ភ្នំពេញៈ រដ្ឋាភិបាលកម្ពុជាកំពុងសិក្សាពីលទ្ធភាពក្នុងការប្រមូលពន្ធលើពាណិជ្ជកម្មតាមប្រព័ន្ធអេឡិចត្រូនិកដែលកំពុងកើនឡើង ខណៈកម្ពុជាកំពុងឆ្ពោះទៅរក ដំណើរការសេដ្ឋកិច្ចតាមប្រព័ន្ធឌីជីថល។
យោងតាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុ កាលពីម្សិលមិញ លោក អូន ព័ន្ធមុនីរ័ត្ន រដ្ឋមន្រ្តីក្រសួងសេដ្ឋកិច្ច បានដឹកនាំកិច្ចប្រជុំពិនិត្យលទ្ធផលនៃការសិក្សាស្តីពីសារពើពន្ធអេឡិចត្រូនិក (E-Tax) ដោយផ្តោតលើទិដ្ឋភាពពាណិជ្ជកម្មតាមប្រព័ន្ធអេឡិចត្រូនិកក្នុងបរិបទសេដ្ឋកិច្ចឌីជីថល។
សេចក្ដីប្រកាសព័ត៌មាន បន្តថា ការប្រើប្រាស់បច្ចេកវិទ្យា នៅក្នុងសកម្មភាពអាជីវកម្មកំពុងកើនឡើង គួរឲ្យកត់សម្គាល់នៅកម្ពុជា ខណៈអតិថិជនកំពុងទទួលយកនិន្នាការថ្មីនេះ។
សេចក្តីប្រកាសព័ត៌មានបញ្ជាក់ថា៖ «បរិបទថ្មីនេះ តម្រូវឲ្យរាជរដ្ឋាភិបាលត្រូវរៀបចំ និងកែសម្រួលគោលនយោបាយ និងបទប្បញ្ញត្តិពាក់ព័ន្ធផ្សេងៗឲ្យស្របទៅតាមនិន្នាការនេះដើម្បីចាប់យកឱកាស ជំរុញការរីកចម្រើននៃទីផ្សារធុរកិច្ចបច្ចេកវិទ្យា និងកាត់បន្ថយនូវហានិភ័យដែលអាចកើនឡើងជាយថាហេតុដោយបច្ចេកវិទ្យាទាំងនេះ»។
សេចក្ដីប្រកាសនេះបន្ថែមថា ខណៈពន្ធលើពាណិជ្ជកម្មតាមប្រព័ន្ធអេឡិចត្រូនិក កំពុងត្រូវបានអភិវឌ្ឍក្នុងតំបន់ និងលើពិភពលោក កម្ពុជាមិនទាន់មានយន្តការពិតប្រាកដ ក្នុងការប្រមូលពន្ធពីប្រតិបតិ្តការតាមប្រព័ន្ធអេឡិចត្រូនិកនោះទេ។
លោក រស់ សីឡាវ៉ា អនុរដ្ឋលេខាធិការសេដ្ឋកិច្ច និងហិរញ្ញវត្ថុបានឲ្យដឹងថា មន្ដ្រីក្រសួងកំពុងស្ថិតក្នុងដំណាក់កាលសិក្សាដើម្បីអភិវឌ្ឍពាណិជ្ជកម្មអនឡាញ និងការរួមចំណែកជំរុញកំណើនរបស់វិស័យនេះ។
លោកថ្លែងថា៖ «ពាណិជ្ជកម្មអេឡិចត្រូនិកកម្ពុជា កំពុងស្ថិតក្នុងដំណាក់កាលដំបូងនៃការអភិវឌ្ឍ ដូច្នេះយើងអាចមិនសម្រេចយកពន្ធភ្លាមៗទេ យើងទើបតែសិក្សាការអភិវឌ្ឍពិត និងការបង្កើតគោលនយោបាយ និងបទប្បញ្ញត្តិមួយចំនួន ដើម្បីជួយដល់កំណើនវិស័យនេះឲ្យរលូន»។
ការអភិវឌ្ឍ ពាណិជ្ជកម្មអេឡិចត្រូនិកនៅកម្ពុជា ត្រូវបានរារាំងដោយកង្វះបទប្បញ្ញត្តិ។ ច្បាប់ពាណិជ្ជកម្មអេឡិចត្រូនិក កំពុងត្រូវបានព្រាង ដោយក្រសួងពាណិជ្ជកម្ម អស់រយៈពេលជាច្រើនឆ្នាំមកហើយ ហើយរហូតមកដល់ពេលនេះ កាលបរិច្ឆេទនៃការអនុម័តជាផ្លូវការលើច្បាប់នេះមិនទាន់ច្បាស់លាស់នៅឡើយទេ៕LA