.jpg)
ការនាំចេញរបស់កូរ៉េខាងត្បូងបានធ្លាក់ចុះ ៥,៨ ភាគរយនៅខែមករាធៀបនឹងរយៈពេលដូចគ្នាកាលពីឆ្នាំមុន។ AFP
ក្រុងសេអ៊ូលៈ រដ្ឋាភិបាលកូរ៉េខាងត្បូង មានក្តីបារម្ភកាន់តែខ្លាំងអំពីការនាំចេញ ខណៈដែលការនាំចេញទៅក្រៅប្រទេសរបស់ប្រទេសនេះបានធ្លាក់ចុះ ២ ខែជាប់គ្នាក្នុងគ្រាដែលការនាំចេញឧបករណ៍ពាក់កណ្តាលចម្លង (semiconductor) បានថយចុះ។
ក្រសួងសេដ្ឋកិច្ច និងហិរញ្ញវត្ថុរបស់កូរ៉េខាងត្បូងបានឲ្យដឹងក្នុងរបាយការណ៍ស្តីពីការវាយតម្លៃសេដ្ឋកិច្ចប្រចាំខែរបស់ខ្លួន (ឬហៅថា សៀវភៅបៃតង) កាលពីចុងសប្តាហ៍មុនថា ទាំងការវិនិយោគ និងការនាំចេញបានបង្ហាញពីការប្រែប្រួល ដោយបង្កើនក្តីបារម្ភរបស់ខ្លួនអំពីការនាំចេញដែលមានទំហំប្រហែលពាក់កណ្តាលនៃសេដ្ឋកិច្ចដែលពឹងផ្អែកលើការនាំចេញរបស់ប្រទេសនេះ។
ការនាំចេញរបស់កូរ៉េខាងត្បូងបានធ្លាក់ចុះ ៥,៨ ភាគរយនៅខែមករាធៀបនឹងរយៈពេលដូចគ្នាកាលពីឆ្នាំមុន បន្ទាប់ពីបានធ្លាក់ចុះ ១,៣ ភាគរយក្នុងខែធ្នូ ជាចម្បងដោយសារតម្រូវការឧបករណ៍ពាក់កណ្តាលចម្លងថយចុះ។
ការនាំចេញបន្ទះឈីបបានធ្លាក់ចុះ ២៣,៣ ភាគរយនៅខែមករា បន្ទាប់ពីធ្លាក់ចុះ ៨,៣ ភាគរយនៅខែធ្នូឆ្នាំមុន។
ការវិនិយោគលើសម្ភាររូបវន្តបានធ្លាក់ចុះ ០,៤ ភាគរយនៅខែធ្នូធៀបនឹងរយៈពេលដូចគ្នាកាលពីឆ្នាំ ២០១៧ ដោយរក្សានិន្នាការធ្លាក់ចុះសម្រាប់រយៈពេល ២ ខែជាប់គ្នា។
ផលិតកម្មក្នុងឧស្សាហកម្មទាំងអស់បានបន្តធ្លាក់ចុះរយៈពេល ២ ខែគិតត្រឹមខែធ្នូដោយថយចុះ ០,៦ ភាគរយនៅខែចុងក្រោយនៃឆ្នាំ ២០១៨។
ចំនួនអ្នកដែលគ្មានការងារធ្វើបានកើនឡើងដល់ ១,២២៤ លាននាក់នៅខែមករា ដែលជាតួលេខប្រចាំខែមករាខ្ពស់បំផុតក្នុងរយៈពេល ១៩ ឆ្នាំ។
ការលក់រាយបានរក្សាកំណើន ៣ ខែជាប់គ្នាគិតត្រឹមខែមករា ខណៈដែលសន្ទស្សន៍ទំនុកចិត្តអតិថិជនកើន ០,៦ ពិន្ទុដល់ ៩៧,៥ ពិន្ទុនៅខែមករាធៀបនឹងខែធ្នូ៕ People''s Daily/KC
