេសកម្ពុជាបានបន្តជួបការពិបាកដោយសារតែលទ្ធភាពនៅមានកម្រិតក្នុងការទទួលបានកម្ចីសម្រាប់ការពង្រីកអាជីវកម្ម។ របាយការណ៍បង្ហាញថា មានតែ ៣ ភាគរយប៉ុណ្ណោះ ដែលមានលទ្ធភាពទទួលបានឥណទានផ្លូវការពីគ្រឹះស្ថានមីក្រូហិរញ្ញវត្ថុ និងធនាគារ។
របាយការណ៍នេះបានប៉ាន់ប្រមាណថា តម្រូវការសម្រាប់ឥណទានពីសហគ្រិនស្ដ្រីបច្ចុប្បន្នមាន ៤,២ ពាន់លានដុល្លារ ស្មើនឹងជិត ៦៣ ភាគរយ នៃថវិកាជាតិ ៦,៧ ពាន់លានដុល្លារ របស់ប្រទេស កម្ពុជា សម្រាប់ឆ្នាំ ២០១៩។
ការស្ទង់មតិមួយដោយក្រសួងឧស្សាហកម្មក្នុងចំណោមសហគ្រាស ៧១ នៅក្នុងប្រទេស កម្ពុជា បានរកឃើញថា ពួកគេត្រូវការជំនួយក្នុងការស្រាវជ្រាវទីផ្សារ ការអភិវឌ្ឍសេវា ការវេចខ្ចប់ បច្ចេកវិទ្យា ធនធានមនុស្ស លទ្ធភាពទទួលបានការងារ និងហិរញ្ញវត្ថុ ការចុះបញ្ជីអាជីវកម្ម និងពន្ធ ព្រមទាំងដើម្បីកែលម្អស្ដង់ដាអនាម័យ។
ការស្ទង់មតិសេដ្ឋកិច្ចអន្តរជំរឿនកម្ពុជាកាលពីឆ្នាំ ២០១៤ បង្ហាញថាមានសហគ្រាស ៥១៣ ៧៥៩ នៅក្នុងប្រទេស កម្ពុជា កាលពីឆ្នាំមុនក្នុងនោះ ៩៧,៦ ភាគរយ គឺជាមីក្រូសហគ្រាស និង ២,២ ភាគរយជា SME។ ស្ដ្រីគ្រប់គ្រង SME ២៦ ភាគរយ និងមីក្រូសហគ្រាស ៦២ ភាគរយ។
លោកនាយករដ្ឋមន្ដ្រី ហ៊ុន សែន ក៏បានជំរុញឲ្យក្រសួងសេដ្ឋកិច្ច និងហិរញ្ញវត្ថុ ត្រូវបង្កើនល្បឿនបង្កើតធនាគារ SME ក្នុងពេលឆាប់ៗតាមដែលអាចធ្វើទៅបាន។ ធនាគារ SME ដែលជាធនាគារថ្មីរបស់ប្រទេសកម្ពុជាមានទុនដំបូង ១០០ លានដុល្លារ ដែលនឹងផ្ដល់ហិរញ្ញប្បទានសម្រាប់សហគ្រាសធុនតូច និងមធ្យម (SME)៕LA